1 Niom toŋmatiziŋ tiam, miiliŋana ki Merere ka nol na, niam irao ambeede ka sua sa na som. 2 Pa ituyom kuute kek. Nol ki Merere ko ipet kembei tomtom kuumbuŋana ta imar pa mbeŋ i. ✡ Mt 24:43+; 1Kor 5:5; 2Pe 3:10; Tur 3:3, 16:15 3 Tomtom ko tizzo ta kembei: “Aiss, iŋgi mazwaana ambaiŋana kat be tombot. Pa kosa sa irao ipasaana iti na som.” Tana ko tizzo ta kembei, mi pataŋana tabe ipasaana kat zin ipet. Ko ipamurur zin kembei moori ta pikin ikam kati be ipeebe i. Mi ko tirao be tiko na som.

4 Mi niom toŋmatiziŋ tiam, niom kombotmbot lela zugut lene mini som. Tana nol biibi tana irao be ipamurur yom kembei tomtom kuumbuŋana i na som. 5 Pa iti zugut kanda som. Niom ta boozomen tina aigule koyom. Kewe mat lutuunu bizin kek. ✡ Lu 18:8; Yo 12:36; Ep 5:8+ 6 Tana iti tekeenemeete kembei ta zin wal pakan pepe. Tagabizbiizi itundu, mi tapamatmaata ma tombotmbot. ✡ Mt 24:42, 25:1-13; Ro 13:11+; 1Kor 15:34; Ep 5:14; 1Pe 5:8 7 Kere. Zin wal ta tikenne na, tikenne pa mbeŋ. Mi zin wal ta tiwinin ma tigadgaada na, tiwinin pa mbeŋ. 8 Mi iti na, aigule kanda. Tana tagabiizi itundu, mi tiurla kat, mi tuur lelende pizin tomtom. Pa ina iwe kembei mburu malmal kana ta isekalkaala kanda mbooro na. Mi tu'urur matanda pa mazwaana tabe Anutu ikamke iti ma tombot ambai. Pa ina iwe kembei mburu malmal kana ta isekalkaala utende na. ✡ Ep 6:13+ 9 Pa Anutu, ni iur ti be kete malmalŋana kini ise kiti na som. Ni iur ti be takam ulaaŋa kini ma iwe lende. Ulaaŋa tana na, Merere kiti Yesu Krisi ta iwe zaala pa. ✡ Ro 5:9; 1Tes 1:10; 2Tes 2:13+ 10 Pa ni ta ikam murindi mi imeete piti, bekena ikam ti ma tala tombotmbot raami su kar saamba. Tana sombe temeete, som tombot matanda yaryaara, nako ni itiŋan tombotmbot. ✡ Ro 14:8+; 2Kor 5:15; 1Tes 4:14 11 Tana niom ta boozomen kaparpombolmbol yom be kemender mbolŋana, kembei ta kakamam i. ✡ Ibr 10:24+; Yud 20

12 Niom toŋmatiziŋ tiam, zin wal tau Merere iur zin be timboro yom, mi tikamam uraata piom, mi tipazalzal yom pa sua ki Anutu na, timbelmbel uraata piom. Tana niam leleyam be leyom ŋger pizin, ✡ 1Kor 16:18; Ga 6:6; Pil 2:29; 1Tim 5:17; Ibr 13:7,17 13 mi kuur kat leleyom pizin, mi motoyom ikotse kizin. Pa zin tikamam uraata biibi piom. Mi leleyam be niom ta boozomen kaparlup leleyom ma kewe tamen, mi kombotmbot la mbulu luumuŋana men.

14 Niom toŋmatiziŋ tiam, niam amso ampombol yom pa mbulu pakan tabe kakam i. Zin wal ta so mburan pa uraata som, mi timbombooren sorok i, na kapazal zin. Mi zin wal ta so timototo, na kopombol zin. Zin wal ta so timbol som, na kapalot zin bekena timender mbolŋana. Mi kakam mbulu luumuŋana men pa tomtom ta boozomen. ✡ Mt 18:15; Ro 14:19; Ga 6:1+; Kol 3:12; 2Tes 3:6+ 15 Sombe tomtom sa ikam ŋoobo mbulu piom, na kopokot pepe. Mazwaana ta boozomen na, kakam kinkiini be kaparkam mbulu ambaiŋana piom, mi pizin tomtom ta boozomen. Tana kere be kaparpombolmbol yom pa mbulu ta kembei. ✡ Mt 5:39+; Ro 12:17; 1Pe 3:9

16 Leleyom ambai pa mazwaana ta boozomen. ✡ 2Kor 6:10; Pil 4:4 17 Mi kuzuŋzuŋ taparpaara. ✡ Lu 18:1; Ro 12:12; Ep 6:18; Kol 4:2 18 Mbulu pareipareiŋan ta so ipet, na leleyom ambai men pa Anutu mi kapakuri. Pa ni leleene be niom wal ta kesekap la ki Krisi i kakam mbulu ta kembei. ✡ Ep 5:20; Kol 3:17

19 You ki Bubuŋana Potomŋana na, kupunmeete pepe. ✡ Ep 4:30; 2Tim 1:6 20 Mi Anutu kalŋaana ta kwoono bizin tiso yom pa na, kerepiili kembei koroŋ sorok pepe. ✡ 1Kor 14:1,39 21 Tamen sua mi mbulu ta boozomen na, niom bela kipitpeleele. Koroŋ ambaimbaiŋan na kikiskis. ✡ 1Kor 14:29; 1Yo 4:1 22 Mi koroŋ sananŋan ta boozomen na, kombot molo pa.

23 Anutu, ni imborro iti ma tombot ambai, mi ni mbulu luumuŋana katuunu. Ni itunu ko ikam yom ma kewe potomŋoyom kat, mi imborro kunuyom, ŋgar tiom, leleyom, mi kuliyom ma ambai men ma irao miiliŋana ki Merere kiti Yesu Krisi. Naso leyom uunu sa isaana som. ✡ Ro 15:33; 1Kor 1:8; 1Tes 3:13; 2Tes 3:16 24 Anutu ta iboboobo yom i, ni itoto sua kini mbukŋana. Tana ni kola ikam ta kembena. ✡ 1Kor 1:9, 10:13; Pil 1:6; 2Tes 3:3

25 Niom toŋmatiziŋ tiam, motoyom iŋgalŋgal yam pa suŋŋana. ✡ Kol 4:3; 2Tes 3:1 26 Mi zin toŋmatiziŋ kiti ta tiurla na, kakam zin ta boozomen mi kaparteege nomoyom. ✡ Ro 16:16

27 Nio aŋkam sua mbolŋana piom pa Merere zaana be kapaata ro ti pizin wal urlaŋan ta boozomen ma tileŋ.

28 Kampeŋana ki Merere kiti Yesu Krisi ko ise tiom. Ŋonoono.