1 Nayan, ontò den temoay si Abraham, aw gayed mèpiya se imbegay te Timanem diyà kandin. 2 Minikagi si Abraham diyà te pengolo te menge sineligan din, sìyan egpengibing te kedakel te kedònan din, “Soli se belad nikaw diyà te salad te bobon ko amon ketegahan ko te tomanen no se ipunù ko kamno seini. 3 Ibeg ko megsapà ka pineokit te Timanem mig-inang te langit aw keneyonan. Pegpakang ka diyà kanak te eked no pemellii se bayi pengognanen te batà ko lekat te menge otaw eg-ogpà dini te Canaan. 4 Meneng keilangan lomikò ka doton te tanà tinebawan ko, aw pemellii se bayi lekat te menge kedomaan ko amon doen pengognanen te batà ko si Isaac.”

5 Meneng mig-insà se sineligan, “Megmeno a aw eked keibeg se bayi tomaking kanak aw molì a dini? Ibingen ko lay se batà no doton te tanà tinikedowan nikaw?”

6 Timaba si Abraham, “Ikà palos egpengibing te batà ko doton. 7 Kedengan, inikegiyan a te Timanem eg-ogpà doton te langit te keilangan mesayo a lekat te menge kedomaan te amay ko aw tanà tinebawan ko, aw ontò a din pinekangan te ibegay din se tanà seini diyà te menge bowad-bowad ko. Isogò te Timanem se anghil monà diyà kamno aw megtabang kamno amon mekeabat ka te bayi pengognanen te batà ko. 8 Meneng aw eked keibeg se bayi tomaking kamno, yan wedad keilangan te pegtoman no te pakang no seini. Meneng ikà palos egpengibing te batà ko doton.”

9 Penga niyan, insawol te sineligan se belad din diyà te salad te bobon te amo din si Abraham, aw migsapà sikandin te tomanen din se impunù i Abraham diyà kandin.

10 Penga niyan, nengabat se sineligan te sempolò kamilo te amo din, aw inlolan din se medita kemolò te mèpiya bowang ipeibing te amo din si Abraham. Nesayo sikandin aw dimoton te lonsod inogpaan te kedowa i Abraham si Nahor kidoen te Mesopotamya.

11 Pegdateng din doton, ontò den meapon, aw yan se oras te pegsalok te menge bayi. Minapit sikandin doton te sokian kidoen te lowà te lonsod, aw impeetod din se menge kamilo din kidoen. 12 Penga niyan, migtawal-tawal sikandin, “E Timanem egseligan te amo ko si Abraham, tebangi a den te aldaw seini amon metoman se pakang no diyà te amo ko si Abraham egkeidowan nikaw. 13 Na, dini a den te sokian seini selokan kwani te menge laga eg-ogpà dini. 14 Mikagi a kwani diyà te sebad bayi, ‘Peinemi a bag diyà te tibod nikaw.’ Aw tomaba sikandin, ‘Inem ka, aw somalok a heman te wayeg inemen te menge kamilo nikaw,’ mèpiya aw sikandin se bayi pinemallì no pengognanen i Isaac. Aw meinang iyan, ketegahan ko te netoman den se pakang no diyà te amo ko.”

15 Telobo pa sikandin migtawal-tawal, dimateng si Rebecca batà bayi i Betuel neniang te tibod. Kedowa i Abraham si Nahor se apò din meama, aw si Melca se apò din bayi. 16 Laga pa si Rebecca, aw ontò mèpiya se bawa din. Wedà palos sikandin leyoki te meama. Dimoton sikandin te sokian, aw simalok, aw limikò sikandin. 17 Mig-ayas se sineligan simongon kandin, aw minikagi sikandin, “Atà, peinemi a bag diyà te tibod nikaw.”

18 Minikagi se laga, “Sir, inem ka den.”

Ayas din insawol se tibod tiniang din, aw impeinem din sikandin. 19 Penga te peg-inem din, minikagi heman se laga, “Somalok a heman te wayeg inemen te menge kamilo nikaw lamig kebolongan se keleowan dan.”

20 Ayas din in-olà se wayeg doton te loboganan, aw kimagnan sikandin doton te sokian aw todà simalok lamig nebolongan se keleowan te kedita te kamilo din. 21 Wedà ikagi se sineligan, meneng timengteng olò sikandin diyà te terbaho te laga amon metaga-taga sikandin aw tinoman te Timanem se tod din.

22 Pegkebolong te keleowan te menge kamilo din, inokal te sineligan se aritis bolawan meelagà, aw insawol din iyan diyà te idong te bayi, aw intaklay din heman se dowa dedakel taklay bolawan diyà te bebenayen din. 23 Mig-insà sikandin, “Sinu lay se amay nikaw? Doen lay keombaan doton te balay din, amon midegà a sipat te menge doma otaw timaking kanak?”

24 Timaba se bayi, “Si Betuel se amay ko. Si Nahor se amay din aw si Melca se inay din.”

25 Minikagi heman se bayi, “Dakel se legami ibatan te kamilo nikaw aw dakel heman se kànen dan doton kenami, aw doen heman keombaan niyo aw midegà kaw.”

26 Penga niyan, limongken se sineligan, aw dimuyun sikandin te Timanem. 27 Minikagi sikandin, “Iduyun se Timanem egseligan te amo ko, so keseligan sikandin, aw tinoman din se pakang din diyà te amo ko. Yan inelladan a din amon mekepantek a doton te balay te menge kedomaan te amo ko.”

28 Kimagnan se bayi minolì, aw mig-indan sikandin diyà te inay din aw menge kedomaan din tepad kenyan. 29-30 Doen kedowa meama i Rebecca ngadan din si Laban. Pegkità i Laban te aritis aw taklay te etebay din, aw pegdineg din te kagi te etebay din tepad te inikagi te otaw dimateng, ayas sikandin simongon kandin doton te sokian.

Pegdateng i Laban doton te sokian, kidoen pa se sineligan i Abraham sipat te menge kamilo din. 31 Minikagi si Laban, “Mèpiya se imbegay te Timanem diyà kamno. Taking ka den kanak doton te balay ko. Ikà eg-ogpà dini, so doen tambì impetagad ko den kamno, aw doen heman kelokob te menge kamilo nikaw.”

32 Penga niyan, dimoton dan te balay, aw mig-awas dan te karga te menge kamilo, aw impekaen dan iyan. Inibing dan heman se wayeg ionaw te benis te sineligan i Abraham aw menge doma din. 33 Peglamak dan te kànen, minikagi se sineligan, “Eked a kaen singed aw meg-indan a kenyo tepad te tod ko dini.”

Minikagi si Laban, “Indani kay den.”

34 Minikagi sikandin, “Siak se sineligan i Abraham. 35 Ontò mèpiya se imbegay te Timanem diyà te amo ko, aw migkeyaman den sikandin. Binegayan sikandin te Timanem te medita karniro, kambing, baka, selapì, bolawan, allang, kamilo, aw asno. 36 Doen batà din meama timebaw diyà te esawa din si Sara te pegkelokes din. Batà din sìyan se binegayan i Abraham te kedakel te keyemanan din. 37 Impesapà a te amo ko te tomanen ko se impunù din kanak. Minikagi sikandin, ‘Keilangan eked no pemellii se bayi pengognanen te batà ko lekat te menge otaw eg-ogpà doton te Canaan. 38 Meneng keilangan lomikò ka doton te menge kedomaan ko, sìyan menge bowad-bowad te amay ko, aw pemellii se bayi doton kandan amon doen pengognanen te batà ko.’

39 “Penga niyan, mig-insà a kandin, ‘Megmeno a aw eked keibeg se bayi tomaking kanak aw molì a?’

40 “Timaba sikandin, ‘Doen anghil ipetaking kamno te Timanem gayed ko egtoloen, amon metoman se tod nikaw doton. Yan mekeabat ka te bayi pengognanen te batà ko doton te menge kedomaan ko, sìyan menge bowad-bowad te amay ko. 41 Meneng aw domoton ka te menge kedomaan ko aw eked dan penenalan kamno, aw temengan dan se bayi, yan wedad keilangan te pegtoman no te pakang no sìyan.’

42 “Nayan, pegdateng ko gina seini doton te sokian, migtawal-tawal a, ‘E Timanem egseligan te amo ko si Abraham, aw mepakay diyà kamno, tomani bag se tod ko dini. 43 Na, dini a den te sokian seini. Aw domini se laga amon somalok, aw mikagi a diyà kandin, “Peinemi a bag diyà te tibod nikaw,” 44 aw tomaba sikandin, “Inem ka, aw somalok a heman te wayeg inemen te menge kamilo nikaw,” mèpiya aw sikandin se bayi pinemallì no Timanem, amon doen pengognanen te batà te amo ko.’

45 “Telobo a pa migtawal-tawal, dimateng si Rebecca neniang te tibod din. Dimoton sikandin te sokian aw simalok, aw minikagi a diyà kandin, ‘Atà, peinemi a bag.’

46 “Ayas din insawol se tibod tiniang din, aw minikagi sikandin, ‘Inem ka den, aw somalok a heman te wayeg inemen te menge kamilo nikaw.’

“Yan mininem a, aw impeinem din heman se menge kamilo ko. 47 Mig-insà a diyà kandin aw sinu se amay din, aw minikagi sikandin, ‘Si Betuel se amay ko. Si Nahor se amay din, aw si Melca se inay din.’

“Penga niyan, insawol ko se aritis diyà te idong din, aw didowa taklay diyà te bebenayen din. 48 Limongken a aw migsimba a diyà te Timanem. Induyun ko se Timanem egseligan te amo ko si Abraham, so inelladan a din amon mekepantek a dini mengabat te apò bayi te kedowa te amo ko pengognanen te batà din meama. 49 Nayan, aw keidowan niyo se amo ko aw mèpiya se inangen niyo diyà kandin, ikagi kaw den kenyan diyà kanak. Meneng aw kenà, ikagi kaw den heman kenyan diyà kanak, amon metaga-taga a aw eden se inangen ko.”

50 Minikagi si Laban aw si Betuel, “Impetaga-taga den te Timanem se ibeg din. Eked day iyan todai. 51 Mepakay diyà kenami aw ibingen no si Rebecca amon pengognanen te batà te amo nikaw, iling te impetaga-taga den te Timanem kenitadon.”

52 Pegdineg te sineligan i Abraham te inikagi dan sìyan, limongken sikandin aw induyun din se Timanem. 53 Penga niyan, inokal din se menge bowang, menge penenaktun, aw selapì aw bolawan, aw imbegay din iyan diyà ki Rebecca. Doen heman menge meelagà imbowang din diyà te kedowa din aw inay din. 54 Penga niyan, kimaen sikandin sipat te menge doma otaw timaking kandin, aw minidegà dan kidoen.

Pegkeiselem niyan, minikagi se sineligan, “Ibeg ko, mesayo kay den amon molì a doton te amo ko.”

55 Meneng timaba se kedowa aw inay i Rebecca, “Mèpiya aw eked no pa sikandin ibingi singed aw menge sempolò pa se aldaw. Penga niyan, mepakay aw mesayo kaw.”

56 Meneng minikagi sikandin, “Ikà niyo eg-anggà kenami, so tinoman den te Timanem se tod ko dini. Ibeg ko, mesayo kay den amon molì a doton te amo ko.”

57 Minikagi dan, “Tewalen day si Rebecca, aw insaen day sikandin aw eden se ibeg din.”

58 Penga niyan, tinawal dan si Rebecca, aw mig-insà dan diyà kandin, “Meibeg ka lay tomaking kandin seini?”

Timaba sikandin, “Ee, tomaking a den kandin.”

59 Penga niyan, mepakay diyà kandan aw tomaking si Rebecca aw lokes tapay mig-ipat kandin. Impekesayo dan sipat te sineligan i Abraham aw menge doma din. 60 Te wedà dan pa kesayo, nemoyò se menge kedomaan i Rebecca te mèpiya se ibegay te Timanem kandin. Minikagi dan, “Etebay day, ibeg day meinang ka peden kemonaan te minelalan bowad-bowad nikaw. Ibeg day, mekedaeg peden se menge bowad-bowad no te lonsod te kedita te poon dan.”

61 Penga niyan, migtigmes si Rebecca aw menge doma bayi timaking kandin te karga ibingen dan, aw simakay dan te menge kamilo amon tomaking dan te sineligan i Abraham. Penga niyan, nesayo se kedita dan.

62 Nayan, mig-ogpà si Isaac doton te Negeb. Kaling sikandin minolì lekat te kebigtilan te Beer Lahai Roi. 63 Pegkemeapon, dimoton sikandin te pawà din amon megtawal-tawal sikandin, aw kinità din te doen menge otaw dimateng diyà kandin simakay te menge kamilo. 64 Pegkità i Rebecca kandin, kimahang sikandin lekat te kamilo 65 aw mig-insà sikandin diyà te sineligan, “Sinu lay se otaw doton te pawà sida simongon kenitadon?”

Timaba sikandin, “Amo ko sikandin.”

Penga niyan, sinempengan i Rebecca se bawa din amon segmanen din si Isaac.

66 Penga niyan, mig-indan se sineligan diyà ki Isaac tepad te kedita neinang diyà kandin. 67 Inibing i Isaac si Rebecca doton didalem te tolda tapay inogpaan te inay din si Sara. Pinengognan din si Rebecca, aw ontò dakel se pedowan i Isaac diyà kandin. Yan nesinalay si Isaac tepad te pegkematay te inay din.