1 Penga niyan, doen sokoday iling te bangkà imbegay kanak. Doen simogò kanak, kagi din, “Tindeg ka, aw sokodi se dakel simbahan te Timanem, aw sonoganan niyan, aw bilangi se otaw egsimba kidoen. 2 Meneng ikà egsokod te dowangen kidoen te lowà niyan. Pebeyai iyan, so metoman iyan ibegay diyà te menge otaw kenà Judiyo. Meglompak dan te lonsod te Jerusalem taman te kepatan teg dowa se bolan. 3 Isogò ko doton se dowa otaw menaol te tila sako, so yan se pengilala te keilangan megselsel se menge otaw toledaan dan. Meg-indan dan te kebenalan, aw megkeliwat dan te kagi ko taman te sebad melalan dowa gatos keneman se aldaw.”

4 Sìyan dowa otaw isogò din, yan se tinedoan te tegdeyanan gebii tepad te dowa kayo olibo. Tinedoan dan heman te tegdeyanan tepad te dowa solò te Pengolo tadon eglowan diyà te kedita te otaw. 5 Aw doen otaw meibeg megpeeleg kandan, doen apoy lomowà lekat te bahà dan amon pegbàtan se poon dan. Pineokit kenyan, imetayan dan se kedita te otaw meibeg megpeeleg kandan. 6 Doen tolos ibegay kandan amon kebelebagan dan se labon amon eked odan dalem te kedita te aldaw te pegkeliwat dan te kagi te Timanem. Doen heman tolos ibegay kandan amon meinang dipanog se wayeg te baog. Doen heman tolos ibegay kandan amon megpeeleg dan te kedita te otaw te keneyonan pineokit te kedita te kededàtan pengkey kano se ibeg dan. 7 Aw mepenga dan meg-indan te kebenalan, bolawen dan te menenanap mebolot lomowà lekat te awang diyà te tanà wedad temanan te kedalem. Dàgen se didowa dan te menenanap mebolot, aw imetayan din dan. 8 Penga niyan, isawol se lawa dan nematay kidoen te kersada te lonsod nedengeg nemetayan te Pengolo dan inlansang diyà te kros. Kidoen te tegdeyanan tepad te lonsod sìyan, iningedanan iyan Sodoma aw Ehipto. 9 Domoton se medita otaw lekat te kedita te pongan, aw kagi, aw ogpeanan amon tomengteng dan te lawa dan nematay taman te telo se aldaw aw tengà. Eked dan lebengi. 10 Ontò meluba se kedita te otaw te keneyonan tandà te pegkematay te didowa dan. Yan se doun te megpista dan, aw megpebegayay dan heman te bowang, so nematay den se didowa telekeliwat, sìyan tapay nemegay kandan te lidò te pedowan dan. 11 Meneng penga te telo se aldaw aw tengà, inantay dan te Timanem lekat te nematay, aw minenaw dan. Yan ontò nelemitan se kedita te otaw kimità kandan. 12 Penga niyan, doen dinineg dan minikagi lekat te langit, kagi din, “Diyà kaw den te langit.”

Penga niyan, neengat dan tinekingan te labon, aw kinità iyan te kedita te poon dan. 13 Penga niyan, doen ontò magsen linog, aw nebàtan se ikesempolò ketengà te balay te lonsod sìyan. Pito melalan heman se otaw negelà te linog. Ontò nelemitan se otaw nesamà, aw induyun dan se kelangkaw te Timanem eg-ogpà kidoen te langit.

14 Nepenga den se ikedowa puluk, meneng doen pa iketelo puluk domateng te eked kenamay.

15 Penga niyan, mig-edop se ikepito anghil te bodyong din, aw doen medita dinineg ko kidoen te langit aw ontò dakel se kagi dan, “Se kedita te otaw te keneyonan nesakop den te peglowan te Pengolo tadon aw peglowan te Misiyas pinemallì din. Lomowan sikandin te wedad temanan.”

16 Penga niyan, limongken se kedita te kelowan teg epat obanen egpenenoo medapag te onsedanan te Timanem, aw migsimba dan kandin. 17 Minikagi dan, “E Pengolo day Timanem eglowan diyà te kedita te otaw. Doen ka gebii, aw doen ka seini. Egpesiontong kay kamno, so impekità no den te ontò ka metolos, aw migtebò ka den te peglowan no kidoen te keneyonan. 18 Pengkey neopal se menge poon no, meneng dimateng den se aldaw te pegpelumun no kandan, aw aldaw te peg-okom no te otaw nematay den. Dimateng den se aldaw te memegay ka te ontong diyà te kedita te otaw timolò kamno, diyà te telekeliwat te kagi nikaw, aw diyà te kedita te sakop nikaw, pengkey sagkep dan aw melangkaw, diyà te kedita te otaw egsagman kamno. Dimateng den heman se aldaw te pegbàtan no se kedita dan migbaet te keneyonan.”

19 Penga niyan, neowang se dakel simbahan te Timanem kidoen te langit, aw kinità se kaban sinolan te pakang te Timanem insolat gebii. Migkilem, aw dimaging, aw migkilat, aw miglinog, aw nedagdag heman se dedakel odan netikbolò aw megenaw.