12
Yesu ipatooŋ ghiit pa ŋgar to tayoon ariaŋa
1 Ival tiina to muuŋ to ŋgaramus nasavia di ne, nene inimale tiyoon luvutin ghiit ve tipariaaŋ ghiit pa taghur ila. Ighaze venen, pale tagham vena? Nepooŋ toit, nene inimale taneep ila landooŋ tiina, ve talaan soso mala. Tovenen mbeb naol to tipataŋan ghiit pa landooŋ, toman ŋgar samsamia to tikau ghiit ne, iit irau tapul di tisob tineepledi. Ve talaan toman tapiriid taghon ataam to Maaron ighuri pait, ve takiskisi tovene le tapasob landooŋ toit. 1Kor 9:24+; Pil 3:13+; Hib 10:36
2 Ve mataad ila pa mbeb ite paam malep. Mataad ila pa Yesu moghon, ve talaan taŋarua tala. Pasa, ye to imuuŋ pait ve ipatooŋ ghiit pa ataam to taghur ila. Ve ye to pale igham uraat pait le ghurla toit ivot kat le deŋia moghon ila Maaron mata. Aghita. Ye imbaad pataŋani, ve tirabi imaat izala ai pambarooŋ. Eemoghon ye ighita mayaŋiiŋa tonowen inimale mbeb sorok. Pasa, ye iwatag: Ighaze itaghon katin Maaron ŋgar toni, nene pale muri ineep pooi toman tini iza. Tauto aazne, ye ineep ila pa Tama Maaron nima waan igharau ina to ghamuuŋ pooz. Pil 2:8+; Hib 1:3, 3:1
3 Onoon, sawa to ye ineep izi taan, ndiran samsamiadi tighur koi pani, ve tizorzoora. Eemoghon ye iyoon ariaŋa pa badooŋ pataŋani tonowen. Tovenen matamim kisin ŋgar to ye ighami, ve ataghoni. Pa vene, pataŋani tiam itatan gham le tapirimim isob. Lu 2:34; Syg 2:3
Maaron ipul pataŋani pida tivot pa ndinatu, leso ipasaluŋgan di
4 Onoon, yam aparab ariaŋa pa atatan samia tapiri. Eemoghon tiam eta siŋ toni imaliŋ sone. 5 Yam avaat lolomim imaagh pa saveeŋ palotiiŋ eez to iŋarua yam to anim Maaron ndinatu ne? Isaav tovene:
“Natug, ighaze Ŋgeu Tiina ighur pataŋani eta payom pa ipasaluŋgan ghom, ughita inimale mbeb sorok malep. Ugham ŋgar pani pooi.
Ve ighaze iyaan ghom, lolom isami malep.
6 Pasa, tamtoghon tisob to Ŋgeu Tiina lolo ineep todi, ye ipasaluŋgan di.
Ve tamtoghon tisob to ye igham di tinim ndinatu, ye iloslos di, leso igham di tighilaal.” Np 3:11+; Yems 1:12; Syg 3:19
7-8 Tovenen ighaze pataŋani eta ivot payam, ayoon ariaŋa ve ambaada moghon. Pasa, pataŋani tonanan, nene ataam to Maaron ipasaluŋgan gham. Ye ighamgham tovene pa ndinatu tisob. Aghita. Ighaze pain eta igham sosor, pale tama ipuli? Maau. Ndipain tisob, nditamandi tipasaluŋgan di. Ve Maaron tovene paam. Ye ighurghur pataŋani ivotvot pa ndinatu tisob, leso ipasaluŋgan di. Eemoghon ighaze ye ipasaluŋgan gham maau, nene ye ndinatu yam maau. Yam animale ndipain to ledi nditamandi maau. Lo 8:5; Np 13:24
9 Ve mbeb ite paam. Iit tawatag: Nditamaan to taan tigham toon ve tiloslos ghiit, leso tipasaluŋgan ghiit. Ve sawa to tigham tovene, iit taroron padi ve neneeŋaad moghon. Ighaze venen, vena pa Tamaan Maaron to iŋgin anunuud ne? Pasa, ye ilib pa nditamaan to taan. Tovenen ighaze ye ighur pataŋani eta pait pa ipasaluŋgan ghiit, tapul tauud ila ye nima, ve tambaada moghon. Leso muri, tagham nepooŋ poia. 10 Nditamaan to taan tipasaluŋgan ghiit pa sawa tuku moghon, ve titaghon ŋgar to taudi tighita tighaze poia. Eemoghon Tamaan Maaron, ye ipasaluŋgan ghiit, leso iuul ghiit kat ve tataghon ŋgar patabuaŋ tanimale ye tau. 1Pe 1:15+; 2Pe 1:4
11 Onoon, sawa to tilos ghiit, lolood poia maau. Lolood ipataŋan. Ve ighaze Maaron ighur pataŋani pait pa ipasaluŋgan ghiit, nene pale ŋgara raraate moghon. Eemoghon lolood ipataŋan pani kat malep. Pasa, ighaze pataŋani tonenen igham ŋgar toit ivot, nene pale muri tataghon ŋgar deŋia, ve taghita anoŋa tovene: Itiŋa Maaron pale talup ghiit tanim ee moghon, ve taneep toman lolood luuma. Yems 3:17+
12 Yam pida animale tamtoghon to ilaan soso mala, le tapiri isob, ve nima ve aghe ipaspas. Eemoghon apariaaŋ taumim ve akiskis landooŋ le apasobi! 2Tim 4:7
13 Ve matamim iŋgal pa ataghon ataam deŋia to Maaron moghon. Leso apalot nditamim pida to tiyoon ariaŋa sone, ve ghurla todi ivot inim tiina le iyaryaaŋ. Tovenen apatum gham. Pa vene, ayel pa ataam to Maaron, ve agham di titap le tisami kat. Np 4:26
Tataghon ŋgar to taan tanimale Esau malep
14 Azuaria gham pa apatooŋ ŋgar luuma pa tamtoghon tisob, ve yamŋa alup gham anim ee moghon. Ve azuaria gham pa ŋgar patabuaŋ. Pasa, tamtoghon to ighaze itaghon ŋgar patabuaŋ maau, nene irau ighita Ŋgeu Tiina maau. Mt 5:9; Ro 12:18; 2Kor 7:1; 1Pe 1:15+
15 Yam apatum gham. Pa vene, ŋgar samia izeev tiam eta, ve ipul muri pa Maaron ve poia toni. Tamtoghon tovene, ye inimale waraman to itub iza ila lolomim. Ye pale iwaghamuni tamtoghon katindi, ve igham di tisami ila Maaron mata. Lo 29:18; 2Kor 6:1; Hib 3:12
16 Ve tiam eta ighur maat malep. Ve eta ipul muri pa Maaron, ve ŋgar toni iyaryaaŋ pa mbeb to taan moghon inimale Esau malep. Iit tawatag: Esau, ye ŋgeu aidaba, ve iza pa igham mbeb naol to tama. Eemoghon igham ŋgar pa mbeb tonenen maau, ve irabolin iza tonowen pa sur rubruub ee moghon kat. Mbnp 25:29+
17 Ve yam awatag. Muri, Esau ila to tama ve ighasoni ariaŋa ighaze ighur poia to Maaron iza toni. Eemoghon tama izugua. Esau izoorndug pani, ve itaŋ tiina. Eemoghon sosor to ye ighami, le ataam eta pa igharaata muul maau. Mbnp 27:30+
Ataam paghu to tala tagharau Maaron ilib pa ataam muŋgina to ivot izi lolooz Sinai
(Igham 19:12+, 20:18+)
18-19 Aazne, yam anim avot ndug to irau aghita pa matamim ve akisi pa nimamim animale yes Israela ne maau. Muuŋ, sawa to Maaron ivot todi izi lolooz Sinai, yes tighita yab to ighanghan izala lolooz Sinai daba, toman yaghur tae asosooŋa to ikau lolooz tonowen. Ve tighita ndoroom tiina, ndug milia, ve yaghur tiina. Ve tilooŋ mbeb to avolutu inimale tavuur itaŋ tiina. Ghoro tilooŋ Maaron aliŋa. Tauto matughezaaŋ tiina igham di le tisami kat. Ve titaŋ roran Mose tighaze isaav pa Maaron, leso isavsaav padi muul sob. 20 Pasa, timatughez pa tutuuŋ ariaŋa to Maaron isavia padi ighaze: “Tamtoghon ma ŋgai eta ighaze itut lolooz pughu, yam arabi pa yaam le imaat.” 21 Mose ighita mbeb naol tonowen, le ye paam imatughez kat, ve isaav ighaze: “Matughezaaŋ igham ghou le tinig irur kat!”
22 Eemoghon yam, aazne anim avot ndug tovene maau. Krisi igham gham anim avot lolooz Zion wa. Nene Yerusalem to sambam, ndug tiina to Maaron mata yaryaara. Aŋela ndiŋndiŋ ndiŋndiŋ tiluplup di tonowe toman tinidi iza. Ga 4:26; Pil 3:20; Syg 21:2
23 Ve yam aneep ila lupuuŋ to Maaron ndinatu aidaba.* Saveeŋ tonene, nene saveeŋ palelaaŋ. Pasa, iit to taghur ila to Krisi ne tanim Maaron ndinatu aidaba kat maau. Yesu moghon, ghoro Maaron Natu aidaba kat. Eemoghon ye pale ipakur ghiit ve igham leed mbeb popoia katindi, inimale tamtoghon tighamgham pa ndinatudi aidaba.
Tamtoghon tisob to tineep ila lupuuŋ tonene, yes tinim ndug sambam tamtoghona. Tauto izadi ineep ila rau to ndug tonowen. Ve aazne, yam agharau Maaron wa. Ye ŋgeu to pale iŋgabiiz tamtoghon tisob ve ighur atia padi. Ve anim avot to ndiran deŋiadi to aazne tineep izi ndug sambam. Ndiran tonowen, Maaron igham ŋgar todi isob poiawaat ila ye mata. Lu 10:20
24 Ve aazne, anim avot to Yesu. Ye to iyoon bodbodaaŋ pa Maaron ve iit tamtoghon, ve igharaat ataam paghu, leso itiŋa Maaron talup ghiit tanim ee moghon. Siŋ toni, tauto ipariaaŋ saveeŋ mbuaaŋ to ataam paghu tonowen. Tovenen siŋ toni ilib pa siŋ to Abel. Pasa, Abel siŋ toni ipoipoi Maaron ighaze iyati. Eemoghon siŋ to Krisi, nene ipoipoi Maaron ighaze ireu sosor toit. Mbnp 4:10+; 1Tim 2:5; Hib 8:6, 9:15+
Tapoon taliŋaad pa Maaron aliŋa malep
25 Alooŋ. Aazne, Maaron tau isavsaav pait. Tovenen apoon taliŋamim ve azoor saveeŋ toni malep. Aghita. Yes Israela to muuŋ tipoon taliŋadi pa Maaron aliŋa ne, irau tipaghau taudi pa mbalmbali toni? Maau. Eemoghon sawa tonenen, ye ivotia aliŋa padi izi taan. Ve aazne, Yesu ineep izi sambam ve isavsaav pait. Tovenen ighaze taghur muriid pani, pale tapaghau tauud pa mbalmbali toni vena? Maau le maau kat! Hib 1:2, 2:1+, 10:26+
26 Sawa to Maaron isavsaav pa yes Israela, aliŋa itok taan le katia, inimale yoŋgyoog. Ve aazne, ye imbua saveeŋ ighaze:
“Muri, you pale natok taan pa ee moghon, ve isob.
Ve tonene moghon maau. Pale natok sambam paroŋania paam.” Igham 19:18; Hag 2:6
27 Saveeŋ waaro to isaav ighaze ye pale itok taan “pa ee moghon ve isob” nene ŋgara tovene: Maaron pale itok mbeb tisob to ye ighur di. Leso mbeb to ariaŋadi maau, timbiriis ve tilaledi, ve mbeb ariaŋadi to irau katia maau ne, moghon to tineep. 2Pe 3:10; 1Yo 2:17; Syg 21:1
28 Pooz to Maaron toman ndug toni, nene mbeb ariaŋadi. Irau katia maau, ve tineep tovene irau sawa isob. Tovenen iit to ye igham ghiit taneep ila pooz toni lolo ve izaad pa talooŋ tala ndug toni ne, irau tapatooŋ lolood poia ila pani, ve taroron pani. Leso suŋuuŋ toman mbesooŋ toit itaghon ye lolo. Pil 2:12
29 Pasa, Maaron toit, ye patabuaŋ kat.
Ye inimale yab to moghon moghon ighanghan. Igham 24:17; Lo 4:24; 2Tes 1:7
*12:23: Saveeŋ tonene, nene saveeŋ palelaaŋ. Pasa, iit to taghur ila to Krisi ne tanim Maaron ndinatu aidaba kat maau. Yesu moghon, ghoro Maaron Natu aidaba kat. Eemoghon ye pale ipakur ghiit ve igham leed mbeb popoia katindi, inimale tamtoghon tighamgham pa ndinatudi aidaba.