1 Ege aotale le pako Faresaio giz uiaba tabakeuare Iesuim Ierusalemlam, kega,

2 Nalugem mara kaimeg giz datupida aule giz uiaba mer? abelelam uiaba leuer eroli a tag nole ogarup kak.

3 E etkalu uiabim, kega, Nalugem ua ko datupida Ade ra gelar gaire aule ra mer?

4 Abelelam Ade detaut, kega, Ma mamoro asoli mabi abera a apuera; a, Nerute abele le adud mer abele baba pako abele apu, a ko ipit eumilu.

5 Epe uaba detagerare, kega, Ese le detaut abele aba pako abele apu, Ese nerute lu kari dog abkoreb marim, abele emetu Adim ikuar peike;

6 A nole ko asoli taba abera a apuera. Uaba dedkoli Ade ra gelar mokakalam, uaba emereta merlam.

7 Uaba bes le giz, abkoreb uabim abele Isaia ra mer epili, kega,

8 Abele ged uiaba karim maiem uiaba telam, pako kari naospered uiaba mitelam; ege uiaba nerkep muriz ge karielam.

9 Uiaba no kari esorerapare, uiaba ikerare abele mizmiz le ra gelar.

10 Ege E dabgerare abele gaire le lakub, E uiabim detaut, Ua aserare a mamor asoli:

11 Abele lu ikedilu le ra te nole le dedkoli; epe abele lu osmeda telam le dedkoli.

12 Ege abara kaimeg giz abim tabakeuare, a abim kega, Nako ma umele gaire Faresaio giz mari ueku, uiaba asarare abele mer?

13 E etkalu, kega, Gaire lu uridili kara Aba penoka dali kotor ge nole amorda kak, E eiu adem.

14 No dikaer uiabim: uiaba sadamer le ko datkimoardare sadamer le. Ese abele sadamer le datkimoardare nerute sadamer le, epe uiaba neis le ekesmiri abele au uak.

15 Ege Peteru abim detaut, kega, Ma keribi etomeret abele mer babisdarie.

16 Ege Iesu detager, Nako uaba mena nole asor kak?

17 Nako uaba mena umer kak, gaire lu uridili ikedi abele te a ko irmi abele kem ge, ege imuda abele sumez ge?

18 Ege gaire lu tabakeuare a osmeda abele telam, epe giz nerkeplam; abele lu le dedkoli.

19 Abelelam nerkeplam tabakeam abele adud dikiapor, a le ipit eumilu, a kogem, a eruam, a bes mer, pako adud mer:

20 Gaire lu peike le dedkoli; ege abele le leuer eroli a tag nole aruba kak, umer kak le dedkoli.

21 Ege Iesu bakeamulu adem abele utebelam, E osmeda abele ged Turo a Sidona.

22 Dasmer, ababe Kanana kosker E tabarki abele peklam, a ereretikri abim, kega, Abele Opole ae, Dauida ra Uerem, ma kari omare, kara neur au adud abele demoni nagri.

23 Epe E nole mer kak abim. Ege abara kaimeg giz abim tabakeuare abi damsare, kega, Ma abi namarid ege bakeamulu, abelelam E mena meribi irmili a ereretikri.

24 E etkalu, kega, Ade nole kari namarida uader le, no mamoe Isaraela ra boai badimirida.

25 Ege E tabakeam abim a etkobeilu, kega, Abele Opole ae, ma kari upinati.

26 Ege E etkalu, kega, Nole abkoreb omasker ra leuer ko ais batauered omai giz.

27 E abi detager, Abele Opole ae, ageakar marim: epe nerute omai giz eroare puipi leuer abi laulau ge uiaba tebude.

28 Ege Iesu abim detager, kega, Kosker ae, mara oituli aule: mara lag mokakalam a ko ikeli abkoreb marim. Epe abara neur ko akaida abele haua ge.

29 Iesu bakeamulu adem abele utebelam, E osmeda maike abele Galilaia keper ge; E ogi abele paserem, a emrilu seb ge.

30 Ege abim tabakeuare gaire le lakub, uiaba nagri uader le ibibi, a uader le sadamer, a uader le te dabimdabim, a uader le gebgeb, pako uader le gaire tonar gim, uiaba abi ituti Iesu ra teter ge; E uiabi nadgerare:

31 Ege gaire le lakub abi damreda, abelelam uiaba abi erdarare uader le te dabimdabim a mer detaut, a uader le gebgeb ko kemerkemer, a uader le ibibi ko nakasir, a uader le sadamer ko darasmerare; ege uiaba abi despereda abele Isaraela Ade.

32 Ege Iesu darabgerare abara kaimeg giz, kega, Kaka niabi nasenase abele le lakub, abelelam thri gerger peirdi uiaba emri kari dog, a nole leuer kak. Kaka umer kak uiabi namarkare ko bakeuare, a nole leuer aro kak, mena uiaba uererege abele gab ge.

33 Ege abara kaimeg giz abi detagerare, Meriba nagelam gaire areto nagri abele sumez ge, iaueakai dordor le ra kem osmeda?

34 Iesu uiaba daratgerare, kega, Nako naket areto uabi dog? Ege uiabi detager, Sefen; a uader kebi lar.

35 E uiabi daratagerare abele gaire le lakub, Uaba baidi abele seb ge.

36 E etaruk sefen areto a uader lar, a esoao, a itur, epe abi naisuerare abara kaimeg giz, a abara kaimeg giz ko naisuerare dordor le lakub.

37 Ege uiaba uridili eroare, a kem osmeda; a uiaba etaker abele leuer kaier, a mitkar sefen gaire epei.

38 Uiaba le eroarem foa thausan no kimiar, a kosker pako kebile giz nole atager kak.

39 E uiabi namarkare abele le lakub bakeuare, E bakeamulu, a atiem abele nar ge. E bakeamulu abele ged Magadalena.