1 Nematay si Sara te sebad gatos kelowan teg pito se omay din. 2 Nematay sikandin doton te lonsod te Hebron sakop te Canaan. Dimoton si Abraham amon moloy kandin.

3 Timanan si Abraham te lawa te esawa din, aw dimoton sikandin te menge tege Heti, aw minikagi sikandin, 4 “Kenà a tege dini, so minalin a dini kenyo. Beyadan ko peden kenyo se tanà dini amon doen lebengan ko te esawa ko nematay.”

5 Minikagi se menge tege Heti, 6 “Sir, penenalan ka den kenami. Netegahan day te dakel ka otaw pinemallì te Timanem. Mepakay diyà kenami aw ilebeng no se esawa no dini te ontò mèpiya lebenganan day. Pengkey eden lebengi se pemellien nikaw, meluba se tig-apò memegay kenyan diyà kamno amon doen lebengan no kandin.”

7 Penga niyan, limongken si Abraham diyà kandan, 8 aw minikagi sikandin, “Aw mepakay diyà kenyo se peglebeng ko te esawa ko dini, pemoyoi niyo si Efron batà i Sohar 9 amon ibeligyà din diyà kanak se ilib te Macpela doton medapag te kilid te pawà din. Ikegihi niyo diyà kandin te pengkey pila se ontò elagà niyan, beyadan ko iyan diyà kandin dini kenyo, amon doen kenaken lebenganan.”

10 Kidoen heman si Efron doma te menge tege Heti netipon kidoen te lelebangan te lonsod sìyan, aw dinineg te kedita dan se intaba din diyà ki Abraham, 11 “Sir, penenalan ka den kanak. Tiblug ko ibowang diyà kamno se kedakel te pawà ko sìyan sipat te ilib kidoen. Dalem te pegbantay te kedita te doma ko, ibowang ko den iyan diyà kamno amon lebengan no te esawa nikaw.”

12 Todà limongken si Abraham diyà te menge otaw kidoen, 13 aw minikagi sikandin diyà ki Efron dinineg te kedita dan, “Penenalan ka den te kagi ko seini. Beyadan ko den se pawà no sìyan te kedakel te elagà niyan. Kinewai se ibayad ko, amon doen lebengan ko te esawa ko.”

14 Minikagi si Efron, 15 “Sir, penenalan ka den kanak. Epat gatos te kwarta selapì se elagà niyan, meneng eked ko iyan pebeyadi kamno so sigalak ki. Tiblug ka den peglebeng te esawa no kidoen.”

16 Timandù si Abraham tepad te elagà inikagi i Efron dinineg te kedita te otaw netipon, aw yan pinisar din se epat gatos kwarta selapì, iling te pegpisar te menge tindiro, aw imbegay din iyan diyà ki Efron. 17 Pineokit kenyan, nenig-apò si Abraham te tanà i Efron doton te Macpela medapag te lonsod te Mamre. Bineyadan din se tanà sìyan sipat te ilib kidoen, aw kedita te kayo nesakop te tanà sìyan. 18 Neinang si Abraham tig-apò te tanà sìyan dalem te pegbantay te kedita te tege Heti netipon kidoen te lelebangan te lonsod sìyan.

19 Penga niyan, inlebeng i Abraham se lawa te esawa din si Sara doton te ilib kidoen te Canaan. 20 Yan se indan tepad te pegpenig-apò i Abraham te tanà aw ilib ininang din lebenganan tapay tinig-apò te tege Heti.