9
Dos Kod-aam to Monama taddot mgo Sakup Din
1 Na, duwon pa ponudtulon ku koniyu woy bonnaa en ini. Konna a en od ouhus, su nosokkad a riyot ki Disas Krays. Molinis kos poomdom ku, oyyos no-iraom a to kodpomandu to Uhis no Ispiritu no id posivonnaa ka-ay. 2 Iyon id kopi-i ku nod osengon no noponnu a to lanu, woy diid ka-awa kos mosakit to ginawa ku taddot iling ku no mgo Judio, oyyos dii ran od pomakoy ki Disas Krays. 3 Otid kopakoy ra en nanoy, od podsuwomihon kud no siyak don kos od posahapan to Monama woy od tompoddon kos koroniyan ku riyot ki Disas Krays amoy'd pokolegguang dan da en pomon diyot kodsilut to Monama. 4 Mo-uraa kos kopiyannan no id boggoy to Monama kandan. Oyyos sikandan kos koubbaran ni Israel no id aam to Monama amoy od kovovallan no mgo anak din. Sikandan kos id pokitannan din to se-aa to kotuusan din. Kopila id potonduwoy kos Monama duma kandan, woy riyon din en to kandan id boggoy iddos mgo Suhu. Sikandan mandad kos id nonawwan din to ollog no po-ukit to kodsimba kandin. Mo-uraa kos mgo tandu rin nod tovangan din en sikandan. 5 Koubbaran sikandan taddot nongovantug no kovuyyahan doy. Woy dos Mesiyas no si Disas Krays, lubbad dan mandad, su nominuvu sikandin no sokkad no Judio. Iddos Monama no id hari to langun, ollog nod doongon to waad tomanon. Oyya, od kotuman en ini.
6 Na, iyon bo kohulugan ka-ay no waa tumana to Monama iddos tandu rin diyot koubbaran ni Israel? Konna en! Su konna langun to koubbaran ni Israel, mooggot no minuvu to Monama. 7 Woy konna langun to koubbaran ni Abraham, mooggot no lubbad din, su id ikahi to Monama ki Abraham no,
“Iyon da od ngoranan ku no mooggot no koubbaran du, idda en so lubbad to anak du no si Isaac.”* Od kovasa ini riyot Genesis 21:12.
8 Dos kohulugan tadda, no konna langun taddot koubbaran ni Abraham, od ngoranan to Monama no mgo anak din, ko konna, idda ra en so id tobbow ukit to tandu to Monama ki Abraham. 9 Su id totandu kos Monama ki Abraham moka-atag ki Isaac, kahi rin to,
“Init so-op no lahun, od livod a ka-ay, woy od tobbawan don kos sawa ru no si Sara to anak no mama.”* Od kovasa ini riyot Genesis 18:10.
10 Woy konna ra idda, od kokita ta mandad iddos po-ukit to kod-aam to Monama. Oyyos si Isaac no kovuyyahan ta woy si Rebecca no sawa rin, id anak to sopping no idda en si Esau woy si Jacob. 11-12 Su iddot waa pa id tobbow iddos sopping, mid ikahi kos Monama ki Rebecca to,
“Iddos ari, od hari sikandin taddot kakoy.”* Od kovasa ini riyot Genesis 25:23.
Id ikahi to Monama idda to waa pa nokopuung iddos sopping to moppiya o morat, su id kopi-i rin nid nonaw no otid aam sikandin to minuvu, konna ukit to moppiyon pinuungan, ko konna, ukit to id kopi-it Monama. 13 Ini en mandad kos kohulugan taddot no-ikahi riyot Nosulat no Kahit Monama no mid ungketen to,
“Id ginowannan ku iddos ari no si Jacob, piru id kolingasa-i ku iddos kakoy no si Esau.”* Od kovasa ini riyot Malaquias 1:2-3.
14 Na, ko ungketen, iyon bo kohulugan ka-ay no duwon od podmusingon to Monama? Konna en! 15 Su mid ikahi iddos Monama ki Moises to,
“Siyak kos od pokita to eru taddot id kopi-i ku nod pokitannan to eru.”* Od kovasa ini riyot Exodo 33:19.
16 De-en ka-ay ta en pantok od kosorollan, no iddos kod-aam to Monama, konna ukit to id kopi-it minuvu woy kod-oiluggat dan, ko konna, ukit en to eru rin. 17 Oyya su riyot Nosulat no Kahit Monama, id osengan din iddos harit Ehipto no,
“Id bovallan ku sikkow no hari, su amoy ukit kikow, id pokopokita ku kos koddin kotuusan woy od koposivontuhan kos ngaran ku to intirut ingod.”* Od kovasa ini riyot Exodo 9:16.
18 Purisu ka-ay ta en pantok od kosorollan, no iddos Monama kos id aam ko ondoy kos id kopi-i rin nod pokitannan to eru, woy sikandin kos od potoggas to uu taddot minuvu no id kopi-i rin nod potoggason kos uu.
19 Na, saddook duwon sokkad koniyu nod ikahi no, “Ko ungketen, mambo man tod uuhon to Monama no nokosaa kos minuvu, oyyos waa me-en od pokosupak to kandin nid kopi-i?” 20 Piru iyon id pokotavak ku tadda, minuvu ka ra. Na, ondoy ka man nod sawoy to Monama? Od koponunggelengan ku kos kuron. Waa kuron no od pokosawoy taddot tohodbovaa kandin nod ikahi to, “Te, mambo moho to id ungketen a nikkow tid bovaa?” 21 Su iddos tohodbovaa to kuron, sikandin kos duwon kotungud ko ondan kos id kopi-i rin nod bovallan. Ponunggeleng, dos sokkad no ba-ad to basak, od bovallan din to kuron no mahaa woy motoos atag to duwon koru-anon no mgo dontulon, woy dos sokkad, atag to ahad ondan don.
22 Ungketen en mandad kos Monama. Duwon kotungud din nod puung to ahad ondan no id kopi-i rin. Kotungud din en iddos kodpokita to kandin no kotuusan woy langot taddot mgo mosaasaa no ollog en nod silutan. Piru id poowwet din kos posinsya rin kandan. 23 Id puungan din ini, su amoy id pokopokita rin iddos mokososoobbun kopiyannoy rin diyot mgo minuvu no id ko-eru-i rin, woy id panoy rin tapoy sikandan no od ubpa riyot motoos no bonuwa rin. 24 Solamat su apii ki taddot mgo minuvu nid aam to Monama, konna ra sikami no mgo Judio, ko konna, sikiyu en mandad no konna mgo Judio. 25 Ini en kos no-ikahi riyot id posulat to Monama ki Oseas no mid ungketen to,
“Iddos konna ku mgo minuvu dangan, od ngoranan kud sikandan no koddin mgo minuvu. Woy dos mgo minuvu no waa ku pa ginowanni, ko-ungkay od ginowannon kud sikandan.* Od kovasa ini riyot Oseas 2:23.
26 Woy riyon da en no ingod to id ikohiyan ku kandan no konna ku mgo minuvu, diyon ku en mandad sikandan od ngoranan no mgo anak to ma-antoy'n Monama.”* Od kovasa ini riyot Oseas 1:10.
27 Ini en mandad kos no-ikahi riyot id posulat to Monama ki Isaias moka-atag to koubbaran ni Israel no mid ungketen to,
“Ahad iling ko-uralloy to paok to dahat kos koubbaran ni Israel, piru disok da kos od kotobbus kandan.
28 Oyyos od silutan en to Monama kos mgo minuvu ka-ay to ampow't ingod, woy go-os din don idda od puungan.”* Od kovasa ini riyot Isaias 10:22-23.
29 Mid ikahi mandad si Isaias no,
“Siketa no koubbaran ni Israel, otik waa pa no-eru-i keta kos Monama nod Longaggon no Motuus to langun, waad en nanoy ahad sokkad keta nod kosama, su od poko-iling ki taddot mgo toho Sodoma woy mgo toho Gomora no id ipannas din.”* Od kovasa ini riyot Genesis 19:24-25; Isaias 1:9.
Waa id Salig ki Disas iddos mgo Judio amoy'd Komotallong diyot Kod-ontong to Monama
30 Na, ko ungketen, ondan bo kos od ko-oseng ta ka-ay? Od ko-oseng ta no iddos konna mgo Judio, waa ran id nokkaanokkaa amoy'd komotallong diyot kod-ontong to Monama. Piru sikandan dad en kos id podmotallong to Monama ukit to kopomakoy ran. 31 Piru iddos koubbaran ni Israel no id nokkaanokkaa nod tuman to mgo Suhu amoy'd komotallong diyot kod-ontong to Monama, waa ran en na-apput iddos puhawang dan. 32 Mambo man to ungketen? Su iddos koubbaran ni Israel, id salig dan moho to kodtuman taddot mgo Suhu. Waa ran id salig ki Disas Krays amoy'd komotallong diyot kod-ontong to Monama. Na pomon ka-ay, noko-iling sikandan to minuvu no nokosi-ud taddot od pokoposi-ud to batu no idda en si Disas Krays.* Si Disas Krays, noko-iling to batu nod pokoposi-ud, su diid pokotanggap iddos mgo Judio no Anak sikandin to Monama no id popiyod amoy'd tobbus kandan. 33 Iling taddot no-ikahi riyot Nosulat no Kahit Monama no mid ungketen to,
“Pomotawi row! Od ta-aw a to batu riyot Sion* Inis Sion, osson ngaran to Jerusalem. no od pokoposi-ud woy od pokopiloy to mgo minuvu. Piru dii en od pokodsondit iddos minuvu nod pomakoy kandin.”* Od kovasa ini riyot Isaias 8:14; 28:16.
*9:7 Od kovasa ini riyot Genesis 21:12.
*9:9 Od kovasa ini riyot Genesis 18:10.
*9:11-12 Od kovasa ini riyot Genesis 25:23.
*9:13 Od kovasa ini riyot Malaquias 1:2-3.
*9:15 Od kovasa ini riyot Exodo 33:19.
*9:17 Od kovasa ini riyot Exodo 9:16.
*9:25 Od kovasa ini riyot Oseas 2:23.
*9:26 Od kovasa ini riyot Oseas 1:10.
*9:28 Od kovasa ini riyot Isaias 10:22-23.
*9:29 Od kovasa ini riyot Genesis 19:24-25; Isaias 1:9.
*9:32 Si Disas Krays, noko-iling to batu nod pokoposi-ud, su diid pokotanggap iddos mgo Judio no Anak sikandin to Monama no id popiyod amoy'd tobbus kandan.
*9:33 Inis Sion, osson ngaran to Jerusalem.
*9:33 Od kovasa ini riyot Isaias 8:14; 28:16.