1 Nade Sabad gerger emetu barki, Maria Magdalalam, Maria (Zemisira ama) a Salomi pas laglag lu terapidare ya waiakaida wi Iesura gem waditimuardare. 2 Sabad idim kakarge keubu ya lim wateupamada, wi bakiaudari paierge. 3-4 Nade wi gabge barukle wige tabara bautmele, “Netide ya adem bakir watirparik merbim able paier gabtelam?” ableglam able bakir aukakale ikereder. Wige egridere a erdardare able bakir emetu barparki.

5 Wige paierge bartidare a terdardere kirgir kebi le ke timireder narbit pekge ege abra zazerzazer wali damireder. Able koskirira au geum barkidare a azigmuartidare.

6 Ege yabi able kimiaride daratagridare, “Wa nole geumge ekerdare. Ka umele nali wa pewa Iesui Nazeret Le daraimele ge abi satauroge nilaru detagerda. E nole pedali, abi Adide ko ekiamda! Wa dasmerdare, able uteb pe irdiredi ge nade wi abi ikedidarda. 7 Bakiauare a abra memegle daratagrare, Peteru penoko dali, “E kikem bakiamuda Galilaiaem wa keubu ya bakiauare. Abi ya terdarare able orwairorwair e wabi waditagreda.

8 Wige bakiaudare paierlam eosidare a adem korider emridare ableglam yaba durdur a geum, a wi nole umerkak wi nalu waikaidare. Wi nole le mir daratagelare ableglam wi geumge ikele.

9 [Keubu Iesu idim kakarge eudlam ekiamdari able kikem gergerge irdireder, e tababu kikem batomeda Maria Magdalaleem, (able koskir ge dawer Iesude 7 dimoni adem abialam isi.) 10 Maria bakiamudari able le daratagelare ge wi Iesuipkem urder. Able le wi budge urder a i bazwer, 11 a nadege Mariade yabi daratagelare Iusu idid akaida wi nole abi asolare.

12 Keubu, Iesu tababu batomeda nerut noge yabim neis leem nadege wi gabge nakasireder kei gedub utebem. 13 Wi akomedariei wader le daratagerda, wige nole yabi nasolare.

14 Keubu ga Iesu tababu batomedari 11 memegleem nade wi lewer erolare, e yabi natapereta ableglam wi nole owaturkak urder a wi nole asolare nadege yabi wader legize daratagelare ge wi Iesui erdarda idid akaida. 15 E akaida yabi daratagerda, “Wa bakiauare gair gedim able gesepge a Debe Mir marauermawem gair leem. 16 Netiba ya wasolare a bapataiso obapaitlare wi ya sikak waurder. Netiba ya nole wasolare ya yaba ya adud bodomalam wanagri. 17 Abie legize wi ya wasolare yaba ya able atamilam wanagri: Wi yadimoni adem waislare muige kari neige. Wi ya kerkar mir wanagalare. 18 Ese wi tabo watakelare wi nole ya asikak waurder. Ese wi eudeud ni wairilare yabi umerkak gimide wanatutilare. Nade wi tabara tag wadikmiriklare gimgim lege able lera ya gim obasemrer.”

19 Nade yabi Oplelut emetu mir daratagerda, ege eudige abi Adide igardi kotorem ya waiakai e Adi tuter tag pekge waitimi. 20 Ege memegle adem bausi a marau eremlare gair utebge. Oplede dorge yabi kemem ikerer; e atamilam le natomeretlare Debe Mir ge memeglegize eremlare e agekar mir dikeredi.]