1 Nayan, pegpesalo dan doton te Jerusalem, migpedapag dan kidoen te lonsod te Bitpahi aw Bitanya doton te ongan te bontod te Olibo. Insogò i Jesus se didowa tinoledaan din, 2 kagi din, “Onà kaw den doton te lonsod sida peselowan tadon. Aw domateng kaw doton, ketelaan niyo se nati te kodà. Iniketan iyan, meneng wedà iyan lumun kesekayi te otaw. Lebadi niyo, aw ibingi niyo dini. 3 Aw doen otaw meg-insà kenyo te nengà lay linebad niyo iyan, ikegihi niyo te keilangan sekayan iyan te Pengolo niyo, aw ipeolì din iyan te eked kenamay.”

4 Penga niyan, nesayo dan, aw netelaan dan se nati te kodà iniketan diyà te lelebangan te balay medapag te dalan. Penga niyan, linebad dan iyan. 5 Meneng mig-insà se menge otaw kidoen, “Nengà lay linebad niyo iyan?”

6 Yan mig-indan se didowa tinoledaan i Jesus tepad te insogò din kandan, aw penga niyan mepakay iyan diyà te tig-apò. 7 Penga niyan, inibing dan se nati doton ki Jesus. Menge saol dan se in-ampal dan diyà te getan te nati, aw simakay si Jesus kenyan. 8 Medita se otaw migladlad te saol dan doton te dalan peselowan din, aw sinagpì te menge doma otaw se menge pelapà te palmera aw insawol dan doton te dalan, so yan se ketanem dan aw segmanen dan se otaw meinang selotan. 9 Migpegais se kedita te otaw timaking ki Jesus, pengkey nekeonà aw timetondog. Migpegais dan, “Iduyun se Timanem. Iduyun se Pengolo tadon insogò din. 10 Iduyun se peglowan din iling te peglowan te kemonaan tadon gebii si David. Iduyun se Timanem.”

11 Pegdateng i Jesus doton te Jerusalem, dimoton sikandin te dakel simbahan kidoen. Pegtengteng din diyà te kedita, limikò sikandin doton te Bitanya sipat sìyan sempolò teg dowa tinoledaan din, so ontò den meapon.

12 Pegkeiselem niyan, minipanaw dan lekat te Bitanya pesalo doton te Jerusalem. Te wedà dan pa dateng doton, binallos si Jesus. 13 Kinità din se kayo igira te mediyò. Dimawen iyan, aw dimoton sikandin amon mahà te pongo niyan. Meneng pegdateng din doton, wedad palos pongo kinità din, olò menge dawen. Wedà pa dateng se aldaw te pegpongo din. 14 Minikagi sikandin diyà te kayo, “Eked den palos pongo se kayo seini.”

Dinineg te menge tinoledaan din se inikagi din sìyan.

15 Pegdateng i Jesus doton te Jerusalem, dimoton sikandin te dakel simbahan, aw impekadas din se kedita te otaw egpemeligyà aw egbayad kidoen te dowangen niyan. Impelias din se lemisa te menge otaw egliwan te kwarta, aw impelias din heman se bangkò te menge otaw egpemeligyà te selepati ibegay diyà te Timanem. 16 Sinagda din heman se kedita te otaw nengibing te kedònan dan minokit te dowangen te dakel simbahan. 17 Penga niyan, migtoladà sikandin, kagi din, “Doen kagi te Timanem impesolat din gebii,

18 Meneng doen menge pengolo te simbahan aw menenoladà te punù ingkeliwat i Moises dimineg te inikagi i Jesus. Penga niyan, miglalang dan te imetayan dan sikandin. Nelemitan dan ki Jesus, so ontò nepela se kedita te otaw tepad te intoladà din.

19 Pegsallep te aldaw sìyan, nesayo si Jesus aw menge tinoledaan din lekat te Jerusalem aw minolì dan.

20 Pegkeiselem niyan, te peglikò dan doton te Jerusalem, kinità dan se kayo igira nelanes den pengkey dalid. 21 Neeneng-enengan i Pedro aw eden se neinang, aw minikagi sikandin diyà ki Jesus, “Sir, tengtengi se kayo inikegiyan no gebenini nelanes den.”

22 Minikagi si Jesus, “Aw megtawal-tawal kaw diyà te Timanem, keilangan somalig kaw diyà kandin. 23 Eneng-enengi niyo se kagi ko kenyo seini. Aw mikagi se otaw diyà te bontod seini te meabat iyan aw mealin doton te dagat, aw kenà egdowa-dowa se pedowan din, meneng egpemenal te metoman se kagi din, metoman iyan meinang. 24 Yan mikagi a den diyà kenyo, aw megtawal-tawal kaw diyà te Timanem, keilangan memenal kaw te binegayan kaw din den te pinemoyò niyo, aw metoman kinewaen niyo iyan. 25 Aw megtawal-tawal kaw, aw doen salà ininang te doma otaw diyà kenyo wedà niyo pa pegwedadi, pegwedadi niyo iyan amon pegwedaden heman te Timanem se salà ininang niyo diyà kandin. [ 26 Meneng aw eked niyo pegwedadi se salà ininang te doma otaw diyà kenyo, eked heman pegwedadi te Timanem Amay se salà ininang niyo diyà kandin.]”

27 Pegdateng dan doton te Jerusalem, minipanaw si Jesus kidoen te dakel simbahan. Wedà kenamay, doen menge pengolo te simbahan aw menenoladà te punù aw menge obanen te Judiyo dimoton ki Jesus. 28 Mig-insà dan, “Nengà lay eg-inang ka te kedita nini? Sinu lay se simogò kamno?”

29 Minikagi si Jesus, “Doen heman insà ko kenyo. Aw meketaba kaw kani, meg-indan a kenyo aw sinu se simogò kanak. 30 Sinu lay se simogò ki Juan amon memonyag? Timanem lay, aw otaw se simogò kandin?”

31 Penga niyan, migpebelaw-belaway dan aw eden se itaba dan kandin. Minikagi dan, “Simpana tomaba kidon te Timanem se simogò ki Juan, silahen kidon din, so wedà kidon pemenal ki Juan. 32 Meneng eked kidon heman taba te olò otaw se simogò ki Juan.”

Eked dan ikagi te olò otaw se simogò ki Juan, so nelemitan dan aw keopalan dan te kedita te otaw netipon, so eg-aneng-aneng se kedita te otaw te ontò telekeliwat te kagi te Timanem si Juan. 33 Yan se doun te minikagi dan, “Inday. Wedà day ketegahi aw sinu.”

Minikagi si Jesus, “So wedà kaw taba te insà ko, eked a peg-indan kenyo aw sinu se simogò kanak.”