1 Abele kerker Heroda opole asoli Iesu ra tonar,

2 E uiabim detaut tabara memeg le, Ioane Bapataiso pedali, ko eded akaida eudelam, abelelam gaire adigir E ikeli.

3 Abelelam Heroda emetu erpei Ioane, a ko abi didbare, a abi aziriklu abele au dubare meta ge, epe Herodialam, Filipo ra kosker abi narbetelam.

4 Abelelam Ioane abi detaut, kega, Nole abkoreb ma abi ispi, a ko ekai mara kosker.

5 E lagelag abi ipiti eumid, epe E geum gaire le lakub, uiaba dikiaporare E perofeta pedali.

6 Ege abele gerger itutarare Heroda esemelu, Herodia ra neur ginar diger uiabi opem, E abi sererege Herodaim.

7 Abele lu E aukase abim detager, a mer nakesmulu, ko abim ikuar nerute lu E abi damos.

8 E, abara apu abi namarida, a abi detaut, kega, Ma kari ikuar ike, abele Ioane Bapataiso ra kerem abele tanelu ge.

9 Ege opole au asiasi, epe abele mer nakesmululam, pako gaire le eidi leuer eroare abi kemem, E mer tigri a abi ikuar.

10 E abi namarid nerute le ismi Ioane ra kerem abele au dubare meta ge.

11 Ege tais abara kerem abele tanelu ge, a abi ikuar abele neur; abele neur ko abi ikuar abara apu.

12 Ege abara kaimeg giz abim tabakeurare, a ais abara gem a etkobei; a uiaba bakeuare Iesuim, a abi etomertare.

13 Iesu abele asoli, E bakeamulu adem abele uteblam abele nar ge, E tepteb emeri abele lekak uteb ge: ege le lakub aserare, a uiaba abi irmilare tabakeuare tauer gab ge, gaire uteblam.

14 Ege Iesu bakeamulu, a uiaba nardarare abele gaire le lakub, abara nase baruk uiabim, E idigir uiaba gim le giz.

15 Bakedilu abele kikem, ege abara kaimeg giz abim tabakeuare, kega, Abele uteb le kak iridi, a niai niai abele gerger; ma uiabi namarkare abele le lakub, iaueakai uiaba bakeuare gaire uteb, leuer terapei a uiaba erolare.

16 Epe Iesu uiabim detaut, Nole abkoreb uiaba bakeuare; ua naisuerare, leuer, a uiaba erolare.

17 Ege uiaba abim detautare, Meriba nole leuer kak ike, epe no areto faif, a neis lar.

18 E uiabim detaut, kega, Karim tais ike.

19 E uiabim detaut abele gaire le lakub, Uaba eidi abele soge ge; E tais faif areto, pako neis lar, a edimrualu abele kotor, a esoao, a ko areto itur, a naisuerare tabara kaimeg giz, a abara kaimeg giz naisuerare abele le lakub.

20 Ege uiaba eroare, a kem osomeda ui uridili, a ui aratare kaier, tuelf gaire epei mitkar.

21 Uiaba eroare, nako faif thausan no kimiar, a kosker pako kebile giz nole atager kak.

22 Epe Iesu de dudum namarkare tabara kaimeg giz a atiem abele nar ge, kekiam bakeuare nerute apekem; E mena namarkare abele le lakub bakeuare.

23 E namarkare abele le lakub bakeuare, epe E tepteb ogi bakeamulu abele paser, a esorerapare. Bakedilu abele kikem, E tepteb abele uteb ge emrilu.

24 Abele nar muige abele karem ge, au zauber a nar agiri; abelelam uag opem uami.

25 Ege Iesu bakeamulu uiabi erdali, abele neis a neis abele ki ge le asesered, E ekasereder abele zauber tum ge.

26 Ege abara kaimeg giz ui abi erdalare, E ekasereder tumem abele zauber ge, ege uiaba okasosok, a uiaba dikiaporare, kega, Lamar pedali, ege uiaba au geum, a ko au sasemi.

27 Ege Iesu de sobkak uiabi daratagerare, kega, Uaba nerkep au saserim, kakanali, nole geum kak.

28 Epe Peteru abim detaut, kega, Opole ae, ese mamanali, ma kari natager kaka bakeam marim tumem abele gur ge.

29 Ege E abi detager, Ma tabakeam. Ege Peteru eupumalu abele narlam a ekasereder tumem abele gur ge, E bakeamulu Iesuim.

30 E dasmer abele au uag, a E geum ge, epe ditimedlu a badimedlu, a ereretikri, kega, Abele Opole ae, ma kari uerkaben.

31 Ege Iesu de tag itrimuriklu, a abi erpeilu, a abim kega, Mama le kebikebi oituli, nalugelam mama asared?

32 A uiaba neis le atiem abele nar ge, epe metalug, a nole uag kak.

33 Ege uader le muige abele nar tabakeuare abim esorgiru, a mer kega, Ageukar mamanali Ade ra Uerem.

34 Uiaba akarida abele nerut apek, a bakedilu abele ged Genesareta.

35 Gaire ged kemle uiaba abi erdali, a merkem namarkare abele pekem uridili, a uiaba taraisare abim gaire gim le giz uridili.

36 Uiaba abi daramasare no kebikebi ituti uba ge abara am uali; a idigir uiaba gim uridili no kebikebi abi ituti.