1 Impaamur-amur ni Moises is langun he menge kevuwazan ni Israel ne migkeǥiyan din te, “Sikiyu is menge Israilihanen, pemineǥa niw is menge suǥù wey menge sulunuzen he ibeǥey ku keniyu ǥuntaan. Istudyuwi niw heini ne sunuza niw. 2 Is Nengazen he Megbevayè tew midhimu te kebpekid-uyun din kenitew hein diyè kiw te Horeb. 3 Wazè din heini himuwa ziyà te menge kepuun tew, kekenà, diyà te kenitew te langun he uuyag pa ǥuntaan. 4 Dutun te vuntud mibpekidlalag is Nengazen keniyu he ziyà ebpuun is laǥeng din te hapuy ne zutun henduen be te ziyè en sikandin te etuvangan niw. 5 Ne zutun midhitindeg a ziyà te pid-elangan niw te Nengazen te kegkaǥi te menge lalag te Nengazen diyà te keniyu, su nahandek kew zuen te hapuy ne kenè kew ebpeketekezeg duen te vuntud. Migkaǥi is Nengazen te,

6 “ ‘Iyan a Nengazen he Megbevayè niw, iyan a mibpeǥawas keniyu ziyà te Ehipto he zutun kew uripena.

7 “ ‘Kenè kew med-azap te zuma he ed-ezapen gawas kedì.

8 “ ‘Kenè kew mebaal te ed-ezapen he ledawan te minsan hengkey he ziyà te langit, wey minsan hengkey he kayi te tanà, wey ziyà te wahig. 9 Kenè kew mebpenilbi wey med-azap kayi; su siak, is Nengazen, iyan a Megbevayè niw, ne kenà a egkesuat he zuen pa zuma he ed-ezapen niw. Edsilutan ku is menge nekesalà kedì, apil en is menge kevuwazan dan taman te iketelu wey ikeepat he lapis te kevuwazan dan he midselikwey kedì. 10 Piru ibpeehè ku is keupiya ku ziyà te mahabet he lapis te kevuwazan he ebmahal kedì wey edtuman te menge suǥù ku.

11 “ ‘Kenè niw ǥemita is ngazan ku te wazè din pulus su siak, is Nengazen he Megbevayè niw, edsilut te minsan hentei he egamit te ngazan ku te wazè din pulus.

12 “ ‘Tumana niw is ebpeveelan ku zutun te Andew te Kedhimeley, ne isipa niw haazà he segradu he andew para kediey te Nengazen he Megbevayè niw, sumalà is insuǥù ku keniyu. 13 Terebahu kew seled te heenem he andew, 14 piru is ikepitu he andew, iyan Andew te Kedhimeley, ipehinungud niw heeyan he andew kedì te Nengazen he Megbevayè niw. Dutun he andew ne kenè kew medterebahu te minsan hengkey. Kinahanglan daan he kenà medterebahu is menge anak niw, menge suluǥuen niw, minsan is kenà menge Israilihanen he mid-ubpà diyà te inged niw. Kenè niw zaan iterebahu is menge vaka niw, menge asnu niw, wey zuma pa he menge uyaǥen niw. Pinaaǥi kayi ebpekehimeley zaan is menge uripen niw iring keniyu. 15 Tentenuzi niw he menge uripen kew zaan dengan diyà te Ehipto, ne iyan a, is Nengazen he Megbevayè niw, mibpeǥawas keniyu ziyà pinaaǥi te zekelà he ǥehem ku. Umbe tumana niw is ebpeveelan ku zutun te Andew te Kedhimeley, su iyan a is Nengazen he Megbevayè niw midsuǥù keniyu.

16 “ ‘Tehuza niw is amey niw wey iney niw, sumalà te insuǥù ku keniyu, su para luǥeyazi kew te untung wey para mebmeupiya is kebpekesavuk niw zuen te tanà he ibeǥey ku keniyu.

17 “ ‘Kenè kew mebunù.

18 “ ‘Kenè kew mebpengumpadi.

19 “ ‘Kenè kew mebpenakew.

20 “ ‘Kenè kew medtarùtarù diyà te hukmanan te kedezaat te zuma niw he etew.

21 “ ‘Kenè niw meimahi is esawa te zuma niw, etawa valey, tanà, menge suluǥuen, menge uyaǥen dan, wey minsan hengkey he ǥaked dan.’

22 “Iyan heeyan insuǥù te Nengazen keniyu te langun he netiǥum diyà te vuntud. Hein mibpekezaǥing sikandin is egkaǥi he ebpuun is laǥeng din duen te teliwazà te hapuy he nevukusan te mekepal he ǥapun, imbeǥey zin heini he menge suǥù ne wazè en duma he migkaǥi zin. Insurat din heini ziyà te zezuwa he midlumpipì he vatu ne imbeǥey zin kayi te kediey.

23 “Hein nezineg niw is laǥeng he ebpuun duen te merusirem hein edriyubriyub te regreg sikan is buntud, mid-uvey kayi te kedì is langun he menge pengulu te menge tribu niw wey is ebpemendumala keniyu, 24 ne ke sikandan te, ‘Impaahà kenitew te Nengazen he Megbevayè tew is mekeǥeǥehem he kebpekiduma zin kenitew wey is dengeg din, ne nezineg tew is laǥeng din he ebpuun te hapuy. Ne neseksiyan tew ǥuntaan he egkeuyag ded bes is etew minsan ebpekidlalag kandin is Megbevayà. 25 Piru kenè key egkesuat he ebpemiligru. Su emun egkeuman dey egkezineg is laǥeng te Nengazen he Megbevayè tew, ne siguradu egkeepur key keniyan te mekeǥeǥehem he hapuy. 26 Duen be etew he egkeuyag minsan nezineg din is laǥeng te uuyag he Megbevayà he ebpuun te hapuy iring te nezineg tew? 27 Iyan ke zà uvey ziyà te Nengazen he Megbevayè tew ne pemineǥa nu is langun he egkeǥiyen din. Ne tudtula nu ziyà te kenami is langun he egkeǥiyen din, su ebpemineǥen dey wey edtumanen dey heini.’

28 “Ne nezineg te Nengazen haazà is migkaǥi niw zutun te kebpekidlalag niw kedì, ne migkaǥi sikandin kayi te kedì te, ‘Nezineg ku is migkaǥi kayi te menge etew ziyà te kenikew, ne meupiya is langun he migkaǥi zan. 29 Ne zeyzey ke layun dan edtahud kedì wey edtumanen dan is menge suǥù ku su para mebmeupiya is kebpekesavuk dan wey te menge kevuwazan dan te taman te taman. 30 Beyai nu sikandan ne keǥiyi nu he medlikù dan en diyà te menge tulda zan. 31 Ne petaǥak ka kayi te kediey su para ikeveǥey ku kenikew is langun he suǥù wey menge sulunuzen he igkepenurù nu kandan he sunuza zan te ked-ubpè dan duen te tanà he ibeǥey ku kandan para maangken dan.’

32 “Umbe purungi niw te edtuman is inmandù te Nengazen he Megbevayè niw keniyu. Kenè niw supaka is minsan sevaha zà duen te menge suǥù din. 33 Pengungubpaan kew he sungkad te insuǥù te Nengazen he Megbevayè niw keniyu, su para edluǥeyazan kew te untung wey mebmeuswaǥen kew zuen te tanà he ed-engkenen niw.