4
Iit tanim mbesooŋa pa tutuuŋ muul maau.
1-2 Saveeŋ tiou tonene, pughu tovene: Ighaze tamtoghon eta iza pa iŋgin mbeb tisob to tama, nene irau iŋgin mbeb tonenen rikia maau. Sawa to ye paini, taghita taghaze nepooŋ toni, nene ilib pa yes mbesooŋa to tama maau. Pasa, ye ineep ila mbesooŋa pida sambadi, ve tiŋgini toman mbeb toni tonowen. Ve ye pale ineep tovene le tiza pa sawa to tama ighuri, ghoro igham mbeb toni tonenen, ve tau iŋgin di. 3 Yei Yuda tovene paam. Muuŋ, nineep ninimale yes ndipain to tipatoot di pa ŋgar. Sawa tonenen, nimbesmbees pa tutuuŋ naol to tisavia mbeb to taan.* Ataam ite to tatoor saveeŋ waaro tonene, nene vene: “Sawa tonenen, taneep tanimale mbesooŋa sorok pa avuvu samsamiadi to tiŋgin mbeb pida to sambam ve taan.” Ga 3:23
4 Nineep tovene le niza pa sawa kat to Maaron ighuri, ghoro imbaaŋ tau Natu izi inim taan. Liva eez to taan ipoopa. Ve ye ineep ila tutuuŋ samba, ve itaghon katin tutuuŋ le isob. Mt 5:17; Yo 1:14
5 Ye inim pa igham mulin yei to nineep ila tutuuŋ samba. Leso ninim mbesooŋa sorok pa tutuuŋ muul sob, ve ninim Maaron ndinatu. Yo 1:12; Ro 8:14+; Ga 3:13; 1Pe 1:18+
6 Ve yam paam, anim Maaron ndinatu wa. Tauto Maaron imbaaŋ Natu Avuvu ila lolomim. Avuvu tonowen igham ghiit tapoi Maaron taghaze: “Abba, tamaŋ!”† Ndipain to Israel tiwatwaat nditamandi ila taudi aliŋadi tighaze ‘Abba’ inimale ndipain toit tighaze ‘tamaŋ’ o ‘amaŋ.’
7 Tovenen aazne, yam anim mbesooŋa sorok muul maau. Pasa, Maaron igham gham anim ye tau ndinatu wa. Ve ighaze ye ndinatu yam, ghoro izamim pa ghamuuŋ nepooŋ poia ila toni. Ro 8:17; Ga 3:29
Paulus lolo imbumbu pa yes Galesia
8 Muuŋ, yam awatag Maaron maau. Sawa tonenen, yam anim mbesooŋa sorok pa mbeb soroksorok naol to Maaron tau maau. 1Kor 8:4+, 12:2
9 Eemoghon aazne, yam awatag Maaron wa. Aiss, nasaav vene malep. Maaron to iwatag gham ve igham gham anim le wa. Tovenen pughu vena to aazne yam apul murimim pani, ve aghaze amuul pa gabuamim muŋgina, ve ataghon tutuuŋ naol to taan to ledi tapiridi irau to tiuul gham ne maau?‡ Ataam ite to tatoor saveeŋ waaro tonene, nene vene: “Tovenen pughu vena to aazne, yam apul murimim pani, ve aghaze amuul pa gabuamim muŋgina, ve anim mbesooŋa pa avuvu pida to ledi tapiridi irau to tiuul gham maau?” 10 Aazne, yam matamim iŋgalŋgal sawa to kaiyo iza paghu, ve sawa to ndaman paghu, ve sawa pida to aghur di tinim sawa to suŋuuŋ itaghon ŋgar to yes Yuda. Kol 2:16,20 Hib 7:18
11 Tauto agham ghou lolog imbumbu pa uraat tiina to naghami ila lolomim. Pale ighur anoŋa, ma inim mbeb sorok?
Paulus itaŋ roran yes Galesia
12-13 Yam toŋvetaz, aghita. You napul ataam to taghoniiŋ tutuuŋ, ve nataghon yam to Yuda maau ne pa gabuamim. Tovenen aazne, nataŋ roran gham naghaze atoor ŋgar tiam, ve amuul anim ataghon ghou pa ŋgar to you naghamghami. Saveeŋ tiou tonene, nasavia pasa naghaze yam agham sosor payou, nene maau. Yam awatag: Sawa to nalat ve navotia varu poia payam muuŋ, you namorooŋ. Tauto nazalat naneep toman gham. 1Kor 2:3
14 Moroghooŋ tiou igham pataŋani tiina payam. Eemoghon matamim velegin ghou, ma azurun ghou maau. Yam apakur ghou kat, inimale you aŋela eta to Maaron, ma Yesu Krisi tau. 15 Sawa tonenen, yam tinimim iza kat pa poia to Maaron to iza tiam. Eemoghon aazne, tinimim iza muul maau. Nene vena? Onoon kat, you nasaav payam: Sawa tonenen, lolomim pa auul ghou kat. Irau aŋguruut mbeb eta payou maau. Inimale yam irau auul ghou pa matamim, tone apasi ve agham payou! 16 Vena, you nasavia saveeŋ onoon payam, tauto aghaze naghur koi payam?
17 Ndiran to tizuaria di pa ghamuuŋ lolomim, ŋgar todi poia maau. Yes tighaze tigham gham apul ghou, leso ataghon di pa ŋgar todi. 18 Sawa isob, ighaze tazuaria ghiit pa ghamuuŋ ŋgar popoia, nene poia. Tovenen sawa to naneep toman gham maau, yam irau matamim kisin ŋgar poia ve ataghoni. 19 O ndinatug, ŋgar to aghami, nene igham pataŋani tiina payou muul. You nanimale liva to apo iyabyab pa popaaŋ. Ve you pale nambaad pataŋani tonene le irau ŋgar to Krisi ivot inim tiina ila lolomim. Ro 8:29; 1Kor 4:15
20 Oyai, pale nagham vena payam? Aazne, naneep mala payam. Inimale itiŋa taneep, tone yam agham saveeŋ ila taug avog, ve nasavia saveeŋ popoia pida pa nauul ŋgar tiam.
Saveeŋ palelaaŋ to Agar ve Sara
21 Yam to aghaze aneep ila tutuuŋ samba, asaav payou lak. Yam alooŋ saveeŋ to tutuuŋ, ma maau? 22 Pasa, Maaron aliŋa to timbooda, isaav tovene: Abaram ndinatu ru. Eez ivot ila to Agar, ye liva to mbesooŋa sorok. Ve ite ivot ila to azuwa Sara to ruum tau. Mbnp 16:15, 21:2
23 Liva mbesooŋa natu, ye ivot itaghon ataam to iit tamtoghon to taan. Ve liva to mbesooŋa maau ne natu, ye ivot itaghon saveeŋ mbuaaŋ to Maaron. Mbnp 17:16+, 18:10+; Ro 9:7+; Hib 11:11
24 Saveeŋ tonene, nene saveeŋ palelaaŋ. Pasa, ndiliva ru tonowen tipatooŋ ghiit pa ataam ru to tamtoghon titaghon di leso yesŋa Maaron tilup di tinim ee moghon. Agar, ye inimale ataam to tutuuŋ to ivot izi lolooz Sinai. Yes to titaghon ataam tonowen, tineep tinimale mbesooŋa sorok. 25 Lolooz Sinai, nene ineep taan suruvu to Arabia. Agar, ye inimale lolooz tonowen ve ndug Yerusalem to aazne ineep izi taan. Pasa, ndug tonowen tamtoghona tinim mbesooŋa sorok pa tutuuŋ. 26 Eemoghon Yerusalem tau to ineep izi sambam, tamtoghona tinim mbesooŋa sorok maau. Yes ndug tau. Yerusalem tonowen, to inim iit tinaan. Ro 8:15; Hib 12:22; Syg 21:2,10
27 Pasa, Maaron aliŋa to timbooda, isaav ighaze:
“Yom liva to upoop maau, tinim iza!
Yom liva to uyamaan yabyabuuŋ pa popaaŋ sone, lolom poia ve aliŋam iza!
Pasa, liva to azuwa ipul muri pani, nene pale ndinatu katindi ve tilib pa liva to ye le azuwa ne ndinatu.”§ Muuŋ, lupuuŋ to yes Israela toman Maaron poia. Eemoghon yes ival maau. Sawa tonenen, yes tineep tinimale liva to ye le azuwa. Eemoghon sawa naol, tizoor Maaron aliŋa. Tovenen muri, ye ipul muri padi, ve ipul di tila yes Babilona ve ndug pida nimadi. Sawa tonenen, yes tineep tinimale liva to ipoop maau, ve azuwa ipuli. Aazne, ila uraat to Krisi, Maaron igham ival tiina to ndug ndug tinim ndinatu. Yes Yuda, ve yes to Yuda maau ne paam. Yes to tinim Yerusalem to sambam ndinatu. Is 54:1
28 Yam toŋvetaz, yam animale Sara natu Isak. Pasa, saveeŋ mbuaaŋ to Maaron inim ataam payam ve anim ye tau ndinatu. Ro 9:8
29 Ve matamim iŋgal imuul ila pa ŋgar to muuŋ Ismael igham pa Isak. Ŋgeu to ivot itaghon ataam to iit tamtoghon to taan, ye ighur pataŋani pa tazi to ivot ila Maaron Avuvu tapiri. Aazne, ŋgar raraate ivotvot. Pasa, yes to titaghon ataam to tutuuŋ, tighurghur pataŋani pa iit to Maaron Avuvu igham ghiit tanim ye tau ndinatu. Mbnp 21:9; Ga 5:11, 6:12
30 Ve Maaron aliŋa to timbooda, isaav vena? Isaav tovene:
“Uzurun liva mbesooŋa yesuru natu tila saguan! Pasa, liva mbesooŋa natu irau ineep toman liva to ruum tau ne natu, ve yesuru tiyoon pa mbeb to tamandi ne maau.” Mbnp 21:10; Yo 8:35
31 Tovenen yam toŋvetaz, alooŋ. Iit liva mbesooŋa ndinatu maau. Iit tinaan, ye ruum tau. Ga 3:29, 5:1,13
*4:3: Ataam ite to tatoor saveeŋ waaro tonene, nene vene: “Sawa tonenen, taneep tanimale mbesooŋa sorok pa avuvu samsamiadi to tiŋgin mbeb pida to sambam ve taan.”
†4:6: Ndipain to Israel tiwatwaat nditamandi ila taudi aliŋadi tighaze ‘Abba’ inimale ndipain toit tighaze ‘tamaŋ’ o ‘amaŋ.’
‡4:9: Ataam ite to tatoor saveeŋ waaro tonene, nene vene: “Tovenen pughu vena to aazne, yam apul murimim pani, ve aghaze amuul pa gabuamim muŋgina, ve anim mbesooŋa pa avuvu pida to ledi tapiridi irau to tiuul gham maau?”
§4:27: Muuŋ, lupuuŋ to yes Israela toman Maaron poia. Eemoghon yes ival maau. Sawa tonenen, yes tineep tinimale liva to ye le azuwa. Eemoghon sawa naol, tizoor Maaron aliŋa. Tovenen muri, ye ipul muri padi, ve ipul di tila yes Babilona ve ndug pida nimadi. Sawa tonenen, yes tineep tinimale liva to ipoop maau, ve azuwa ipuli. Aazne, ila uraat to Krisi, Maaron igham ival tiina to ndug ndug tinim ndinatu. Yes Yuda, ve yes to Yuda maau ne paam. Yes to tinim Yerusalem to sambam ndinatu.