1 “Iyan heini menge suǥù wey menge sulunuzen he imbeǥey kedì te Nengazen he Megbevayè niw su wey ikepenurù diyà te keniyu. Tumana niw heini zutun te ked-ubpè niw zuen te tanà he ed-engkenen niw he ziyà layun te Jordan, 2 su wey sikiyu wey is menge anak niw wey is menge apù niw, medtahud te Nengazen he Megbevayè niw zutun te kebpengungubpaan niw. Emun edtumanen niw is langun he menge suǥù din wey is menge sulunuzen he imbeǥey ku keniyu, ne edluǥeyazan kew te untung. 3 Pemineg kew, is menge etew te Israel, ne purungi niw tumana is menge suǥù din su wey mebmeupiya is kebpekesavuk niw wey para mepurung kew mevuwad duen te meupiya he tanà wey uuzaran, sumalà is impenaad keniyu te Nengazen he Megbevayà te menge kepuun niw.

4 “Pemineg kew is menge etew te Israel: Is Nengazen he Megbevayè tew iyan dà Nengazen. 5 Mahala niw is Nengazen he Megbevayè niw ziyà te tivuuk he ǥehinawa niw, kedsavut niw, wey te tivuuk he zesen niw. 6 Kenè niw lipati heini is menge suǥù he imbeǥey ku keniyu ǥuntaan. 7 Layun niw heini ipenurù te menge anak niw. Ilalag niw heini kandan ke ziyè kew te valey wey ke edhipanew kew, ke edhizeǥà kew wey ke ed-enew kew. 8 Bevekelew kew wey tutubew kew te edsuratan kayi su para kenè niw heini melipati. 9 Isurat niw ziyà te marku te ǥemawan te menge valey niw wey marku te pultahan te menge inged niw.

10 “Ed-uwiten kew en te Nengazen he Megbevayè niw zutun te tanà he impenaad din he ibeǥey zin diyà te menge kepuun niw he si Abraham, si Isaac, wey si Jacob. Heini he tanà, duen dezekelà wey meuswaǥen he menge inged duen he kenè kew iyan mibangun duen. 11 Duen kayi menge valey he nepenù te meupiya he menge vutang he wazè kew iyan medhaǥù duen, duen kayi menge teheb he kenè kew iyan migkalut duen, duen kayi menge pemuleey te paras wey menge kayu he ulibu he kenè kew iyan nemula zuen. Umbe emun ebpekekaan kew en wey egkengahantey, 12 mebpekevantey kew he kenè niw melipati is Nengazen he iyan mibpeǥawas keniyu ziyà te Ehipto he zutun kew uripena.

13 “Tehuza niw is Nengazen he Megbevayè niw; iyan niw zà sikandin silbiyi, ne ngazan din dà is gemita niw emun ebpenangdù kew. 14 Kenè kew medsunud te zuma he menge ed-ezapen, he menge ed-ezapen te menge etew he nekeelingkus keniyu; 15 su is Nengazen he Megbevayè niw he miduma keniyu, kenà egkesuat he ed-azap kew te zuma. Emun ed-azap kew te menge ed-ezapen te zuma he menge etew ibpeǥezaman keniyu te Nengazen is pauk din ne edezeetan kew zin kayi te tanà. 16 Kenè niw ǥezami is Nengazen he Megbevayè niw iring te mibeelan niw ziyà te Masa. 17 Purungi niw tumana is menge suǥù, menge penurù, wey menge sulunuzen he imbeǥey keniyu te Nengazen he Megbevayè niw. 18 Beeli niw is mid-isip te Nengazen he hustu wey meupiya su para mebmeupiya is kebpekesavuk niw ne egkaangken niw sikan is meupiya he tanà he impenangdù din diyà te menge kepuun niw. 19 Ibpesegseg din keniyu is langun he menge kuntada niw su iyan heeyan migkaǥi zin.

20 “Dutun te huziyan he timpu, emun ed-insà diyà te keniyu is menge anak niw ke, ‘Hengkey is ibpesavut te menge penurù, menge sulunuzen, wey menge kesuǥuan he inmandù keniyu te Nengazen he Megbevayè tew?’ 21 Keǥiyi niw sikandan te, ‘Menge uripen key zengan te hadì te Ehipto, piru impeǥawas key ziyà te Nengazen pinaaǥi te zekelà he ǥehem din. 22 Neehè dey en is menge vaal zin he utew egkengein-inuwi zuen te kedsiluti zin te menge etew ziyà te Ehipto, ragkes en is hadì dan wey is tivuuk he pemilya zin. 23 Ne impeǥawas key zin diyà te Ehipto su para meuwit key zin kayi te tanà he impenangdù din diyà te menge kepuun tew. 24 Midsuǥù key te Nengazen he tumana zey heini is langun he menge sulunuzen wey tehuza zey sikandin is Megbevayè tew, para layun key med-uswag wey para luǥeyazi key te untung iring kayi te neula-ule en guntaan. 25 Ne emun ebpurungan tew te edtuman heini is langun he suǥù te Nengazen he Megbevayè tew, sumalà te inmandù din kenitew, ne egkehimu kiw he metazeng diyà te etuvangan din.’