1  Nengazen, pemineǥa nu is ampù ku.

Pemineǥa nu en is kebuyù ku te tavang diyà te kenikew.

2 Kenà a kenikew elesi zutun te timpu te kelised ku.

Pemineǥa a emun ebpengumew a kenikew,

ne segugunà a tevaka.

3 Su is untung ku meǥaan dà egkaawà iring te evel;

is lawa ku ne henduen be te edtutungen.

4 Henduen ad te sagbet he neǥangu su migkires ad.

Ne naawè en is gana ku te kegkaan

5 tenged te egkeǥezam ku ebpekezag-es a.

Henduen be te tulan e zà wey lundis.

6 Sebsevaha ku zà, henduen a te seǥuksuk diyà te sibsivayan.

Henduen a te ekang diyà te mid-ewaan en su egkeregdas en he vinelayan.

7 Kenà a ebpekelipezeng; iring a te tagbis he sebsevaha zin diyà te atep te valey.

8 Layun a ebpeel-elezi te menge kuntada ku.

Edsudien e zan ne egemiten dan he petug-iring is mezaat he kebpekesavuk ku emun edrewakan dan is duma.

9 Edsudien e zan su wazè ku en kaankaan,

ne ebpekezuzungul e zà diyà te avu is edsineǥew

10 tenged te utew nu kegkepeuki kedì.

Edsudien e zan su ǥeina te iring a te vesura he mid-amì nu ne intimbag nu.

11 Is untung ku iring te alung he meǥaan dà egkaawà diyà te nesevukan din.

Wey iring a te sagbet he neǥangu.

12 Piru sikew mulà, Nengazen, edhadì ka te wazà pidtemanan;

edtentenuzan ka te menge etew taman te taman.

13 Andam en is hizu nu para te Zion,

su neume en is midtelaan he timpu he zutun ibpeehè nu is keupiya nu para te Zion.

14 Su heini he inged mibmahal ǥihapun te menge etew nu he menge suluǥuen nu minsan pa te nezeetan en heini.

15 Is menge meǥinged diyà te menge nasyun, edtahud dan te Nengazen;

is langun he menge hadì kayi te kelibutan edtahud diyà te etuvangan din.

16 Su ed-umanan ebenguna te Nengazen is Zion;

ne ibpeehè din is mekeǥeǥehem he kebpekiduma zin.

17 Edtevaken din is ampù te menge mekehizuhizu;

kenè din ebpekewezaan is ked-ampù dan.

18 Isurat heini para te huziyan he menge lapis te menge kevuwazan,

su para mezalig dan is Nengazen:

19 Puun diyà te segradu he lugar he iyan is langit, edtengtengan te Nengazen is kelibutan,

20 su para mezineg din is dag-es te menge etew zin he menge vinihag

ne wey zin melibri is menge etew zin he ebpenhimetayan.

21 Ne tenged kayi, idsangyew ziyà te Zion he iyan is inged he Jerusalem is menge mibeelan te Nengazen,

ne zutun he inged sikandin edeliǥa.

22 Egkeulaula heini emun edtiǥum en dutun is menge etew he ebpemuun diyà te menge nasyun wey menge ginhedian te ked-azap te Nengazen.

23 Wazè pa meepus is untung ku, ne impemeluya ad te Nengazen;

impemevavè din is untung ku.

24 Umbe, midhangyù a ziyà te kandin, ke siak te,

“He Megbevayè ku he wazà pidtemanan te untung din, kenè nu en dèpa kuwaa is untung ku te kenè e pa meǥurang.

25 Dengan mibeelan nu is kelibutan wey is langit.

26 Egkengahanew heini piru ebpedayun ka mulà.

Ebmerunut is langun iring te visti.

Wey iring daan te visti, ne ed-ilisan nu wey egkengahanew zan.

27 Piru sikew mulà, ne iyan ke zed gihapun;

wazè nu ketepusan.

28 Is menge kevuwazan te menge etew nu he menge suluǥuen nu, ne kenà sikandan egkengezeetan te vangkit ne ebentayan nu sikandan.”