1 Ege E darabgerare abara kaimeg giz tuelf le, E uiabi nakuarare abele sirdam gaire adud lamar, a ko namuare uiabi, pako nadgirare gim le uridili, a pako au asiasi gim uridili.

2 Uiaba nei gaire apostolo tuelf le; a kekiam, Simona, abara nei Peteru, a Anederia abara keimer; a Iakobo Zebedaio ra uerem, pako Ioane abara keimer;

3 Filipo, a Batolomaio; a Toma, a Mataio telona le; a Iakobo Alefaia ra uerem, pako Lebaio abara nei Tadaio;

4 Simona Kanana le, pako Iuda Isakariota, E abi keserkeser.

5 Ege Iesu de namarkare uiaba tuelf le, E uiabi daratagerare, kega, Uaba nole bakeuare abele gab uiaba nogle giz, a ua ko nole bakeuare gaire Samaria utebem;

6 A debele ua bakeuare gaire mamoe Isaraela ra boai badimirida.

7 A ua bakeuare, a marau, kega, Kotor baselaia maike.

8 Ua nadgirare gim le giz, a darapare lepera le, a nakiamare eud le giz, a daramuare demoni giz: uaba turum nagri, a uaba ko naisuerare.

9 Uaba nole gol, a silua, a baras uaba uak:

10 Ua bakeuare nole aisare epei, a nole neis am uali, pako teter gab, a koket; abelelam abkoreb ikuar leuer abele le dorge ikeli.

11 Ese uteb pako kebi uteb ua baos, nautumerare nade abele le emeri abkoreb, a ua bameroa a ko bakeuare.

12 A ua barota nerute boai ge, uaba uiabi sererege a tag deguat.

13 Ese abkoreb abele boai, a ua ko nakuarare uaba debe mer; ese abele boai nole abkoreb, iako takomeda uabim uaba debe mer.

14 Ese le nole agared kak uabim, a nole asor kak uaba mer, a ua bakeuare adem abele metalam pako abele utebelam, uaba tekuei a teter gab ditkeda sep uaba teterlam.

15 Ageakar kaka uabi detagered, Abele itimer gerger kebi bodomalam Sodomaem a Gomoraem tumem abele uteb ge.

16 Dasmer, kaka uabi demarida mokakalam mamoe giz eipu gaire luko giz; abelelam uaba pardali mokakalam tabo, a au mapodan mokakalam lupe.

17 A ua bako le giz: abelelam uiaba uabi demarida abele mer atager, a ko uiaba uabi demarida uiaba sunago ge,

18 A uabi eguatumur tarima le a opole uiaba opem karielam, a ikeli ageakarem uiabim pako uiabim nogle giz.

19 Ese uiaba uabi demarida, uaba nole okadeskeda nako a nalu uaba mer detaut; abelelam E uabi etomeret abele haua ge nerute mer uaba detaut.

20 Abelelam uaba nole detaut, epe uaba Aba abara Lamar zogo detaut muige uabim.

21 Nerute le tabara narbet namarida ko eumid, a aba namarida abara omasker: a omasker giz tekue uiaba aba, iaueakai uiabi ipiti eumid.

22 Gaire le uridili uabi derar kara neilam; epe abele le niaiem tekuei bakedida mop ge, E ko eded.

23 Ese uiaba uabi dedkoli nerute uteb, a ua ko kored bakeuare nerute utebem; abelelam a ageakar kaka uabi detagereda, Umer kak uaba basiki Isaraela ra uteb uridili, mena Le la Uerem tabarki.

24 Nole aule ereuer le tumem abele le abi ereuerem, a ko nole aule abele memeg le tumem abara opole.

25 Au debele okakis ereuer le mokakalam abele le abi ereuerem, a ko abele memeg le mokakalam abara opole. Ese uiaba nei atker abele boai ra opole Belezebul, nako uiaba nole ikeli mokakalam abara boai?

26 Dasmerare, uaba nole geum kak uiabim; abelelam nole nerute lu ispili, a umele paret kak etomeret; a nole nerute lu mud ge, a umele etomeret.

27 Ege kara mer uabi detagereda kupikup ge, a uaba etomeret abele datki: a abele mer ua aserare uaba grip ge, a uaba etomeret tumem meta.

28 Uaba nole geum uader le uaba gem ipit eumid, a umer kak uiaba ipit eumid uaba lamar; a mamoro uaba geum abele le E umele dedkoli abele lamar pako gem Genaim.

29 Nako nole bodomalam neis kebi ebur abele asari? nole nerute abi abele sep ge a uaba Aba mamoro dasmeri.

30 A uaba mus uridili emetu etager.

31 Peike uaba nole geum kak, uaba aule tumem gaire kebi ebur giz.

32 Dasmerare, ese le kari etomeret gaire le la opem, a kaka ko etomeret abim kara Aba ra opem abele kotor ge.

33 Ese le kari asared le la opem, a kaka ko asared abim kara Aba la opem penoka kotor ge.

34 Uaba nole dikiaporauem kaka tabarki dekuarare mapodan abele geseb ge; kaka nole tabarki dekuarare abele mapodan, epe abele teibur aosos tulik.

35 Abelelam kaka tabarki dekuarare ueku abele le pako abara aba, a pako abele neur uerem ko ueku abara apu, a abele kosker ueku kimiar ra apu;

36 A ikeli le abara boai ko abi kurab ge.

37 Abele le au nasenas abara aba pako abara apu a E kebi omare karim, nole karim abkoreb; a abele le au nasenas abara uerem, pako abara neur, a E kebi omare karim, a ko nole abkoreb.

38 Ese le nole ais abara satauro, pako nole kari narmili, nole karim abkoreb.

39 Abele le erpei abara eded, a ko abi abielam; ege abele le dedkoli abara eded karielam, a ko nagri.

40 Abele le uabi egared, E kari egared, abele le kari egared, a E egared abele le kari namarid.

41 Abele le egared nerute perofeta a perofeta nei ge, E nagri bodomalam abele perofetalam; a abele le egared nerute le barkak tonar a le barkak tonar nei ge, E nagri bodomalam abele le barkak tonar.

42 Ese le abi ikuar no ni gebegeb abele tanelu ge abim nerute kebile ko eri, abele nei kaimeg giz, ageakar kaka uabi detagered, Nole abu kak abara bodomalam.