1 Kamonai! Lohiabada ese tanobada do ia hadikaia,

bona tano kaukau do ia halaoa.

Ia ese tanobada ena kopina do ia mogea,

bona tanobada noho taudia,

do ia lulua lao gabu idauidau dekenai.

2 Hanua taudia dekenai do ia vara hegeregerena,

be hahelagaia taudia dekenai danu do ia vara.

Hesiai taudia dekenai do ia vara hegeregerena,

be biaguna taudia dekenai danu do ia vara.

Hesiai kekeni dekenai do ia vara hegeregerena,

be iena biaguna hahine dekenai danu do ia vara.

Kohu ia hoia tauna dekenai do ia vara hegeregerena,

be davana ia abia tauna dekenai danu do ia vara.

Heniatorehai tauna dekenai do ia vara hegeregerena,

be abiatorehai tauna dekenai danu do ia vara.

Kohu momo tauna dekenai do ia vara hegeregerena,

be ogogami tauna dekenai danu do ia vara.

3 Tanobada be do ia dika momokani,

gau namona ta do ia noho lasi,

badina be Lohiabada ese,

inai hereva ia gwauraia vadaeni.

4 Tanobada ena tau badadia do idia taitai.

Tano ia kaukau dainai,

taunimanima bona mauri gaudia,

be do idia manoka lao noho.

Guba ese medu do ia hadihoa lasi,

bona tanobada do ia dika lao.

5 Tanobada noho taudia ese,

tanobada idia hamiroa vadaeni,

badina idia ese Dirava ena taravatu bona oda idia makohia,

bona Dirava ena gwauhamata taravatuna,

noho hanaihanai gauna,

idia utua vadaeni.

6 Unai dainai Dirava ese tanobada ena latanai,

iena hadikaia hereva ia atoa vadaeni,

bona tanobada noho taudia,

be edia kara dika dainai idia hisihisi noho.

Do mauri noho taudia be tamona tamona sibona.

7 Uaina matamata be momo lasi,

bona vain audia idia mase noho.

Guna idia moale bada taudia be idia lalohisihisi noho.

8 Tareko ena regena be ia ore vadaeni.

Moale taudia edia gadodia,

bona edia gita moalena,

be ta ese ia kamonai lou lasi.

9 Mai ane danu uaina idia inua lou lasi,

bona inuinu kekero ena mamina be dika,

inua taudia dekenai.

10 Hanua badana be ia dika vadaeni,

bona ruma ibounai be idia koua bona lokaia,

tau ta do ia raka vareai garina.

11 Ariara edia lalonai,

taunimanima be uaina totona idia boiboi noho.

Moale ibounai idia ore vadaeni.

Tanobada ena moale ibounai ia boio vadaeni.

12 Hanua badana be ia dika vadaeni.

Iena magu iduara be idia hamakohia maragimaragi vadaeni.

13 Inai bamona do ia vara,

tanobada ena bese idauidau ibounai dekenai,

tanobada be olive audia ibounai idia botaia ore negana bamona,

bona vain audia dekena amo huahua ibounai idia haboua vadaeni,

bona momoru idia gogoa noho bamona.

14 Do mauri noho taudia ese,

mai moale danu ane do idia abia.

Dina diho kahana taudia ese,

Lohiabada ena hairai do idia hanamoa bada,

15 ma dina daekau kahana taudia danu,

ese Lohiabada do idia hanamoa.

Kone dekenai noho taudia danu ese,

Lohiabada, Israela ena Dirava do idia hanamoa bada.

16 Tanobada ena daudau gabudia dekena amo,

edia hanamoa ane do ita kamonai,

do idia gwau,

“Kara Maoromaoro Dirava ita hanamoa bada noho.”

To lau gwau, egu dala ta be lasi!

Egu tauanina be ia ore ia lao noho!

Badina be kara dika taudia idia kara dika noho,

bona koikoi dekenai taunimanima idia hadikaia taudia ese,

unai koikoi idia karaia noho.

17 Tanobada noho taudia e,

lau dekenai do umui kamonai.

Gari bada herea, guri, bona tarapu be umui totona idia naria noho.

18 Gari gauna dekena amo ia heau tauna be guri lalonai do ia moru,

bona guri dekena amo ia heau mauri tauna be tarapu ese do ia abia.

Badina be guba ena iduara,

be do idia kehoa,

bona tanobada ena badina nadidia,

be do idia mareremarere.

19 Tanobada be do ia makohia momokani.

Tanobada be do ia makohia parara.

Tanobada be do ia heudeheude bada momokani.

20 Tanobada be do ia marere kerere,

kekero tauna bamona,

bona palai ruma,

lai bada ese ia doria auka neganai bamona.

Tanobada be iena kara dika dainai ia metau herea.

Unai dainai do ia moru,

bona do ia toreisi lou lasi.

21 Unai dina dekenai Lohiabada ese,

dika ena davana do ia henia,

guba ena siahu taudia edia dika,

bona tanobada ena king taudia edia dika danu.

22 Dirava ese unai taudia do ia haboua,

abia mauri taudia guri lalonai bamona.

Dibura ruma ena lalonai,

ia ese idia do ia koua,

bona unuseni do idia noho nega daudau.

Unai murinai edia dika davana do ia henidia.

23 Hua be do ia dibura,

dina danu be do ia diari lasi.

Badina be Siahu Ibounai Lohiabada be do ia King.

Ia ese Siona Ororo,

bona Ierusalema dekenai do ia lohia,

bona unai gabudia edia lohia taudia ese,

Lohiabada ena hairaina do idia itaia.