1 Toteco Dios, san ta quinamiqui ma timitzhueyimatica,

ta catli tiitztoc ipan altepetl Jerusalén.

Huan quinamiqui ma timitzmacaca nochi catli timitztlajtolcahuilijtoque timitzmacase.

2 Ta technanquilía quema timotlatlajtíaj huan techmaca catli timitztlajtlaníaj,

huajca nochi masehualme ipan tlaltipactli ma hualaca campa ta.

3 Masque toyolo temitoc ica tlajtlacoli huan techtlantoc,

ta techtlapojpolhuía nochi totlaixpanolis.

4 ¡Nelía tipaquij miyac tojuanti catli techtlapejpenijtoc para ma tihualaca,

huan ma tiitztoquij mohuaya ipan motiopa catli tlatzejtzeloltic!

¡Ta techmacas hueyi paquilistli huan nochi catli cuali catli onca nopona!

5 Quema timitztlajtlaníaj se tlamantli,

ta technanquilía ica huejhueyi tlamantli.

Toteco Dios, nochi masehualme ipan tlaltipactli motemachíaj ipan ta.

Quena, masque itztoque hasta campa ontlantoc hueyi atl,

nochi motemachíaj para ta tiquinpalehuis.

6 Ta ica mohueyi chicahualis tiquinchijchijqui nopa tepeme huan tiquintlatzquilti campa eltoc.

7 Ta tijseseltía nopa hueyi atl quema mosisinía.

Huan tiquinyoltlalía masehualme campa hueli quema quinequij mohuilanase.

8 ¡Yeca nochi masehualme catli itztoque hasta campa ontlantoc tlaltipactli,

mitztlepanitaj huan mitzimacasij para mitzixpanose quema quiitaj nopa huejhueyi tlamantli catli tijchihua!

Tijchihua para masehualme ma paquica tlen quema tlanesi huan hasta quema tlayohuiya.

9 Ta ticatequía ni tlaltipactli para ma tlaelilti.

Nopa hueyame catli ta moaxca amo quema huaquij.

Ta tijcualtlalía ni tlali para momasehualhua ma quitocaca ininxinach,

huan teipa tijchihua para ma onca se hueyi pixquistli.

10 Ta tijxolonía ica miyac atl nopa surcos ipan mila.

Tijchihua ma huetzi atl para ma yamaniya nopa tlali huan ma poxoni nopa tlaltojtolomitl.

Huan tijchihua para ma ixhua nochi tlamantli tlatoctli ipan nochi tlaltipactli.

11 Teipa sesen xihuitl tijtlamiltía ica se pixquistli catli nelía yejyectzi.

Huan nopa mixtli tijchihua para tlaquiyahuiltía miyac.

12 Onca sacatl ipan huactoc tlali,

huan campa tlaixtemolis moscaltíaj cuajcuali xihuitl,

huan temacaj ininxochiyo.

Nesi quen moscaltíaj ica miyac paquilistli.

13 Ta tijchijtoc para nochi potreros ma temica ica borregojme para quicuase nopa sacatl.

Huan ipan nochi nopa tlamayamitl motlanantoc trigo mili.

Eltoc quen nochi catli ta tijchijtoc ipan tlaltipactli tzajtzij ica paquilistli huan huicaj.