1-2 Nio Paulus. Anutu itunu leleene mi iboobo yo, mi iur yo ma aŋwe ŋgoŋana ki Yesu Krisi. Niamru gaabaŋoŋ Sostenes ambeede ro tiŋgi ima piom wal ki kar Korin ta kombot lela lupŋana ki Anutu na. Niom wal ta kesekap la ki Yesu Krisi na, ni ikam yom ma kewe Anutu wal kini potomŋan kek. Mi Anutu iboobo yom be kewe ni lene kat mibe kakam mbulu potomŋana. Mi niom men som. Niomŋan karkari boozomen ta tizuŋzuŋ pa Merere kiti Yesu Krisi na. Pa Yesu Krisi, ni Biibi kizin, mi Biibi kiti tomini.✡ 1Kor 6:11; 2Tim 1:9

3 Tamanda Anutu mi Merere Yesu Krisi ko tikampe yom, mi timboro yom ma kombot ambai. Ŋonoono.

4 Gorgori na, nio leleŋ ambai pa Anutu mi aŋpakurkuri piom. Pa Yesu Krisi iwe zaala piom ma kampeŋana biibi ki Anutu ise tiom. 5 Niom kesekap la ki Krisi, tanata Anutu ikam yom ma karao kat pa koroŋ matakiŋa. Ŋgar ma sua ma.✡ 1Kor 12:7+; 2Kor 8:7 6 Mi ina iswe kembei: Uruunu ambaiŋana ki Krisi ta muŋgu amsoyaara piom, ina kakam ma imbol piom kek. 7 Tana iŋgi kombotmbot mi kazza Anutu be iswe Merere kiti Yesu Krisi ma ipet mat, mi ni ipombolmbol yom be kakam uraata matakiŋa boozomen ta ki Bubuŋana i.✡ Pil 3:20; 1Tes 1:10; Tit 2:13 8-9 Mi Anutu itunu ko ipombolmbol yom ma kemender mbolŋana ma irao toono swoono. Naso nol ki Merere kiti Yesu Krisi iso ipet, tona leyom uunu sa isaana som. Pa Anutu ta iboobo yom ma niomŋan Lutuunu Yesu Krisi kaparlup yom na, ni itoto sua kini. Tana iti irao tapase pini.✡ Pil 1:6; Kol 1:22; 1Tes 3:13, 5:23+; 1Pe 5:10; 1Kor 10:13; 1Yo 1:3

10-11 O niom toŋmatiziŋ tio, nio aŋsombe aŋpombol yom pa Merere kiti Yesu Krisi zaana ta kembei: Kulup leleyom mi ŋgar tiom ma iwe tamen kat, mi koso sua raraate men. Kokena kaparyapaala yom. Pa Kloe wal kini pakan timar mi tisotaara yo piom ta kembei: Ŋoŋi boozo imbot la mazwoyom.✡ Ro 12:16; 2Kor 13:11; Pil 2:2, 3:16; 1Pe 3:8 12 Iŋgi aŋso pa mbulu tiom tau kaparyapaala yom ma kozzo ta kembei: “Niam ti amtoto ŋgar ki Paulus,” som “Niam amtoto ŋgar ki Apolos,” som “Niam amtoto ŋgar ki Petrus,” som “Niam ti amtoto Krisi.” Mbulu ta kembei irao yom makiŋ.✡ Yo 1:42; Ŋgo 18:24+; 1Kor 3:4

13 Lak, aŋso aŋwi yom. Krisi, tisupaali ma iwe pakan pakan? Som Paulus ikam muriyom, mi tipuni ma imeete sala ke pambaaraŋana piom? Som niom kakam yok pa Paulus zaana? 14 Nio leleŋ ambai pa Anutu paso, aŋkam yok piom som. Malanto aŋkam pa Krispus mi Gaius men.✡ Ŋgo 18:8; Ro 16:23 15 Tana tomtom sa irao imender mi iso: “Nio ti aŋkam yok pa Paulus zaana,” na som. 16 O ŋonoono, nio aŋkam yok pa Setepan mi wal kini tomini. Mi zin pakan na, motoŋ iŋgal mini som. Aŋkam yok pizin, o som.✡ 1Kor 16:15 17 Pa Krisi, ni iŋgo yo ma aŋla be aŋkam yok pizin tomtom som. Ni iŋgo yo be aŋsoyaara uruunu ambaiŋana. Mi ni leleene be aŋkam sua mbuyeeneŋana kembei ta zin ŋgarŋan ki toono i tikamam na pepe. Pa sua ta kembena ko ikoto ke pambaaraŋana ki Krisi ma iwe kembei koroŋ sorok.✡ 1Kor 2:1+; Ga 1:15+; 2Pe 1:16

18 Sua ta iso pa meeteŋana ki Krisi sala ke pambaaraŋana na, zin wal tabe tila len i tire kembei sua kankaanaŋana. Tamen iti ta Anutu ikamam uraata piti be ikamke iti na, tikilaala ta kembei: Meeteŋana kini ta iswe kat Anutu mburaana.✡ Ŋgo 17:18; Ro 1:16; 1Kor 2:14; 2Kor 4:3 19 Ka sua imbot pataaŋa kek ta kembei:

20 Tana wal ŋgarŋan, mi zin ta len ŋgar biibi pa tutu na, mi zin wal ta tizorzooro pa sua ma ŋgar pa mazwaana taiŋgi na, ko toso parei pizin? Pa ŋgar ta tomtom toono kan tipakurkur na, Anutu iso iti pa ta kembei: Ina ŋgar kankaanaŋana kat.✡ Yesa 19:12; Lu 10:21; Ro 1:22,28; 1Kor 3:18 21 Anutu ŋgar kini biibi. Ni iute: Iti tomtom toono kanda na, ŋgar kiti irao ikam ti ma tuute i na som. Tanata ni iur zaala toro pizin wal urlaŋan be ikamke zin pa i. Mi sua ki Anutu ta amzzoyaryaara i, ta iso yom pa zaala tana. Zaala tana, wal toono kan tire kembei mbulu kankaanaŋana.✡ Mt 11:25+ 22 Pa zin Yuda tiso tire mos bibip to tiurla. Mi zin Grik na, tikam kinkiini be tikam ŋgar biibi.✡ Mk 8:11; Yo 4:48; Ŋgo 17:18,32 23 Tamen niam na, amzzoyaryaara sua pa meeteŋana ki Krisi sala ke pambaaraŋana. Sua tana, sombe zin Yuda tileŋ, na tiurla som, mi lelen pa som kat. Mi so zin wal ta Yuda somŋan i tileŋ, na tire kembei ŋgar kankaanaŋana.✡ Yo 6:60+; Ŋgo 22:22; Ro 9:32; 1Kor 2:14 24 Tamen iti ta Anutu iboobo iti ma tewe lene na, iti Yuda, mi zin wal pakan tomini, iti tuute: Krisi ta iswe kat Anutu mburaana mi ŋgar kini biibi.✡ Ro 1:16; Kol 2:3 25 Pa ŋgar ki Anutu ta tomtom tire kembei ŋgar kankaanaŋana, ina ilip pa ŋgar kizin tomtom. Mi mbulu ki Anutu ta tomtom tire kembei mburaana som, ina ilip pa tomtom mburan.✡ 2Kor 13:4

26 O niom toŋmatiziŋ tio, kakam ŋgar pa ituyom. Niom wal ta Anutu iboobo yom ma kewe lene na, niom pareiŋoyom? Wal toono kan tire yom boozo kembei leyom ŋgar biibi? Som. Mi niom boozo mburoyom biibi som, mi zoyom biibi som.✡ Lu 16:15; Yo 7:48; Yems 2:1+ 27 Pa zin wal ta tomtom toono kan tire zin kembei wal kankaanaŋan, ta Anutu ipeikat zin ma tiwe lene, bekena ipamiaŋ zin wal ŋgarŋan ki toono. Mi zin wal ta tomtom toono kan tire zin kembei mburan bibip som, ta Anutu ipeikat zin ma tiwe lene, bekena ipamiaŋ zin wal tau mburan bibip i.✡ Mt 11:25; Yems 2:5 28-29 Mi zin wal ta tomtom toono kan tirepilpiili zin ma tiso zin sorrokŋan, ta Anutu ipeikat zin ma tiwe lene. Naso iswe zin wal zanŋan ki toono kembei zan tina koroŋ sorok, mi tomtom sa irao ipakur itunu ila Anutu kereene uunu som.✡ Ro 3:27; Ep 2:9

30 Anutu itunu, ta ikam yom ma kesekap la ki Yesu Krisi. Mi Yesu Krisi, ta iswe ŋgar biibi ki Anutu piti, mi ikam ti ma tewe ndeeŋeŋanda pa Anutu mataana, mi ipeyei mbulu potomŋana piti, mi ikamke iti.✡ Yo 17:19; Ro 4:25; 2Kor 5:21 31 Tana toto sua ta tibeede se ro pataaŋa kek.