1 Penga niyan, doen dakel ledyawan kinità ko kidoen te langit. Kinità ko se bayi migdagom te aldaw, aw doen bolan kidoen te salad te benis din, aw doen korona insangkob din diyà te olo din ininang te sempolò teg dowa bitoen. 2 Mebedes sikandin, aw migpuypuy tandà te kesakit, so agpet den tebawan.

3 Penga niyan, doen doma ledyawan kinità ko kidoen te langit. Doen dakel nagan melalag kinità ko. Doen pito olo din aw sempolò se seka, aw doen korona insangkob kidoen te teg sebad-sebad olo din. 4 Pineokit te ikog din, ineblas din se iketelo ketengà te bitoen lekat te langit, aw in-agbel din iyan diyà te tanà. Penga niyan, mig-ogpà se nagan medapag te bayi agpet den tebawan amon kànen din se batà aw tomebaw. 5 Penga niyan, doen batà meama timebaw, aw sikandin se lomowan diyà te kedita te otaw te keneyonan, aw keilangan tomolò se kedita dan kandin. Meneng wedà kàni te nagan se batà sìyan, so sinagmit te Timanem aw inibing din doton te onsedanan din te peglowan kidoen te langit. 6 Penga niyan, kimadas se bayi doton te kebigtilan, so doen ogpeanan integilan te Timanem kidoen amon ipaten din se bayi taman te sebad melalan dowa gatos keneman se aldaw.

7 Penga niyan, doen gira kidoen te langit. Si Miguel se nengibing te menge doma anghil, aw migbolaw dan te nagan. Minato se nagan aw menge anghil din, 8 meneng dinaeg dan, aw impekadas dan lekat te langit. 9 Yan indagdag se dakel nagan lekat te langit. Sikandin se migpelingo-lingo memokan gebii, aw iningedanan ki Satanas, aw biyasa sikandin eg-akal te kedita te otaw te keneyonan. Indagdag sikandin lekat te langit kidoen te tanà sipat kedita te anghil din.

10 Penga niyan, doen dinineg ko timawal kidoen te langit te dakel se kagi din, “Netoman den se pegpelowà te Timanem te kedita te otaw. Impekità den te Timanem te metolos sikandin. Migtebò den se peglowan din, aw insawol din den se Misiyas amon lomowan, so indagdag din den si Satanas, sìyan gayed egpoon te menge kedowa tadon egpemenal aw egdimanda kandan diyà te Timanem te aldaw aw delem. 11 Meneng dinaeg dan sikandin pineokit te dipanog te Karniro inimetayan doton te kros, aw pineokit te peg-indan te kebenalan tepad ki Cristo, so wedà dan kelemitan pengkey imetayan dan tandà te pegsalig dan diyà ki Cristo. 12 Yan keilangan meluba kaw tege langit aw kedita niyo eg-ogpà kidoen te langit. Meneng mekelelayò kaw tege tanà aw tege dagat, so dimateng den si Satanas kenyo. Ontò sikandin neopal, so netegahan din te detengan sikandin te pelumun te eked kenamay.”

13 Peg-aneng-aneng te nagan te indagdag sikandin lekat te langit kidoen te tanà, pig-alaw din se bayi tinebawan te meama. 14 Meneng doen dowa pakpak te banog imbegay te Timanem kandin amon mekelayang sikandin doton te kebigtilan amon eked kesàbi te nagan. Ipaten sikandin te Timanem kidoen taman te telo se omay aw tengà. 15 Pengkey impelowà te nagan se dakel wayeg lekat te bahà din amon enoden din, 16 meneng netebangan se bayi te tanà, so neewangan se tanà aw nekeawop kidoen se dakel wayeg impelowà te nagan lekat te bahà din. 17 Yan se doun te ontò neopal se nagan diyà te bayi, aw limikò amon megbolaw te menge doma batà din, diyà te kedita dan egtolò te punù te Timanem aw eg-indan te kebenalan tepad ki Jesus.

18 Penga niyan, mig-ogpà se nagan diyà te enay kidoen te dagat.