1 Nedbi ipiter nerut idimge, able Kebi Kirim Merkemle tabakiauda op bapita Aulekem, Autale a kemekemer Iudaiara gelarle ya waiakaida wi mir waipuda nalu wi waikaidarda. Wi Iesui didbarda a edomedarda bakiauda Pilatoim.

2 Pilatode abi itmeri, “Nako ma Mamus Iudaia lera nali?

Iesu ge atkarti, “Mama agekar detautii kaka nali.”

3-4 Kebi Kirim Merkemlegize abim tag emariklare ge gair lu bamisilare. Ege Pilatode abi ko itmeri, “Ma naluglam nole nerut mir detaut? Wi marim tag emarkeda able gair lu bamisreda.”

5 Iesu mena mirkak dawer, ege Pilato ezigmuada.

6 Gair Datupir Lewer kerkerge, Pilatode yabi wanauseda audbarlam able le ya le abim obagweda. 7 Able kerkerge able le ya wadali abi wadaggereda Barabas, e audbaraudbar wadali. E netat le able lelam ge wi basaredlare a le ga eudem naresa.

8-9 Nade ge lera nikidetreder taba etami a bakeri Pilatoim bagoda e yabim waikaida nalu e yabim waikerer able Datupir Lewer kererge, ege yabi nautmerda, “Nako wa laglag ka Mamus Iudaia Lera adem datwie?” 10 E umele dawer able Kebi Kirim Merkemlegize Iesui abim tigareda wi abim kurabkurab urder.

11 Ege Kebi Kirim Merkemlegize mir mitwarlare ge le nikidetreder wi obamusa Barabasim e adem wausmeda nole Iesu. 12 Pilatode ko yabi daratagerda ge le nikidetreder, “Wa nako a laglag uridli ka nalu akailu able leem wabi dabgereda Mamus Iudaia Lera?”

13 Wige abim baborda, “Abim nilaru sataoroge detagrare!”

14 Pilatode yabi nautmerda, “E nalu adud lu ikeri?”

15 Piiatode Barabasi ditwi yabim, ableglam e laglag dawer e yabidoge waisisimuda. A ga akaidari tabara sariksarikle au kelarkelar miru daratagerda ko Iesui odamrikdarda, a ya abi adem waigareda nilaru satauroge waditagerda.

16 Ege sariksarik legize Iesui igareda muige able utebge maike au gelarle metage a ege eudige kemerkemer okakise aseseredle darabgerda. 17 Wi eudige papol wali Iesui doge; wi sikersiker aper daradara tamlam dirsirda a ikaidarda abi kirimge amida. 18 A wi bakeri abim ererbakrier, “Ei, Iudaia lera Mamus!” 19 Wi abi kirimge abi lugu areslare a abim mosu ituiare. Wi kokmamuamu bamrer abi opem a abi isorgiru ikelare.

20 Nade wi basemri ge emetu abi adud merwaru ikereda, wige abi tabara wali ko itkirda, a abi igareda adem ismedarda ko abi satauroge nilaru waditagerda.

21 Wi gabge nakasirweretlare wige kimiar erdarda abra nei dikereder Saimona e able uteblam tabakiamuda ge nade gedub naridweretlare e kei ikasereder au utebem. E Sirini le dawer, a e Alezanda iba bab dawer Rupas ei. Ege abi ares legize aukaise detagerda e Iesura satauro wadepli.

22 Wige Iesui datkimuareta able utebem abra nei dikereder Golgota (able nei merbi mirge dikeredi Kirim Lidira Uteb). 23 Wige laglag ge urder Iesui waina waikwarda ataperet ataperet lukup able lukup muro, ege nole iri.

24 Wige eudige abi satauroge detagerda. Wige luglug segur batker ya waiakaida wi wadasmerda netide yabialam ya wairpeida nalu mog abi walilam. 25 Wi idimge ga 9 koloke abi nilaru detagerda satauroge. 26 Wige able mir ditarda tag emariklare, “E Iudaia lera gesep ople dali”. 27 Able utebge ge Iusui satauroge detagerda, wi neis erwam le ko daratagerda taba satauroge, netat Iesui narbit pekge emerider a nerut ge abi keimer pekge emereder. 28 [Able tonartonar zogoziawalira mir pe barmisreda pe ke detautii, Abige ikedidarda able lege wi nole gelar waimireda.]

29 Le ke nakasirweretlare a ke nakasirweretlare kirim deskeredlare a abi aiselare. Wi erer bakrier, “Mama sikak ikeri! Ma yama obakiamuda able au zogometa wairapi a koma wadimri neis a netat gergerge! 30 Pe irdiredi ma mabu adem tetugered a mage sataurolam sepem tarabu!”

31 Able tonartonar Kebi Kirim Merkem Le a Aotarle abi merwarem ikelare. Wi tabara batagelare, “E wader le nakerda sikak berda, e umerkak tababu obakai sikak obai! 32 Ei! Keriso mamanali, mamanali Isralara gesep ople, able kerker pe irdi ma sataurolam sepem tarabu ya waiakai ki umele mari nasmerare mama able lu ikeli, a ki umele mari narmirlare!” A neis le ga taba nerut satauroge namereder wi ko abi aiserlei.

33 Kikem lim baida kemerkemer ged akaida kupkupi kupkupi baidari e kupkupi kupkupi irdireder mena neis a netat awa erpeida. 34 Neis a netat kolokge Iesu aler ererekri, “Eloi, Eloi lema sabaktani?” Able mir pe merbi mir dikeredi, “Kara Ad! Kara Ad! Ma nalugiam ma kari nakairti?”

35 Wader le ge urder abra erer dasorda a wige natkareta, “Wa asrare, e Elaizaem ererekrili!” 36 Netat able lelam korider emridari span tikada kerkar wainage titri, ikaida luge dasrida. E ikaidari Iesu ikwari ya waiakaida e wairi. Able lelut eudige detauti, “Mena, mi yami dasmerare ese Eiaiza watabakiamu abi adem sataurolam sepem watitugered.” 37 Iesu aler ererekri keubu ga eumida.

38 Wali au zogometage waitrerdedi eipuge aremlam batwata mena sepge.

39 Ares lera kirimle ge Iesui opem ikweireder abra ererdasri a e Iesui erdari eumida. Ege eudige atkarti, “Agekar, able le e Adira werem dali!”

40 Wader koskir ge urder murislam erkep tegreder. Wader le yabialam ge Maria Magdalalam, Maria (Zemis Able Kebile a lose yaba ama), a Salomi. 41 Muige Galilaiage able koskir gize Iesui wairmireda a abi upiwaditidareda. A wader gair koskir ko ge urder ge wi Iesuipkem tabakiauda Ierusalemaem.

42-43 Iosepa Arimatia Le akarikda. E agekar le dawer yabialam Iudaia Opapit Lelam. E wadali wadikaili Adira basalaia ko watabakiamuda. E bakiamuda Pilatoim a abi tadamsi Iesui gemem, ableglam au kikem irdireder a able gerger ge irdireder Arsir Gerger (able gerger keubu ya Iudaia Sabad obarki).

44 Nadege Pilatode asri Iesu emetu eumida, ege abra serer barki. Ege ares kinmle dabgeri a abi itmeri nako Iesu emetu eumida. 45 Ege ares leem girip irdirer ge e abi detagri e agekar dikeredi. Pilotode Iosepai detagri e abra gem wadikada.

46 Iosepade marmar wali terapeidari ege gem titugerdi sataurolam, able waliu abi damisri, a ikaidari paierge ikedidari. A ga akaidari aukaka bakir terparki paier gab tege daterti. 47 Maria Magdalalam a Maria (Iosera ama) abi dasmele e abi nade irdidari.