1 Nimitzpaquilismacas, TOTECO, ica nochi noyolo.

Nitepohuilis nochi catli cuali tijchijtoc.

2 Nijpiya hueyi paquilistli por ta,

huan yeca nihuicas huan nimitzpaquilismacas, Toteco, ta Catli Más tiHueyi.

3 Nocualancaitacahua cholojtehuase.

Huetzise mictoque moixpa.

4 Pampa ta tiquinpannextilijtoc masehualme para niitztoc xitlahuac moixpa.

Titenextilijtoc para nijchijtoc catli cuali.

Timosehuijtoc ipan mosiya catli yejyectzi huan titetlajtolsencahua xitlahuac.

5 Tiquinajhuas nochi masehualme ipan nochi tlalme catli amo mitzneltocaj.

Tiquintzontlamiltis nochi inijuanti catli amo cuajcualme.

Tiquinixpolos inintoca para nochipa.

6 Nocualancaitacahua miquise,

huan ininhuaya polihuise nochi inialtepehua.

Pampa ta tiquintlamitlasosolhuilis huan amo tleno mocahuas.

Amo aqui quinelnamiquis.

7 Pero TOTECO tlanahuatis para nochipa.

Yaya mosehuía ipan isiya catli yejyectzi nepa ilhuicac huan tetlajtolsencahua.

Catli yaya quichihua, ya nopa xitlahuac.

8 Toteco quintlajtolsencahuas xitlahuac nochi tlalme ipan tlaltipactli huan ininmasehualhua.

Yaya quintlatzacuiltis sese inijuanti quen quinamiqui por nopa tlajtlacoli catli quichijtoque.

9 Nochi catli pilteicneltzitzi huelis motemachise ipan TOTECO huan yaya quinmocuitlahuis.

Huelis motlatise ipan ya quema tlaijiyohuíaj.

10 Quena, TOTECO, nochi catli mitziximatij motemachise ipan ta para tiquinpalehuis,

pampa amo quema tiquintlahuelcahuas catli mitztemohuaj.

11 Xihuicaca huan xijpaquilismacaca TOTECO,

catli mosehuía ipan isiya yejyectzi nepa ipan Jerusalén huan nochi quinahuatía.

Xiquinpohuilica nochi masehualme ipan tlaltipactli catli yaya quichijtoc.

12 TOTECO quintzontlamiltis catli temictíaj pampa quej nopa quinamiqui quincuepilis.

Quinelnamiqui catli motequipachohuaj,

quintlacaquilía quema masehualme catli tlaijiyohuíaj quitzajtzilíaj para ma quinpalehui.

13 Techtlasojtla, TOTECO.

Xiquita quen nitlaijiyohuía ica catli nechchihuilíaj inijuanti catli amo quinequij nechitase.

Techmanahui pampa quinequij nechmictise,

14 huan na nimitzpaquilismacas iniixpa nochi masehualme.

Niquinpohuilis nochi catli mosentilíaj ipan altepetl Jerusalén catli techchihuilijtoc.

Nelía nipaquis pampa techmaquixtijtos.

15 Mosisinijca masehualme tlen nochi tlalme huetzise ipan nopa ostotl catli inijuanti quichijque.

Quitlatijtoque se tlaquetztli para ma masica sequinoc,

pero inijuanti icxicuatacanise.

16 TOTECO quichijtoc para nochi ma quimatica para yaya xitlahuac tetlajtolsencahua.

Yaya quichihua para ma huetzica ipan tlaquetztli catli ica ininmax quisencajtoque.

17 Nochi amo cuajcualme yase mictla.

Quena, nepa ajsitij nochi masehualme catli amo quielnamiquij Toteco Dios.

18 Pero Toteco amo quinelcahuas catli teicneltzitzi.

Yaya nochipa quinmacas catli quichiyaj para quiselise.

19 Ximotlanana, TOTECO.

Amo xiquincahuili masehualme más ma quipiyaca chicahualistli.

Xiquintlajtolsencahua huan xiquintlatzacuilti nochi masehualme catli amo mitziximatij.

20 Xijchihua ma majmahuica, TOTECO.

Ma momacaca cuenta nochi masehualme ipan nochi tlalme para inijuanti san panoni.