1 Nayan, nesayo si Jesus lekat kidoen aw dimoton dipag te wayeg te Jordan taman te probinsya te Judiya. Medita heman se otaw netipon diyà kandin, aw migtoladà heman sikandin kandan, so yan se gayed din eg-inangen.

2 Doen menge Parisiyo nengemahà te kemalì diyà te pegtoladà i Jesus amon doen idimanda dan tepad kandin. Dimoton dan kandin aw minikagi dan, “Mepakay lay aw somibwan se otaw te esawa din?”

3 Timaba si Jesus, “Eden lay se impunù i Moises tepad te pegsibwan?”

4 Minikagi dan, “Migpunù si Moises te mepakay aw ibegay te meama se papil diyà te bayi tepad te pegsibwan din, aw penga niyan ipekesayo din.”

5 Meneng minikagi si Jesus, “Migpunù si Moises te mepakay aw somibwan kaw te esawa niyo, so netegahan din te ontò magsen se olo niyo. 6 Meneng gebii te peg-inang te Timanem te otaw, sebad olò se meama ininang din aw sebad olò heman se bayi. 7 Yan se doun te tomanan se meama te amay aw inay din, aw megsebad diyà te esawa din. 8 Se didowa dan meinang sebad. Yan kenà didowa se teleesawa, so neinang dan sebad. 9 Nayan, so ininang dan te Timanem sebad, eked kepakay aw ipesoway dan te otaw.”

10 Peg-olì i Jesus doton te balay, todà mig-insà se menge tinoledaan din tepad te pegpesibwanay. 11 Minikagi si Jesus, “Aw somibwan se meama te esawa din aw todà mengognan, mekelakad sikandin. 12 Aw somibwan se bayi te esawa din aw todà mengognan, mekelakad sikandin.”

13 Nayan, doen menge otaw nengibing te dedeitek mengisù doton ki Jesus amon pemàdan din dan aw megtawal-tawal te begayan dan te Timanem te mèpiya. Sinagda dan te menge tinoledaan din. 14 Meneng pegkità i Jesus kenyan, neopal sikandin aw minikagi, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan. 15 Eneng-enengi niyo se kagi ko kenyo seini. Aw eked salig se otaw diyà te Timanem iling te pegsalig te mengisù diyà te amay dan, eked sikandin sekopi te Timanem diyà te peglowan din.”

16 Penga niyan, inolid i Jesus se menge mengisù, aw nemaed sikandin kandan aw migtawal-tawal tepad kandan.

17 Nayan, pegkesayo i Jesus lekat kidoen, doen sebad otaw kimagnan doton kandin, aw limongken diyà kandin, aw mig-insà, kagi din, “Sir, ontò ka mèpiya otaw. Eden lay se keilangan inangen ko amon mekinawà ko se kaling pedowan wedad temanan?”

18 Minikagi si Jesus, “Nepela a so minikagi ka te mèpiya a otaw. Meneng wedad otaw ontò mèpiya, so olò Timanem se ontò mèpiya. 19 Netegahan no besi se menge punù ingkeliwat i Moises. Ikà egbonò. Ikà eglakad. Ikà egpenakaw. Ikà egkebolalaw tepad te doma otaw. Ikà eglegawa. Keilangan memasa ka te amay aw inay nikaw.”

20 Timaba se otaw sìyan, “Sir, gayed ko egtoloen se kedita niyan lekat te pegkebatà ko lamig seini.”

21 Timengteng si Jesus diyà kandin, aw dakel se pedowan din kandin. Minikagi sikandin, “Sebad mendad se keilangan inangen nikaw. Olì ka den aw beligyai se kedakel te kedònan no, aw begayi se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegpemegay no te kedakel niyan, likò ka dini aw taking ka kanak.”

22 Pegdineg din kenyan, timàmod sikandin aw nesayo te nepuluk se pedowan din, so ontò dakel se kedònan din.

23 Penga niyan, timengteng si Jesus diyà te menge tinoledaan din aw minikagi, “Ontò melima se pegpesakop te otaw meyaman diyà te peglowan te Timanem.”

24 Nepela se menge tinoledaan din tandà te inikagi din sìyan. Meneng minikagi heman si Jesus, “Ontò melima se pegpesakop te otaw diyà te peglowan te Timanem. 25 Pengkey ontò melima se peg-okit te ayam-ayam kamilo diyà te awang te dagem, meneng labi pa melima se pegpesakop te otaw meyaman diyà te peglowan te Timanem.”

26 Pegdineg dan kenyan, ontò dan nepela, aw minikagi dan, “Aw iling kenyan, wedad palos otaw mekelowà lekat te pelumun te Timanem.”

27 Meneng timengteng si Jesus diyà kandan aw minikagi, “Pengkey eked pekelowà se otaw lekat te pelumun te Timanem, meneng mebatog ipelowà te Timanem se otaw lekat te pelumun, so wedad palos eked kebatog te Timanem.”

28 Penga niyan, minikagi si Pedro, “Meneng sikami, tinenanan day den se kedakel amon tomaking kay kamno.”

29 Minikagi si Jesus, “Eneng-enengi niyo se kagi ko kenyo seini. Se otaw timanan den te kedònan din, aw kedowa din, aw amay din aw inay din, aw batà din, aw pawà din, amon tomaking kanak aw amon megtoladà te menge doma otaw tepad te Mèpiya Indan, 30 yan se metoman kominawà te ontong ginatos pa meelagà diyà te tinenanan din dalem te eked pa kematay. Pengkey egpemilangen sikandin, meneng metoman sikandin begayan te menge kedònan, aw kedowa, aw inay, aw batà, aw pawà, aw begayan heman sikandin te kaling pedowan wedad temanan te modi aldaw. 31 Meneng medita se otaw melangkaw songkani meinang ontò medanà doton te peglowan te Timanem. Medita heman se otaw medanà songkani, meneng meinang dan kwani melangkaw.”

32 Nayan, minipanaw si Jesus aw menge tinoledaan din pesalo doton te Jerusalem. Pegpesalo dan doton, minipanaw si Jesus diyà te monà dan. Nepela se menge tinoledaan din te ibeg din domoton te Jerusalem. Doen heman menge otaw timaking kandin nelemitan. Meneng migtipon si Jesus te sìyan sempolò teg dowa tinoledaan din, aw mig-indan diyà kandan aw eden se metoman domateng diyà kandin, 33 kagi din, “Na, domoton kidon den te Jerusalem. Penga niyan, siak Timanem Migpekeotaw se itolok, aw ibegay a diyà te belad te menge pengolo te simbahan aw menenoladà te punù ingkeliwat i Moises. Megsebad dan mikagi te keilangan imetayan a. Ibegay a dan heman diyà te belad te menge otaw kenà Judiyo. 34 Kebebeyatan a dan, aw teptepan a dan, aw bedasen a dan, aw penga niyan imetayan a dan. Penga te telo se aldaw, meantay a lekat te nematay.”

35 Penga niyan, dimoton ki Jesus se didowa batà i Sebedeo si Santiago aw si Juan. Minikagi dan, “Sir, ibeg day inangen no diyà kenami se pemoyoen day diyà kamno.”

36 Minikagi si Jesus, “Eden lay se ibeg niyo inangen ko diyà kenyo?”

37 Minikagi dan, “Aw megtebò ka lomowan, peonsadi kay bag diyà te tangkil nikaw, sebad lenged te kowanan, aw sebad lenged te bibang, amon segmanen kay heman doma nikaw.”

38 Meneng minikagi si Jesus, “Wedà niyo ketegahi aw eden se kebegat te pinemoyò niyo. Meketayod kaw lay heman te kelimahan agpet den domateng kanak? Meketayod kaw lay heman te kegemakan agpet den domateng kanak?”

39 Timaba dan, “Ee, meketayod kay heman kenyan.”

Minikagi si Jesus, “Metoman kaw heman detengan te kelimahan aw kegemakan domateng kanak, 40 meneng eked a pegpakang kenyo te sikiyo se meketangkil diyà kanak, so tomangkil diyà kanak se otaw tapay pinemallì.”

41 Pegdineg te sempolò tinoledaan aw eden se inikagi dan diyà ki Jesus, neopal dan diyà ki Santiago aw si Juan. 42 Meneng tinawal dan i Jesus aw minikagi sikandin, “Netegahan niyo den aw eden se eg-inangen te menge otaw eglowan. Gayed dan egleges te menge sakop dan. Gayed heman egsogò-sogò se menge melangkaw otaw te menge sakop dan. 43 Meneng eked kepakay aw meg-iling kaw kandan. Aw doen otaw diyà kenyo meibeg megkelangkaw, keilangan gayed sikandin menabang kenyo. 44 Aw doen otaw diyà kenyo meibeg megkelangkaw, keilangan megpedanà sikandin te kandin pegkeotawun iling te kedanà te allang. 45 Keilangan meg-iling sikandin kanak Timanem Migpekeotaw, so dimini a te tanà kenà amon tebangan a te otaw, meneng dimini a amon menabang a te otaw. Neketagad a den imetayan amon medita se otaw mekelowà lekat te pegkeallang dan diyà te salà.”

46 Nayan, minokit si Jesus aw menge tinoledaan din diyà te lonsod te Jeriko. Ontò medita se doma otaw timaking kandan. Pegkesayo dan lekat te Jeriko, doen otaw bota nenenoo doton te kilid te dalan, ngadan din si Bartimeo batà i Timeo. 47 Pegdineg din te si Jesus tege Nasarit se minokit kidoen, timawal sikandin, kagi din, “Jesus, bowad-bowad i David, keidowi a bag.”

48 Medita se otaw migpunù te keilangan mepenek sikandin. Meneng labi beling sikandin timawal, “Bowad-bowad i David, keidowi a bag.”

49 Pegdineg i Jesus te pegtawal din, simagked sikandin aw minikagi, “Pedinihi niyo sikandin.”

Penga niyan, minangay dan kandin, kagi dan, “Peseligi se pedowan nikaw. Tindeg ka den, so impeangay ka din.”

50 Penga niyan, ayas timindeg aw tinenanan din se kayab din, aw dimoton ki Jesus. 51 Pegdateng din doton, minikagi si Jesus, “Eden lay se ibeg no inangen ko kamno?”

Minikagi se otaw bota, “Sir, ibeg ko, todà a komità.”

52 Minikagi si Jesus, “Mepakay aw molì ka den. Negolian ka den so simalig ka diyà kanak.”

Pegketà, kimità sikandin, aw timaking ki Jesus.