1 Midhendiyà si David te ki Abimelec he memumuhat diyà te Nob. Migkerker si Abimelec te kegkahandek te neehè din si David. Migkeǥiyan din te, “Maan is edhipanew ka te wazè nu zuma?” 2 Midtavak si David te, “Duen ku kayi tuyù he insuǥù te hadì, ne migkeǥiyan e zin te kenè ku kun egkeǥiyen diyà te minsan hentei is mehitenged kayi te insuǥù din. Ne mehitenged te menge sakup ku, ne migkeǥiyan ku sikandan he ebpekedtetelavuk key zà diyà te sevaha he lugar. 3 Guntaan, hengkey is egkekaan nu kayi? Beǥayi a te lelima he supas wey minsan hengkey en.” 4 Midtavak kes memumuhat te, “Wazè ku urdinaryu he supas, piru duen kayi supas he impemuhat. Ibeǥey ku heini emun sikew wey is menge sakup nu wazà mekepekidhulid te vahi te heini he menge andew.” 5 Midtavak si David te, “Kenè key ebpekidhulid te vahi emun duen tuyù dey. Minsan kenà utew impurtanti is ebeyaan dey ne ed-uraman dey is meremerik, lavi en be ǥuntaan he utew impurtanti is tuyù dey.” 6 Umbe, minsan te wazà urdinaryu he supas, imbeǥey te memumuhat kandin kes supas he ibpemuhat diyà te etuvangan te Megbevayà, he ziyà kuwaa te segradu he lemisa ne midliwanan te veǥu he supas.

7 Neserengà te haazà he andew ne ziyà is suluǥuen ni Saul he si Doeg he Edomanhen. Iyan sikandin pengulu te ebantey te menge uyaǥen ni Saul. Diyà sikandin su zuen din sulunuzen para te Nengazen.

8 Mid-insaan ni David si Ahimelec te, “Duen be ispada nu wey ke bangkew vè? Wazà a mekeuwit te ispada ku wey minsan hengkey he gumaan tenged te utew epiki is suǥù te hadì.” 9 Midtavak kes memumuhat te, “Kayi zed kes ispada ni Goliat kes Filistihanen, he midhimetayan nu ziyà te menge Suǥud he Elah. Mibukusan heini te manggad ne ziyà itaǥù te zivaluy te ipud. Kuwaa nu emun egkesuatan nu su wazè en duma pa he gumaan kayi.” Migkaǥi si David te, “Iveǥey nu heeyan kedì. Wazè en ispada he iring keniyan.”

10 Ne mibpeleǥuyan ni David si Saul ne midhendiyà te ki Hadì Akish he hadì te Gat. 11 Migkaǥi is menge sineriǥan ni Akish kandin te, “Kenè be si David man heini is hadì diyà te lugar zin? Kenè be iyan sikandin kes egkevantug te menge vahi zutun te ebpemenayew sikandan wey ebpemenganta te, ‘Tignengkelibu is nepatey ni Saul, piru is ki David mulà tigsepulù he libu’?”

12 Wazà maawà diyà te isip ni David is migkaǥi zan, ne nahandek sikandin ki Hadì Akish he hadì te Gat. 13 Umbe, uvag kun ebuneǥen si David te kemula pa sikandin diyà te Gat. Mibpenuristurisan din is gemawan te inged, ne edseyayat is ngingi zin he ibpetiǥis din te sumpè din. 14 Ne zutun migkeǥiyan ni Akish is menge sineriǥan din te, “Ahaa niw! Buneg heeyan he etew! Maan is mid-uwit niw sikandin kayi te kedì? 15 Mezakel en kayi he menge vuneg, maan is mid-uwit niw pa sikandin kayi te valey ku ne kenà meupiya is ebeelan din kayì te etuvangan ku?”