2
Pegdateng te Espiritu Santo
1 Pegdateng te aldaw te pista iningedanan Pentekostes, netipon se kedita te otaw nemenal ki Jesus doton te sebad balay. 2 Pegketà dinineg te kedita dan se logo-logo lekat te langit, iling te kelamag ontò mebandes. Migbelinut se logo-logo doton didalem te balay netiponan dan. 3 Penga niyan, kinità dan se legdeg iling te apoy timeped diyà te teg sebad-sebad kandan, aw simelà iyan diyà te olo dan. 4 Yan dimateng se Espiritu Santo kandan. Nekeikagi den dan te medita kemolò kagi te doma otaw wedà dan peg-ilingi, so impeikagi dan te Espiritu Santo.
5 Doen medita Judiyo egpenimanem kidoen te Jerusalem lekat te kedita te ogpeanan te keneyonan. 6 Pegdineg dan te kagi te otaw nebegayan te Espiritu Santo, ontò medita se otaw netipon. Ontò dan nepela, so dinineg te teg sebad-sebad kandan se kemolò te kagi din inikagi te menge otaw egpemenal. 7 Ontò nepela se otaw netipon. Minikagi dan, “Pengkey tege Galiliya se kedita dan, 8 meneng nekeikagi dan te medita kemolò kagi tadon wedà dan palos peg-ilingi. 9 Medita se ogpeanan tinikedowan tadon, so doen menge tege Partya, aw tege Medya, aw tege Elam. Doen menge otaw lekat te Mesopotamya, aw Judiya, aw Kapadosya, aw Ponto, aw Asya. 10 Doen heman otaw tikedo te Frigya, aw Pampilya, aw Ehipto, aw menge ogpeanan te Libya medapag te Sirene. Doen menge kedowa tadon Judiyo lekat te Roma. Doen heman menge otaw kenà Judiyo egtolò te ketanem tadon Judiyo. 11 Doen tege Kreta aw tege Arabya. Mig-indan se menge tege Galiliya sìyan te mèpiya ininang te Timanem. Ontò kidon mekelabet te inikagi dan, so nekeikagi dan te medita kemolò kagi tadon.”
12 Ontò dan nepela aw migkebulung se aneng-aneng dan. Migpeinsaay dan, “Eden lay ini?”
13 Meneng doen heman menge doma otaw migtompuyus, kagi dan, “Nelangot dan te bino.”
Migtoladà si Pedro
14 Timindeg si Pedro sipat doma sempolò tegusà sogounun i Cristo kidoen. Penga niyan, minikagi sikandin amon domineg se kedita te otaw netipon. Kagi din, “Menge kedowa ko Judiyo, aw kedita niyo dini te Jerusalem, penenalan kaw, so doen ikegiyen ko kenyo. 15 Eden niyo aw nelangot kay te bino, so simpana minem se otaw te bino, eked pa kelangot, so medanà pa se aldaw. 16 Meneng sebad se neinang gina, so netoman den se kagi insolat te sebad telekeliwat te kagi te Timanem si Joel gebii, 17 kagi din,
‘Seini se kagi te Timanem. Aw agpet den se temanan te keneyonan, ibegay ko se Espiritu Santo diyà te kedita te otaw. Yan komeliwat se menge batà niyo te kagi ko. Komità se menge kaling pa otaw te ipekità ko kandan. Megtegeinep heman se menge obanen kenyan. 18 Aldaw sìyan, ibegay ko se Espiritu Santo diyà te kedita te otaw egtolò kanak, pengkey meama aw bayi. Komeliwat dan te kagi ko. 19 Ipekità ko se kepelahan doton te langit. Ipekità ko heman dini te tanà se ledyawan te dipanog aw apoy aw ebel. 20 Megkengitngit se aldaw. Megkelalag se bolan iling te dipanog. Metoman iyan te eked pa okomi te Pengolo tadon se kedita te otaw. Yan se aldaw ontò medengeg. 21 Meneng mekelowà lekat te salà se kedita te otaw memoyò diyà te Pengolo tadon.’
Yan se kagi te Timanem ingkeliwat i Joel.
22 “Na, menge kedomaan ko Judiyo, penenalan kaw te ikegiyen ko. Si Jesus tege Nasarit, yan se impetaga-taga te Timanem te sikandin se insogò din. Impetaga-taga din iyan pineokit te peg-inang din te inang metolos, aw kepelahan, aw ledyawan. Ontò niyo netegahan iyan so neinang iyan dini kenyo. 23 Pengkey tapay netegahan te Timanem aw eden se inangen niyo ki Jesus, meneng lekat te ibeg te Timanem se pegdakep niyo ki Jesus. Impelansang niyo sikandin te medaet otaw diyà te kros aw impeimatay niyo, 24 meneng inantay sikandin te Timanem lekat te nematay. Impelowà din si Jesus diyà te kemetayun, so eked daeg se kemetayun kandin. 25 Simolat se kemonaan tadon si David tepad ki Jesus, kagi din,
‘Netegahan ko te tebangan a te Pengolo aw wedad mekelamit kanak, so gayed a din egtekingan. 26 Yan ontò neluba se pedowan ko. Iduyun ko sikandin. Pengkey matay se lawa ko, doen pelimanan ko, 27 so eked a din pebeyai doton te lebeng. Eked kepakay diyà kandin aw meledak se lawa ko, so pinemallì a din. 28 Entayen a din lekat te nematay. Ontò neluba se pedowan ko so egdomaan a din.’
Yan se kagi ingkeliwat i David.
29 “Menge kedowa ko, ontò ko bengalen se kagi ko kenyo. Sìyan inikagi te kemonaan tadon gebii si David, kenà iyan tepad te kandin pegkeotawun, so nematay sikandin aw inlebeng se lawa din doton te ilib inewangan, aw penga niyan neledak. Kidoen pa se linebengan kandin lamig songkani. 30 Meneng te wedà pa kematay si David, sikandin se telekeliwat te kagi te Timanem. Doen impakang te Timanem te meinang selotan se sebad bowad-bowad i David, amon doen selotan lomowan iling te peglowan i David. 31 Migpeliman si David te pegketoman niyan, aw yan minikagi sikandin te meantay se Misiyas pelimanan din, so kagi din,
‘Eked sikandin pebeyai doton te lebeng. Eked kepakay diyà te Timanem aw meledak se lawa te Misiyas isogò din.’
32 Netoman den iyan, so inantay te Timanem si Jesus lekat te nematay, aw kinità te kedita day te neantay sikandin lekat te nematay. 33 Ininang den si Jesus melangkaw doton te langit aw timangkil te Amay din. Tinoman den te Timanem se pakang din ki Jesus te isogò se Espiritu Santo, aw yan se kinità niyo gina aw dinineg niyo. 34 Sìyan inikagi i David, kenà iyan tepad te kandin pegkeotawun, so wedà keengat se lawa i David doton te langit, meneng diyà pa te lebeng. Gebii minikagi si David,
‘Minikagi se Timanem diyà te Pengolo ko, Penenoo ka dini te tangkil ko 35 lamig dàgen ko se menge poon no aw ipetolò ko dan kamno.’
36 Eneng-enengi niyo. Pengkey inlansang niyo si Jesus diyà te kros amon matay, meneng sikandin se ininang te Timanem Pengolo aw Misiyas.”
37 Pegdineg te menge otaw te inikagi i Pedro, ontò neantag se pedowan dan. Mig-insà dan ki Pedro aw doma sogounun i Cristo, kagi dan, “Elew, megmeno kay?”
38 Timaba si Pedro, “Pegselsel kaw te salà niyo. Pegpebonyag kaw tandà te pegpemenal niyo ki Jesu Cristo. Aw memenal kaw, pegwedaden te Timanem se salà niyo, aw Espiritu Santo se ibegay kenyo. 39 Migpakang se Timanem te ibegay din se Espiritu Santo diyà kenyo, aw diyà te batà niyo, aw diyà te otaw mediyò, so ibegay din diyà te kedita te otaw tewalen din.”
40 Nenamay pa minikagi si Pedro diyà kandan. Migpunù sikandin, kagi din, “Ikà niyo egdoma te kedomaan niyo eg-inang te medaet, amon eked kaw pelumuni.”
41 Penga niyan, binonyagan dan se menge otaw nemenal te inikagi i Pedro. Doen menge telo melalan otaw nemenal te Timanem te aldaw sìyan, aw nekeakop dan diyà te otaw tapay nemenal. 42 Ebey dan nenenalan te intoladà te menge sogounun i Cristo. Egpetekingay se otaw egpemenal, aw egtipon dan amon megtawal-tawal diyà te Timanem, aw amon megbelà-belà te pan, iling te pegtoladà i Jesus kandan kedengan.
Ininang te menge otaw egpemenal
43 Mig-inang se sogounun i Cristo te inang metolos aw kepelahan. Yan ontò nepela se kedita te otaw. 44 Melikit netipon se menge otaw egpemenal. Sebad se ketig-epoan dan te kedònan dan, 45 aw imbeligyà dan se kedònan amon doen kwarta ibegay dan diyà te doma otaw tepad te kelimahan dan. 46 Kelikit te aldaw, netipon se kedita dan doton te dakel simbahan te Jerusalem, aw migbelà-belà dan te pan doton te kandan balay. Neluba se pedowan dan te pegsebad dan pegpengaen. 47 Gayed dan ipegduyun se Timanem. Sinagman dan te menge doma otaw. Kelikit te aldaw, dinogangan te Pengolo se otaw nemenal.