1 Na san ipan Toteco Dios nimochiya para yaya ma nechmanahui,

pampa san ya hueli temaquixtía.

2 Nimotlatía ipan ya para amo tleno nechajsis.

San yaya nechmaquixtía huan nechmocuitlahuía quema huala tlaohuijcayotl.

Amo tleno hueli nechpanos.

3 Pero ¿hasta quema tlamis nocualancaitacahua nechhuilanase?

Ayacmo nijpiya más chicahualistli quen tlanahuatijquetl ipan notlanahuatilis.

Nocualancaitacahua quisencahuaj quenicatza huelis nechtlahuisose.

Nechitaj quen se tlapepecholi o tepamitl catli quinequi huetzis.

4 Quena, san moilhuíaj san sejco quenicatza huelis nechtzontlamiltise.

Quinpactía quitlacaquilise istlacatili huan tlacajcayahualistli.

Ica inincamac nechcamanalhuíaj yejyectzi,

pero ipan ininyolo nechtelchihuaj.

5 Pero na san nimochiya ipan Toteco Dios,

san nimochiya para yaya ma nechmanahui,

pampa san ya hueli temaquixtía.

6 Nimotlatía ipan ya para amo tleno nechajsis.

San yaya nechmaquixtía huan nechmocuitlahuía quema huala tlaohuijcayotl,

yeca san ipan ya nimotemachía.

7 San Toteco Dios hueli nechmaquixtis huan sempa nechhueyitlalis iniixpa sequinoc.

Yaya nechtlatía huan nechfuerzajmaca.

Nechmocuitlahuía para amo ma nechajsi catli fiero.

8 ¡Annomasehualhua, nochipa ximotemachica ipan Toteco Dios!

Xijpohuilica nochi catli eltoc ipan amoyolo,

pampa san yaya hueli techmocuitlahuis ica catli amo cuali.

9 Amo tleno nelía ininpati masehualme iixpa Toteco,

masque catli tominpiyaj o catli teicneltzitzi.

Sintla se quintlalisquía ipan balanza para quintamachihuas sintla etique quen se tlamantli catli tlahuel ipati,

momacas cuenta para melahuac amo etique pampa masehualme itztoque san quen ajacatl.

10 Masehualme, amo ximoilhuica para antlahuilanase para anquitlanise más tomi.

Amo ximoilhuica para antlachtequise para anmoricojchihuase.

Huan sintla anmochihuase rico,

amo ximohueyimatica, niyon amo ximotemachica ipan amotomi.

11 Nijmati ya ni, pampa miyac hueltas Toteco Dios nechilhuijtoc:

san yaya quipiya nochi chicahualistli.

12 San ta, Toteco, titeicnelía mojmostla.

Huan tiquintlaxtlahuía sesen masehuali quen quinamiqui ica catli quichijtoque.