10
1 Mgo suwod, dakkoo kos ingowollon ku nod kotobbus iddos iling ku no mgo Judio, woy ini en kos dosalon ku riyon to Monama. 2 Od pokoposivonnaa a no mohi-od dan nod puung atag to Monama, piru iddos kodpuung dan, waa noko-ikuu taddot bonnaan nonaw. 3 Su id podtohon dan iddos po-ukit to Monama nod podmotallong to minuvu. Iyon dan baling noonokkali tid ikuu iddos kandan dad no po-ukit nod komotallong ukit to kodtuman to mgo Suhu, woy waa ran id po-iraom taddot po-ukit to Monama. 4 Oyyos notuman diyot ki Disas Krays iddos dontulon to kodboggoy taddot mgo Suhu, amoy iddos langun nod pomakoy kandin, od komotallong diyot kod-ontong to Monama.
Dos Langun nod Nganoy tod Longaggon, od Kotobbus en
5 Na, ini en kos id sulat ni Moises moka-atag to minuvu nod tuman to mgo Suhu amoy'd komotallong diyot kod-ontong to Monama. Kahi rin to,
“Iddos minuvu nod tuman to langun no Suhu, od pokotanggap to umuun waad tomanon.”* Od kovasa ini riyot Levitico 18:5.
6 Piru moka-atag to po-ukit nod komotallong kos minuvu riyot kod-ontong to Monama ukit to kopomakoy, duwon mandad no-ikahi riyot Nosulat no Kahit Monama no mid ungketen to,
“Yo kowd poomdomma no, gali ra od komotallong kos minuvu riyot kod-ontong to Monama otik duwon od undiyot datas to langit amoy'd angoy ki Disas Krays.
7 “Yo kow mandad od poomdomma no, ko-ilangan pa no duwon od undiyot daom to lugaa tid poomatoy amoy'd badnow ki Disas Krays.
8 Su no-ikahi riyot Nosulat no Kahit Monama no,
“Iddos kahi to Monama, diyon don to koniyu. Diyon don idda to bivig dow woy riyot ginawa row.”* Od kovasa ini riyot Deuteronomio 30:12-14.
Idda en kos kahit Monama no id ponudtuu roy moka-atag to kopomakoy, 9 no otik id ponudtuu row riyot duma no si Disas Krays kos od Longaggon, woy od pomakoy kow riyot ginawa row no id badnow sikandin to Monama, na od kotobbus kow en. 10 Su otid pomakoy ki to bonnaavonnaa, od komotallong ki riyot kod-ontong to Monama. Woy pomon to id ponudtuu ta riyot duma kos kopomakoy ta, od kotobbus ki. 11 Oyya su no-ikahi riyot Nosulat no Kahit Monama no,
“Iddos langun nid pomakoy kandin, konna en od pokodsondit.”* Od kovasa ini riyot Isaias 28:16.
12 Inin tandu, atag to langun, Judio man o konna, oyyos sokkad da man kos od Longaggon ta no od busbus to kopiyannan diyot langun nod nganoy kandin. 13 Su no-ikahi riyot Nosulat no Kahit Monama no,
“Iddos langun nod nganoy tod Longaggon, od kotobbus en.”* Od kovasa ini riyot Joel 2:32.
14 Piru momonnu ran man od nganoy kandin otik waa pa sikandan id pomakoy? Woy momonnu ran od pomakoy kandin otik waa pa sikandan nokorinog moka-atag kandin? Momonnu ran mandad od pokorinog otik waa od ponudtuu kandan? 15 Woy momonnu ran mandad od koponudtulan otik waa od popiyod amoy'd ponudtuu kandan? Iling taddot no-ikahi riyot Nosulat no Kahit Monama no,
“Oraroy ki en nod kahaa otik duwon od inguma nod ponudtuu to Moppiyon Dinoggan.”* Od kovasa ini riyot Isaias 52:7.
16 Piru simbokkad da kos id tanggap to Moppiyon Dinoggan, su no-ikahi ni Isaias no,
“Longaggon, pilopila ra kos id pomakoy to ponudtulon doy.”* Od kovasa ini riyot Isaias 53:1.
17 Piru ahad ungketen, bonnaa en no iddos kopomakoy to minuvu, id pomon to kodpominog dan to ponudtulon moka-atag ki Disas Krays. 18 Piru duwon intud ku. Waa vo nokorinog kos mgo Judio moka-atag ki Disas Krays, no idda en kos unayan no waa ran id pomakoy? Nokorinog en sikandan, su no-ikahi riyot Nosulat no Kahit Monama no,
“Dos kahit Monama, norinog to langun no minuvu
woy nokoso-ob don to intirut ingod.”* Od kovasa ini riyot Salmo 19:4.
19 Na, duwon mandon intud ku. Ondan, waa vo nokaabbot iddos mgo Judio taddot norinog dan? Nokaabbot en sikandan. Su id oseng kos Monama riyot mgo Judio ukit taddot id posulat din ki Moises. Kahi rin to,
“Id pokita ku kos kopiyannoy ku riyot mgo minuvu nid kolingasa-i row amoy od kosina kow kandan.
Id pokita ku kos kopiyannoy ku riyot mgo minuvu no waa sinorollan moka-atag koddi amoy id kolingasa-i row sikandan.”* Od kovasa ini riyot Deuteronomio 32:21.
20 Mid ikahi mandad kos Monama kandan ukit ki Isaias, woy to waa kod-aang-aang, mid ungketen si Isaias to,
“Nokita a taddot mgo minuvu no waa id nangkap koddi. Id pokilaa a riyot waa id intud-intud moka-atag koddi.”* Od kovasa ini riyot Isaias 65:1.
21 Piru moka-atag taddot mgo Judio, mid ikahi kos Monama to,
“Nouhoy ad mid umow nod porani koddi iddos mgo minuvu no diid pominog woy mgo motoggas kos uu.”* Od kovasa ini riyot Isaias 65:2.
*10:5 Od kovasa ini riyot Levitico 18:5.
*10:8 Od kovasa ini riyot Deuteronomio 30:12-14.
*10:11 Od kovasa ini riyot Isaias 28:16.
*10:13 Od kovasa ini riyot Joel 2:32.
*10:15 Od kovasa ini riyot Isaias 52:7.
*10:16 Od kovasa ini riyot Isaias 53:1.
*10:18 Od kovasa ini riyot Salmo 19:4.
*10:19 Od kovasa ini riyot Deuteronomio 32:21.
*10:20 Od kovasa ini riyot Isaias 65:1.
*10:21 Od kovasa ini riyot Isaias 65:2.