1 TOTECO, ¿para tlen huejca tiitztoc huan timotlatía quema na nijpiya tequipacholi?

2 ¡Xiquita, TOTECO!

Amo cuajcualme tlahuel mohueyimatij huan quintepotztocatinemij catli teicneltzitzi para quincocose.

Ma masica ipan nopa tlaquetztli catli inijuanti quisencajtoque para sequinoc.

3 Nopa amo cuajcualme mohueyimatij ica nochi catli fiero quinequij quichihuase.

Huan masehualme catli quinequij san inijuanti quipiyase nochi tlamantli,

quintelchihuaj nochi sequinoc hasta ta, TOTECO, mitztelchihuaj nojquiya.

4 Nopa amo cuajcualme nel mohueyimatij huan amo mitztemohuaj, Toteco Dios.

Amo quema mitzelnamiquij pampa moilhuíaj amo tiaqui para tiquintlatzintoquilis tlaque quichihuaj.

5 Ama quisa cuali nochi catli amo cuajcualme quichihuaj,

huan yeca san mohueyimatij,

huan motlanahuatilhua amo quinchihuilíaj cuenta.

San quinhuetzquilíaj nochi inincualancaitacahua.

6 Huan moilhuíaj:

“Amo quema topantis se tlenijqui.

Nochipa tipactose huan amo quema techajsis tequipacholi.”

7 ¡Xitlacaqui, TOTECO!

Quema camanaltij masehualme catli amo cuajcualme,

san quisa tlatelchihuali, istlacatili huan nochi catli ica tlacajcayahua.

¡Xiquita, TOTECO!

Nochipa tlacajcayahuaj huan quinyolcocohuaj sequinoc para ma quipiyaca tequipacholi.

8 Motlatíaj nechca pilaltepetzitzi para teojchiyase,

huan quema amo aqui quinita,

quimictíaj se catli amo tleno quichijtoc.

Quinichtacachiyaj catli teicneltzitzi huan quinmictíaj san pampa quinequij.

9 Quen se tecuani catli motlatijtoc campa tlacoyontoc,

masehualme catli fiero inintlalnamiquilis san quichixtoque para quipantise se catli amo quipiya fuerza para huetzise ipani.

Teipa quihuahuatatzase nopa teicneltzi campa amo aqui huelis quipalehuis.

10 Catli quinitzquijque quipiyaj miyac chicahualistli.

Yeca catli teicneltzitzi nimantzi huetzij iniixpa.

11 Nopa amo cuajcualme moilhuíaj:

“Toteco Dios amo quielnamiqui catli tijchihuaj.

Yaya moixtzactoc huan amo quema quiita tleno.”

12 Ximotlanana, TOTECO Dios, ximomatlanana.

Amo xiquinelcahua catli teicneltzitzi huan catli amo quipiyaj chicahualistli.

13 Amo xiquincahuili amo cuajcualme ma mitzhuetzquilica.

Amo xiquincahuili ma moilhuica para ta amo tiquintlatzacuiltis.

14 Toteco Dios, tiquitztoc catli quichijtinemij.

Timomacatoc cuenta sesen tlamantli catli amo cuali catli inijuanti quisencahuaj.

Xiquinsencahuili nopa tlatzacuiltili catli quinamiqui.

Catli teicneltzitzi san motemachiyaj ipan ta para xiquinmanahui.

Ta tiinintlapalehuijca nochi catli icnotzitzi.

15 Xiquinmapostequi nopa masehualme catli amo cuajcualme.

Xiquintlatzacuilti por nochi catli fiero quichijtoque.

Xiquintlaxtlahui ica sesen tlamantli catli quichijtoque.

Amo xiquelcahua niyon se.

16 TOTECO, ta tiTlanahuatijquetl catli titlanahuatis para nochipa huan amo quema tlamis.

Tiquintzontlamiltis ipan motlal nochi masehualme catli amo mitziximatij,

inijuanti san polihuise.

17 TOTECO, ta tiquintlacaquilía catli mitztlajtlaníaj teicneltzitzi.

Tiquinfuerzajmaca huan tiquinpalehuía.

Tiquinchihuilía cuenta quema mitztzajtzilíaj.

18 Ta tiquinmanahuía icnotzitzi huan catli tlaijiyohuíaj.

Quej nopa, masehualme catli san tlasencahualme ica soquitl ayacmo huelis quintemajmatise.