1 Ege Iesu atiem abele nar ge, a bakeamulu nerute apek, epe baos tabara uteb ge.

2 Dasmerare, uiaba egardare abim abele le ibibi, E eidi abele sik; Iesu abi nardarare uiaba oituli, epe E abi detager abele le ibibi, Kara uerem ae, mara nerkep ua saserim, emetu adem dikri mara uit.

3 Dasmerare, uader aotale le tababu dikiaporare uiaba nerkep ge, Abele le adud mer egali Adim.

4 Ege Iesu de nardarare uiaba dikiaporare, epe E uiabim, kega, Nalugelam uaba adud dikiaporare uaba nerkep ge?

5 Abelelam nade lu perper? nako abele mer abi detager, Mara uit emetu idigir; a nako abele mer abi detager, Tekuei, ma ge bakeam?

6 Ueakai uaba opasereret Le la Uerem nagri sirdam abele geseb ge E idigir uit giz, (E abim detager le ibibi), Ma ge tekuei, a ais mabara sik, a bakeam mabara meta.

7 E ge tekueilu, a bakeamulu tabara metaem.

8 Epe le lakub abi erdarare, uiaba sererege, a desperare Adim, E nakuarare abele sirdam le mokakalam.

9 Ege Iesu bakeamulu adem abele utebelam, epe E erdali abele le emreder abele meta ge a asesereder zegu mani, abara nei Mataio; E abi detager, Ma kari narmili, ege E tekueilu, a abi irmili.

10 Ege E sep ge eidi abele meta a leuer eroli, dasmerare, gaire telona giz a pako uite le giz a tabakeuare uiaba eidi okakis Iesuim, pako abara kaimeg giz, a leuer erolare.

11 Faresaio giz abi erdali, uiabi abi detagerare abara kaimeg giz, Nalugelam uaba Ereuerem le kemem leuer eroli a gaire telona giz pako uite le giz?

12 Ege Iesu asoli, E uiabi daratagerare, Nole abkoreb lukup le gaire gim kak le, epe mamoro abkoreb gaire le gimgim.

13 Ua bakeuare a ereuerem nalu tonar abele mer, Kaka lagelag abele nasenas, a nole abele zegu lu; abelelam kaka nole tabarki darabgerare gaire le barkak tonar, epe uite le giz uiaba obazgeda.

14 Ege Ioane ra kaimeg giz tabakeuare abim, kega, Nalugem keriba gaire kerker leueru baili, a pako gaire Faresaio, epe mara kaimeg giz nole leueru baili?

15 Ege Iesu de uiabi daratagerare, Umer kak okasosok gaire kaimeg le, abele le kerkar ispit abara kosker, abele uader gerger uiabi kemem, a niai kerker tabarki le ispit adem bakeamulu uiabielam, epe uiaba leueru baili.

16 Nole nerute le umele ekpi emeret gem uali abele kerkar mog uali; abelelam atoat abele emeret gem uali abara ekpi, iaueakai au atoatatoat.

17 Umer kak kerkar uaina etatakoi abele emeret gegur tarpor: ese mokakalam gegur tarpor erperidlu, a uaina epaiteredlu, a gaire gegur tarpor dedkoli: epe etatakoi abele kerkar uaina abele kerkar gegur tarpor, iaueakai mamoro debele.

18 E uiabi daratagerare abele gaire mer, Dasmer, abele kole tabarki E abim etkobeilu, kega, Kara neur emetu eumida; a ma tabakeam a dikmerik mara tagu abara tumge, iaueakai eded.

19 Ege Iesu tekueilu, a abara kaimeg giz abi irmilare.

20 Dasmer, abele kosker E nagri mam gim tuelf gaire urut, E bakeamulu Iesu ra sor ge, a abi itutilu abara am uali ub ge.

21 Abelelam E tababu dikiapor muige abara nerkep, Ese kaka no itutilu abara am uali, a kara eded nagri.

22 Ege Iesu baseker, a abi erdalu, E detager, kega, Kara neur, mara nerkep au saserim, a ma eded maba oitulam. Ege abele kosker eded abele haua ge.

23 Ege Iesu balu abele kole ra meta ge, E darasmerare gaire lekub a burar diperi a uiaba ebazuer,

24 E uiabi daratagerare, Ua bakeuare adem; abelelam abele neur nole eud kak, E no uteid. Ege uiaba abi neg degarare abim.

25 Ege lekub namuare, a E balu, a erpeilu neur ra tag; ege ekueilu abele neur.

26 Abele mer aserare abele ged uridili.

27 Iesu adem bakeamulu abele utebelam, epe uiaba abi narmilei neis sadamer le, a ereretikri, kega, Dauida ra Uerem, ma keribi nasenas.

28 E balu abele meta ge, a neis sadamer le tabakeamulei abim; a Iesu uiabi daratager neis le, Nako uaba karim oituli kaka umele abele lu ikeli? Epe uiaba detaut, Uao, Opole.

29 Ege E uiabi natutilu uiaba pone, a uiabi daratager, kega, Mokakalam uaba oituli, a ko ikeli abkoreb uabim.

30 Ege uiaba pone bakaerei; ege Iesu de au kase daratager neis le, kega, Uaba nole atomeret kak nerute le.

31 A neis le bakeamulei, a merkem abele mer abielam abele ged ge uridili.

32 Neis le bakeamulei; darasmerare, uiaba tegaret abele le te dabimdabim a demoni ko balu muige.

33 E abi imuare abele demoni; ege le mamoro mer etakalu, abele le te dabimdabim: ege lekub uiaba abi damarare, a mer detagerare, kega, Emeretalam meriba nole erdali nerute lu mokakalam Isaraela ge.

34 A Faresaio giz abielam detagerare, kega, Abele au demoni abi dog, abelelam E umele namuare demoni giz.

35 Ege Iesu deraueli gaire utebe uridili pako kebi utebe, a ereuerem uiaba sunago ge, a marau abele baselaia ra debe mer, E nadgirare gim le uridili, pako au asiasi gim le abele ged ge.

36 E nardare gaire lekub, epe E au nasenase uiaba, abelelam uiaba au sagim a dekaertare, mokakalam mamoe giz nole le asesered kak.

37 Ege E uiabi detagerare, abara kaimeg giz, Epe gaire abele saido isimare, a no neis neis le dorge;

38 Peike uaba damsare abele Opole, abara saido isimare, E ko namarkare uader le dorge abara saido isimare.