1 ¡Toteco Dios, ta tinoDios!

¡Nelía tlahuel nimitztemohua!

¡Quen se masehuali catli tlahuel amiqui ipan huactoc tlali campa amo onca atl,

na ica nochi noyolo huan ica nochi noalma nijnequi nimitzpantis!

2 Nijnequi niquitas mochicahualis huan mohueyitilis quen niquitac ipan motiopa.

3 Pampa motlaicnelijcayo más hueyi ipati huan amo nonemilis.

¡Tlahuel nimitzhueyimati!

4 Huan nochi tonali quema noja niitztos, nimitztiochihuas.

Huan moixpa nimomatlananas huan nimotlatlajtis ica ta.

5 Huan huajca, quena, nijmatis quen elisquía ya niixhuic ica se tlacualistli catli ajhuiyac.

Huan nimitzhueyimatis ica miyac paquilistli.

6 Nochi yohuali quema nimoteca ipan notlapech huan amo hueli nicochi,

nimoilhuía tlen ta.

Quena, nimonejnehuilía tlen ta sesen hora.

7 Nimoilhuía quenicatza techpalehuijtoc huan yeca sesen yohuali tlahuel nipaqui.

Quen se piyo quintlatía iconehua ieltlapaltzala,

quej nopa ta techtlatía na para amo tleno nechajsis.

8 Nimotlatzquilijtoc ipan ta pampa san ta techmocuitlahuía ica mohueyi chicahualis.

9 Nochi catli quinequij nechmictise yase mictla.

10 Pampa ya eltoc tlasencahuali para miquise,

huan para sequinoc quintzontlamiltise ica machete.

Huan inintlacayohua elis tlacualistli para nopa tepechichime.

11 Pero na nitlanahuatijquetl nimopaquilismacas ipan ta, Toteco Dios.

Huan nojquiya paquise nochi sequinoc catli senquistoc motemachíaj ipan ta.

Pero nochi catli istlacatij,

ta, Toteco, tiquincamatzacuas.