1 Mid-awà si David diyà te Gat ne midhendiyà te surung te Adulam. Ne hein netuenan te menge suled din wey te zuma pa he sakup te pemilya zin, ne midhendiyè dan te kandin su edtampu zan kandin. 2 Duen daan menge etew he miduma kandin he egkengaayuayu, wey menge utangan, wey kes menge etew he wazà mekuntintu te kebpekesavuk dan. Menge 400 he menge etew is miduma ki David, ne sikandin is nehimu he pengulu zan. 3 Puun dutun ne midhendiyà si David te Mizpa he sakup te Moab ne migkeǥiyan din is hadì te Moab te, “Edtuǥutan nu vuwa is menge ginikanan ku he ebpekeubpè dan pa kayi teǥaad te egketuenan ku ke hengkey is ebeelan te Megbevayà para kedì?” 4 Mibpemineg kes hadì, ne intaǥak ni David is menge ginikanan din dutun te hadì te Moab ne ziyà mulà sikandin te melig-en he elesà.

5 Sevaha zutun he andew migkeǥiyan te ebpeneuven he si Gad si David te, “Kenè ka pekeuǥet kayi te elesè nu. Hendiyè ka te Juda.” Ne migenat si David ne midhendiyà te ketelunan te Heret.

6 Haazà he andew nezineg ni Saul he zuen nekaahà ki David wey menge sakup din. Dutun ebpimpinuu si Saul te sihung te kayu he tamariska, diyà te vuntud te Gibea. Egewazan din is bangkew zin, ne midlingutan sikandin te langun he menge upisyal zin. 7 Migkeǥiyan ni Saul sikandan te, “Pemineg kew is menge tig-Benjamin! Kenè be mibpenengduan kew ni David he ebeǥayan kew zin langun te vevesukà wey menge pemuleey niw te paras? Mibpenengduan kew zin pa te edhimuwen kew zin pudu he menge peremandar te menge sundaru? 8 Tenged be keniyan mibpelanu kew te mezaat kayi te kedì is langun? Wazà midtazem kedì he is anak ku ne zuen upakat dan ki David. Wazè niw hizu kedì. Su wazà minsan sevaha he midtazem kedì he is anak ku mibaghet din is suluǥuen ku he si David te kidhimatey kedì he iyan tinguhè din guntaan.”

9 Sevaha te ebpemenhitindeg dutun duma te menge upisyal ni Saul iyan si Doeg he Edomanhen. Migkaǥi sikandin diyà te ki Saul te, “Hein diyà a te Nob, neehè ku si David is midhendiyà te ki Ahimelec he anak ni Ahitub. 10 Mid-insaan ni Ahimelec is Nengazen ke hengkey is ebeelan ni David, ne mibeǥayan din pa te keenen si David wey zuen te ispada ni Goliat he Filistihanen.”

11 Dutun mibpeveyaan ni Saul kes memumuhat he si Ahimelec he anak ni Ahitub, wey is tivuuk he pemilya zin he menge memumuhat diyà te Nob. Ne midhendiyè dan pudu te ki Saul. 12 Hein nekeuma zan, migkaǥi si Saul te, “Pemineg ka, Ahimelec!” Midtavak te, “Uya, Mahal he Hadì.” 13 Migkeǥiyan ni Saul sikandin te, “Maan is duen planu niw ki David he mezaat he ebpekesuǥat kedì? Impekaan nu pa wey mibeǥayan nu te ispada, ne mid-insaan nu pa is Megbevayà para kandin. Guntaan egkuntedahan e zin duen din pa ganì planu te kedhimatey kedì.” 14 Midtavak si Ahimelec te hadì te, “Kenà heeyan egkehitavù! Su si David mekaamung nu, ne iyan pa sikandin suluǥuen nu he metinumanen, iyan pa sikandin egalen te menge vantey nu ne utew sikandin edtehuza te pemilya nu. 15 Uya, mid-insaan ku is Megbevayà mehitenged kandin, kenà guntaan pa, kekenà, duen te nehuna pa. Piru edhangyù a kenikew he kenà a kenikew isumbung wey is tivuuk he pemilya ku, su wazè ku metueni heini he menge hitavù.” 16 Piru migkaǥi is hadì te, “Edhimetayan ku sikew, Ahimelec, wey is tivuuk he pemilya nu.”

17 Dutun midsuǥù ni Saul is menge vantey zin dutun te zurug din te, “Penhimetayi niw is menge memumuhat te Nengazen su ziyè dan edapig te ki David. Netuenan dan he mibpelaǥuy si David ne wazè dan tudtula kedì.” Piru wazà mebpezumazuma kes menge upisyal te hadì he edhimetayan is menge memumuhat te Nengazen. 18 Ne zutun midsuǥù te hadì si Doeg he Edomanhen he iyan ibpepenhimatey te menge memumuhat, ne mibpenhimetayan dan ni Doeg. Te haazè dà he andew ne 85 he menge memumuhat is mibpenhimetayan ni Doeg. 19 Mibpenhimetayan daan ni Saul is langun he mid-ubpà diyà te Nob, kes inged te menge memumuhat: menge maama, menge vahi, menge vatà, wey is kemulu pa edsusu, apil is menge vaka, asnu, wey menge kerehidu. 20 Piru nekepelaǥuy mulà si Abiatar he anak ni Ahimelec ne miduma ki David. 21 Midtudtulan din si David te mibpepenhimetayan ni Saul is menge memumuhat te Nengazen. 22 Migkeǥiyan ni David si Abiatar te, “Hein neehè ku si Doeg he midhendiyà te ki Ahimelec, netuenan ku he ebpenudtul ziyà te ki Saul. Umbe televaken ku is kegkepetaya te tivuuk he pemilya nu. 23 Kayi ke zà te kedì, su sevaha zà is egkesuat he ebpehimatey kenikew wey kediey. Kenè ka mahandek; wazà mezaat he egkeulaula kenikew emun kayi ka te kedì.”