1-2 Zin wal ta so popoŋan pa sua ki Anutu na, mataana mi tapaute zin pa koroŋ ta kembei: Mbulu tabe ikam ti ma temetmeete ma tala lende i, na iti bela tezem ma imborene kat, mi totooro lelende mi tuurla ki Anutu. Mi tapaute zin pa uunu matakiŋa ta tomtom tikamam yok pa i, * Muŋgu tomtom tikamam yok pa uunu boozo. Sombe tomtom sa itoori ma iwe Yuda, na ikam yok. Mi sombe tomtom sa leleene be ito Yoan ta ikamam yok pizin tomtom na, mi iwe naŋgaŋ kini, na ni tomini ikam yok. Zin Yuda tiŋgurŋguuru naman mi tikamam mbulu matakiŋa ki weŋana bekena tiŋgeeze pa Anutu mataana. Mi zin wal ki Krisi tikamam yok bekena tiwe ni lene, mibe tiswe urlaŋana kizin. mi mbulu tau tuur namanda isala tomtom uten bekena topombol zin. Mi toso zin pa maŋgaŋana kizin wal meeteŋan, mi nol biibi tabe Anutu itiiri iti pa mbulu kiti mi iur kadoono piti. Kadoono tana ko imbotmbot ma alok. Tana sua ta kembena, ta takamam pizin wal popoŋan. Pa ina iwe kembei urlaŋana kiti uunu. Tamen iti wal ta tombot mat ri pa sua ki Anutu kek na, irao talala mi timilmiili pa sua ta kembei men pepe. Toso pa koroŋ pakan tomini. Naso ŋgar kiti izze ma tewe kolman pa sua ki Anutu.✡ Pil 3:14 3 Tana sombe Anutu leleene, inako takam ta kembena.

4 Pa kere. Zin wal ta so tipizil kat ndemen pa urlaŋana kizin, inako len zaala sa be titooro zin ma timiili mini na som. Pa Anutu ipei ŋgar kizin ma timbot mat leleene kek. Mi mburaana saamba kana tau Anutu ikampewe iti pa sorok na, zin titoombo ma tiyamaana kek. Pa Bubuŋana ikam uraata pizin kek.✡ Mt 12:43+; Yo 1:9; Ga 3:5; Ibr 10:26+; 2Pe 2:20+ 5 Mi tikan la Anutu sua kini ma tiyamaana ka ambaiŋana kek. Mi Anutu mburaana matakiŋa tabe ipet kat mat pa kaimer i, na zin tire tenten kek.✡ Mbo 34:7 6 Tana zin wal ta kembei, sombe tisu mini mi tipizil kat ndemen pa urlaŋana kizin, inako len zaala sa be titooro zin mini som. Pa ina, zin kembei tipun Anutu Lutuunu sala ke pambaaraŋana mini, mi tipamiaŋi ila iwal biibi matan.✡ Ibr 10:26+; 2Pe 2:20+; 1Yo 5:16

7 Toono ta so yaŋ izzu pa ma ipembesmbeeze mi ipiyotyooto koroŋ ambaimbaiŋan pizin tomtom ta tikamam uraata pa, inako kampeŋana ki Anutu imbotmbot se ki. 8 Tamen toono ta so ipiyooto koroŋ ambaiŋana sa som, mi ipiyotyooto ro mi wooro matanmatanŋan men, na ire i. Pa sombe imbotmbot men ta kembei, na kaimer Anutu kete malmalŋana kini ko ise ki toono tana, mi you ikan ma ila ne.✡ Mt 3:10, 7:19; Lu 13:6+

9 O niom wal tio ta leleŋ piom ilip na, ŋonoono, iŋgi amkam sua kekeŋana ri piom. Tamen niam amute yom kek. Niom kembei toono ambaiŋana. Tana niam amurla kembei Anutu ko ikamke yom ma kombot ambai. 10 Pa ni irao be ikam ŋoobo mbulu sa na som. Mi ni iute uraata tiom ramaki mbulu tiom tau kuurur leleyom pini, mi ku'uluulu wal kini potomŋan ta muŋgu mi imar. Mbulu tiom tana, ni irao be mataana mbeleele na som.✡ Mt 10:40+, 25:40; 1Kor 15:58; 1Tes 1:3 11 Mi niam leleyam be niom ta boozomen motoyom siŋsiŋ pa mbulu ki Anutu. Tana leleyom iwe ru pepe. Kikiskis urlaŋana tiom ma irao kere kat koroŋ ambaiŋana ta kuurur motoyom pa i.✡ Ibr 3:6, 4:14, 10:36, 12:1 12 Kokena keleŋsil sua mi kekeenemeete pa. Koto zin wal ta urlaŋana ipombolmbol zin ma timender mbolŋana pa pataŋana. Pa ina zin wal ta kembei, ta ko tikam matamur ambaiŋana ta Anutu imbuk sua pa na, mi tire ka ŋonoono.✡ 2Tes 1:4; Yems 1:3+; Tur 14:12

13 Indeeŋe ta Anutu imbuk sua pa Abaraam na, tomtom sa tau ilip pa Anutu be ni ipaata zaana mi ipombol sua kini pa i na som. Tanata ipaata itunu zaana pa sua kini mbukŋana tana ma ipombol pa. 14 Isombe:

15 Mi Abaraam iurla sua mbukŋana tana. Tanata iurur mataana pa, mi izza ma ila ila ma ire ka ŋonoono.

16 Iti tomtom takamam mbulu ta kembei. Sombe taparzooro pa koroŋ sa, na tapaata tomtom sa ta ni biibi ma ilip piti na zaana. Naso tomtom tina zaana ipombol sua kiti mi ipumun waende bizin kwon ma sua kizin imap.✡ Kam 22:10+

17 Mi Anutu ta kembena. Matamur ta ni imbuk sua pa be ikam piti na, ni irao be itooro mini ŋgar kini pa na som. Tanata ipaata itunu zaana pa sua kini mbukŋana bekena ipombol pa ma imbol kat. Kokena iti ta zanda pa matamur tana lelende iwe ru pa. 18 Tana iti ta toko ma tala ki Anutu na, lende koroŋ ru ta ipombol ti. Mi koroŋ ru tana, ni irao ikam pakaamŋana pa, som itooro ŋgar kini pa na som. Som ma som kat. Ta na, sua kini mbukŋana. Mi toro na, itunu zaana ta ipaata bekena ipombol sua mbukŋana tana. Koroŋ ru tana tipombol kat iti be tikiskis urlaŋana kiti, mi tuurur matanda pa koroŋ ambaiŋana tabe takam pa kaimer i.✡ Ro 8:24+; Tit 1:2; Ibr 12:1

19-20 Koroŋ ambaiŋana tau tuurur matanda pa i, ina ikis ti ma tuŋtuŋ, kembei wooŋgo ta timbit ka re mbolŋana ila patmbu bekena tuŋ ma imbot. Pa Ni ta iwe zaala pa koroŋ tana, ta imuuŋgu piti, mi ilela ruumu leleene ta potomŋana ŋonoono i, mi ilela kat ki Anutu ta saamba a. Mi iwe patoronŋana ka tomtom biibi ŋonoono kek, kembei ta Melkizedek. Tana ni ko imender be ipazal sua pizin tomtom mi Anutu, mi iseeŋge iseeŋge ma ila.✡ Mbo 110:4; Ibr 3:1, 5:6,10, 9:11,24