23
Turo hanua totona peroveta hereva
1 Peroveta hereva Turo hanua totona be inai:
Tarasisi ena lagatoi taudia e,
do umui taitai,
badina be emui gabu Turo,
be ia makohia ore vadaeni.
Emui ruma,
bona emui lagatoi kamokau gabuna,
be idia dika vadaeni.
Kupro tano dekena amo umui giroa mai neganai,
inai sivarai dika madi umui kamonai.
2 Turo kone taudia e,
bona umui Sidono ena hoihoi taudia e,
lalohisihisi dainai do umui hereva lasi.
Umui ese lagatoi taudia umui siaia, davara idia hanaia,
Aigupito ena uiti do idia hoia totona.
3 Davara idauidau dekenai idia laolao,
bona umui ese Sihoro ena uiti,
bona Naila Sinavai tano ena aniani umui haboua.
Bese idauidau taudia momo dekenai,
gau idauidau umui hoia lao.
4 Sidono hanua e, do oi hemarai.
Oi be davara ena gabu aukana ta,
to davara ese,
oiemu dika ia herevalaia vadaeni.
Ia gwau,
“Lau ese natuna ta lau havaraia lasi,
bona lau ese,
uhau bona kekeni lau ubua bona naria lasi.”
5 Aigupito taudia danu,
be do idia lalohisihisi bada,
Turo ia dika ena sivarai do idia kamonai neganai.
6 Turo motumotu taudia e,
mai taitai danu Tarasisi dekenai do umui heau lao.
7 Turo hanua e,
guna oi be oi moale bada herea,
to hari be lasi!
Idaunegai momokani oi idia haginia.
Oi ese oiemu taunimanima momo oi siaidia,
davara idia hanaia,
noho gabu matamatadia idia haginia, ani?
8 Turo e,
oi ese basileia momo oi haginia.
Oiemu kohu hoia taudia,
be lohia taudia momokani,
bona oiemu hoihoi taudia,
be mai edia ladadia tanobada ibounai dekenai.
Daika ese inai dika oi dekenai ia palania vadaeni?
9 Siahu Ibounai Lohiabada ese ia palania vadaeni,
Turo ena hekokoroku bona ena hairai do ia haorea totona,
bona tanobada dekenai idia noho ladana bada taudia ibounai,
do ia hamanaua totona.
10 Tarasisi hahine taudia e,
emui tano do umui geia noho,
Naila Sinavai dekenai idia karaia bamona,
badina emui lagatoi kamokau gabu namona be ia boio vadaeni.
11 Lohiabada ese iena imana,
be davara ena ataiai ia abia isi vadaeni,
bona ia ese basileia ia hadikaia vadaeni.
Ia ese oda ia gwauraia vadaeni,
inai hanua,
hoihoi taudia edia gabu aukadia, be do idia hadikaia ore.
12 Lohiabada ia gwau,
“Sidono hanua e, oiemu moale be ia ore,
bona oiemu taunimanima be idia hisihisi noho.
“To bema Kupro dekenai idia heau neganai,
unuseni danu,
be maino do idia davaria lasi.”
13 Asuria taudia be lasi,
to Babulonia taudia ese idia karaia.
Idia ese Turo be uda boroma edia gabu idia halaoa.
Idia ese Turo hanua idia koua hagegea,
iena magu badinai be tano idia haboua,
hanua ena kohoro badadia idia hamorua,
bona Turo hanua idia hadikaia ore momokani.
14 Tarasisi ena lagatoi taudia ibounai e, do umui taitai,
badina emui gabu aukana Turo be ia dika vadaeni.
15 Unai neganai, taunimanima ese lagani 70 lalonai Turo do idia laloaboio. Unai be king ena mauri lagani hegeregerena. Unai lagani 70 idia doko neganai, kara ta be Turo dekenai do ia vara, ariara hahine ena ane bamona:
16 Ariara hahine e,
oi be idia ese idia laloaboio vadaeni.
Oiemu gita do oi abia,
hanua lalonai do oi raka loaloa,
gita do oi gadaralaia namonamo.
Ane momo do oi abia,
vadaeni idia ese oi do idia laloa lou gwauraia.
17 Lagani 70 idia ore neganai, Lohiabada ese Turo do ia vadivadi henia. Vadaeni Turo ese iena hoihoi karadia ma do ia karaia lou, bona tanobada ena kopina latanai, basileia ibounai dekenai, iena kara gunadia do ia karaia lou. 18 To Turo taudia ese hoihoi dekena amo idia davaria moni, bona edia gaukara davana moni, be do idia hahelagaia, Lohiabada ena. Unai moni bona kohu do idia haboua lasi, to do idia henia, Lohiabada ena vairanai tomadiho gaukara idia karaia noho taudia, edia aniani bona dabua totona.