1  Nengazen, egkanta a mehitenged te ǥaǥew nu wey hustu he kukuman.

Egkanta a te menge idalig kenikew.

2 Ebpekevantey a para wazà igkesawey kedì.

Keenu ke man edhendini te kediey?

Ebpekevantey a para wazà igkesawey kedì kayi te ed-ubpaan ku.

3 Ne kenè ku ebpesegdanen is kebpedayun te kelelalung.

Utew ku igkeepes is menge ulaula te menge etew he ed-iniyug te Megbevayà,

ne kenè ku ebeelan is iring keniyan.

4 Edlikayan ku is menge etew he kulived;

ne kenà a edtampu te kelelalung dan.

5 Edèdeetan ku is minsan hentei he ebpendezaat te zengeg te zuma zin pinaaǥi te menge lalag din.

Kenè ku ebey-anan is kelelalung te menge gelbuwen wey mepelevawen.

6 Piru ibpeehè ku is keupiya ku ziyà te menge etew kayi te kenitew he menge metinumanen he edsunud te Megbevayà wey nengungubpaan he wazà igkesawey kandan.

Ibpeubpè ku sikandan duma kedì ne edtuǥutan ku he ebpenilbi kedì.

7 Is menge etew he limbungan wey teruen ne kenà ebpekeubpà diyà te turuǥan ku.

8 Kada andew edèdeetan ku is lalung he menge etew kayi te kenitew.

Ibpaawè ku sikandan kayi te inged te Nengazen.