1 Doen aldaw dimoton si Pedro aw si Juan te dakel simbahan te Jerusalem alas tris te meapon, so yan se oras te pegtawal-tawal kidoen. 2 Doen sebad otaw kapig lekat te pegtebaw din nenenoo kidoen te lelebangan te simbahan iningedanan Pelasan. Kelikit te aldaw, egkelelangen te doma din doton te lelebangan te simbahan amon memoyò te kwarta diyà te otaw mawop. 3 Agpet den mawop si Pedro aw si Juan, kimità se kapig kandan aw nemoyò sikandin te kwarta diyà kandan. 4 Pegkità dan kandin, minikagi si Pedro, “Tengtengi kay.”

5 Yan timengteng se kapig kandan, so eden din aw doen kwarta ibegay kandin. 6 Meneng minikagi si Pedro, “Wedad palos kwarta ko, meneng tebangan ta te mebatog ko. Pineokit te ngadan i Jesu Cristo tege Nasarit, ipanaw ka.”

7 Penga niyan, inewidan i Pedro se belad din digsel te kowanan aw impetindeg din. Pegketà migkagsen se benis din. 8 Yan timindeg sikandin aw migpanaw-panaw. Penga niyan, minawop sikandin doton didalem te simbahan doma ki Pedro aw si Juan. Migpanaw-panaw sikandin, aw migtolayun, aw induyun din se Timanem. 9 Kinità te kedita te otaw kidoen se peg-ipanaw din aw pegduyun din te Timanem. 10 Kinilala dan sikandin se otaw tapay metipemoyò gayed egpenenoo doton te lelebangan iningedanan Pelasan. Yan ontò dan nepela kandin so kinità dan negolian den.

11 Kidoen si Pedro aw si Juan te sebad balkon te dakel simbahan iningedanan Balkon i Solomon. Inewidan dan te otaw negolian tandà te luba din. Netipon se kedita te otaw kidoen kandan so nepela dan. 12 Pegkità i Pedro te otaw netipon, minikagi, “Menge kedomaan ko Judiyo, ikà niyo egkepela kenyan. Ikà niyo egtengteng kenami. Kenà kenami tolos se nekegolì te otaw kapig. Kenà heman lekat te ketòlid day. 13 Timanem se egseligan te kemonaan tadon si Abraham, si Isaac, aw si Jacob. Timanem se migpegolì kandin amon iduyun se Batà te Timanem si Jesus. Kedengan insogò din si Jesus dini te tanà, meneng sikiyo se otaw nemegay kandin diyà te belad te gobirno. Pengkey ibeg i Pilato ipelowà din si Jesus, meneng simagda kaw kandin amon imetayan se insogò te Timanem. 14 Pengkey wedad palos salà din, meneng wedà kaw keibeg kandin. Nemoyò kaw te ipelowà i Pilato se otaw metibonò. 15 Inimetayan niyo se egpemegay te kaling pedowan lekat te Timanem, meneng inantay sikandin te Timanem lekat te nematay. Benal iyan, so kinità day sikandin neantay. 16 Pineokit te ngadan i Jesus egseligan day, negolian den se otaw seini kinità aw kinilala niyo. Pineokit te pegsalig ki Jesus, nekeipanaw den sikandin aw yan se kinità niyo.

17 “Menge kedowa ko, netegahan ko te impeimatay niyo si Jesus so wedà niyo ketegahi te sikandin se Misiyas. Wedà heman ketaga-taga se menge otaw limowan kenyo. 18 Yan netoman se kagi te Timanem ingkeliwat te kedita te telekeliwat din gebii, te pemilangen aw imetayan se Misiyas isogò din. 19 Yan pegselsel kaw aw taking kaw te Timanem amon pegwedaden din se salà niyo, 20 aw begayan kaw din te kaling pedowan. Ipelikò din heman se Misiyas tapay pinemallì din si Jesus, 21 meneng songkani eg-ogpà pa sikandin doton te langit lamig te todaen te Timanem se kedita, so yan se impakang te Timanem kenitadon Judiyo aw impekeliwat din iyan pineokit te telekeliwat te kagi din. 22-23 Gebii minikagi si Moises diyà te menge bowad-bowad i Israel,

24 “Kedita te telekeliwat te kagi te Timanem gebii, si Samuel aw menge doma telekeliwat neketetondog kandin, minikagi se kedita dan tepad te netoman den seini. 25 Sikitadon heman se pinekangan te Timanem, so ingkeliwat se pakang sìyan diyà kenitadon. Netoman den songkani se pakang te Timanem diyà te kemonaan tadon, so minikagi se Timanem diyà ki Abraham,