1 Wal sananŋan mbulu kizin, ta ipakoikoi zin. Tana tomtom tiketoto zin som, mi tikowo len sorok.

Mi wal ndeeŋeŋan na, timototo som. Timendernder mbolŋana kembei ta laion.

2 Lele sa, sombe ka tomtom bizin wal zorzooroŋan, nako tizirziiri zin peeze kan kizin kolouŋana kolouŋana.

Mi tomtom ta so le ŋgar ambaiŋana mi ikilaala mbulu iŋgoi ta ambai ma ilip, nako ikam ma koroŋ ta boozomen iloondo ambai. ✡ Tut 8:15-16, 29:4

3 Biibi ta so ikototo zin wal sorrokŋan,

ina ni kembei yaŋpat ta isu mi ipasaana kini.

4 Zin wal ta tipakurkur zin wal sananŋan na, tiswe kembei tipizil ndemen pa tutu ki Anutu kek.

Mi zin wal ta matan iŋgalŋgal tutu kini mi titoto, na tikamam uraata be tikoto zin wal sananŋan.

5 Wal sananŋan tikilaala mbulu ndeeŋeŋana som.

Mi zin wal ta tikamam kinkiini be tiute Yooba mibe timbot kolouŋana pini na, tiute mbulu ndeeŋeŋana ma imap.

6 Tomtom sorokŋana ta so ipa pai kini ma ambai men,

na ilip pizin mbio uunu ta tipaŋobŋoobo pa zaala ambaiŋana na. ✡ Tut 19:1

7 Sombe lutundu bizin matan iŋgalŋgal tutu mi titoto, ina iswe kembei ŋgar kizin ipet kek.

Mi sombe pikin sa igabgaaba zin wal tau tiwirri pat ma koroŋ kizin pa koroŋ soroksorok men, ina ni ipamiaŋ tamaana.

8 Sombe tomtom tikam mbun mar kiti, na toso pizin be tipekel raama gegeene biibi pepe.

Pa pat ta so tondou pa zaala ta kembei, na Anutu ko itatke piti, mi ikam pizin wal ta tikampewe zin wal sorrokŋan na. ✡ Kam 22:25

9 Tomtom ta so izezeeze talŋaana pa tutu,

na Anutu ko leleene be ileŋ suŋŋana kini ri sa som. ✡ Mbo 66:18; Yo 9:31

10 Tomtom ta so ipakamkaam zin wal ndeeŋeŋan mi iyaryaaru zin be tito zaala sananŋana, nako itop la itunu kilis kini.

Mi zin wal ta so tipa pai kizin ma ambai men, nako tikam len matamur ambaiŋana. ✡ Tut 26:27; Mt 15:14; Ibr 6:12

11 Zin mbio uunu nin se ma tindemeere sorok kembei zin len ŋgar biibi.

Tamen zin wal sorrokŋan ta ŋgar kizin ipet kek na, tikilaala mbulu ta zin mbio uunu tikamam.

12 Sombe wal ndeeŋeŋan tilip pa kan koi bizin, na tomtom lelen ambai kat mi menmeen zin biibi.

Mi sombe wal sananŋan timaŋga be tikam peeze, na tomtom tiru zaala be tike pizin. ✡ Tut 29:2

13 Tomtom ta so iwatkaala sanaana kini, na mboti kini ko irao ambai kat na som.

Mi sombe tomtom sa iswe sanaana kini mi izem, nako Anutu leleene isaana pini mi imuŋai i. ✡ Mbo 32:3-5; 1Yo 1:9

14 Tomtom ta so imototo Anutu mi mataana iŋgalŋgal itunu, nako leleene ambai mi kampeŋana ki Anutu imbotmbot se kini.

Mi tomtom ta so ŋgar kini imbolmbol se pa mbulu ki zooroŋana, na ni ko indeeŋe pataŋana. ✡ Tut 14:16

15 Sombe tomtom sananŋana sa ikamam peeze mi ikototo zin wal sorrokŋan,

ina ni kembei laion ta kalŋaana izalla, o bea ta ilonloondo ma ila be ikan tomtom.

16 Biibi sa isombe ikototo sorok zin wal ta timbot la ni kopo mbarmaana, ina iswe i kembei ŋgar kini ipet zen.

Mi sombe biibi sa iurur koi pa mbulu ki watkeŋana, na ni ko imbot ambai su toono ma molo. ✡ Tut 29:4

17 Tomtom ta so ipun tomtom toro ma imeete, na kaimer ko irao mbuleene su kat na som.

Ko imototo mi leleene ipata pa mbulu kini tana ma irao meeteŋana kini.

Mi ko irao ikam le gaabaŋana sa be ipomboli na som. ✡ Un 4:14, 9:6; Kam 21:12-15

18 Tomtom ta so ipa pai kini ma ambai men, nako Anutu itatke i pa pataŋana kini.

Mi tomtom ta so ipaŋobŋoobo pa zaala ambaiŋana, nako molo som to imeete ma isula lene Andewa. ✡ Tut 12:13

19 Tomtom ta so ikamam uraata pa toono kini, nako irao kat pa ka kini.

Mi zin wal ta tilala pa koroŋ soroksorok ta ŋonon somŋan i, nako tisu ma timbot ŋoobo kat.

20 Tomtom ta so izzo sua ŋonoono men mi itoto sua kini mbukŋana, nako indeeŋe kampeŋana biibi.

Mi zin wal ta gorgori tirru zaala pakaamŋana sa be karau men mi tindou len koroŋ boozo, na Anutu ko irao ileele zin na som. Zin kola tire kadoono pa mbulu kizin. ✡ Tut 20:21, 21:5; 1Tim 6:6,9

21 Sombe iti lende uraata be tiurpe pataŋana kizin tomtom, mi talae kizin wal pakan, ina mbulu ambai som. Bela takam mbulu raraate men pizin wal ta boozomen.

Tamen zin bibip pakan ta titirtiiri sua i, sombe tomtom tikam len koroŋ rimen ŋonoono, nako tilae kizin mi tiuulu zin pa sua kizin. ✡ Tut 24:23

22 Zin wal ta matan konŋan na, tirru zaala be karau men mi tindou len koroŋ boozo.

Mi tikilaala som. Zaala ta titoto na, kaimer ko ikam zin ma tisu ma timbot ŋoobo.

23 Nu sombe yaamba tomtom sa bekena pazali,

na kaimer ni ko leleene ambai pu ma ilip pizin wal ta kwon imbesmbeeze pini sorok na. ✡ Tut 9:8, 27:5

24 Tomtom ta so ikam kuumbu pa tamaana ma naana, mana kaimer isu mi iso: “Nio aŋkam ŋoobo mbulu sa som.”

Na ni kembei igabgaaba zin wal ta tikamam zigzik na. ✡ Tut 19:26; Mt 15:4-6

25 Zin wal ta matan koroŋŋan na, tipasansaana tomtom lelen, mi tikamam ma ŋoŋi iwedet.

Mi tomtom ta so ipase pa Yooba, nako imbot ambai mi itum kat.

26 Tomtom ta so ipase pa itunu, na ikankaana kat.

Mi tomtom ta so itoto zaala ki ŋgar ambaiŋana, na pataŋana sa ko irao ipasaana kati na som. ✡ Tut 3:5,7; 1Kor 3:18-20

27 Tomtom ta so irairai koroŋ kini pakan pizin wal sorrokŋan, nako irao iru zalaana pa koroŋ sa som.

Mi tomtom ta so irre zin men, mi iuluulu zin som, nako tigiibi sua sanaŋan boozo pini. ✡ Mbo 109:15-16; Tut 19:17, 22:9

28 Sombe wal sananŋan timaŋga be tikam peeze, na tomtom tiru zaala be tike pizin.

Mi sombe wal sananŋan timeete ma tila len, inako zin wal ndeeŋeŋan timasak ma tiwe boozo. ✡ Tut 11:10, 29:2