1 NoTeco Dios, xijtlachili notequipachol.

¡Xijmanahui nonemilis tlen nocualancaitacahua catli quinequij nechmictise!

2 Techtlati tlen ni amo cuajcualme catli ichtacatzi quisencahuaj para nechchihuilise catli fiero.

3 Nochi inincamanal ajsi ipan noyolo,

huan tlahuel nechcocohua quen elisquía se cuatlamintli.

4 Inijuanti amo majmahuij para nechtlatzacuiltise.

Motlatíaj campa amo aqui hueli quinita,

huan quinmajcahuilíaj cuatlamintli masehualme catli amo tleno quichijtoque.

Niyon quentzi amo majmahuij ica catli fiero quichihuaj.

5 Se ica seyoc mofuerzajmacaj para quichihuase más catli fiero.

Ichtacatzi mosentilíaj para quitlalise tlaquetztli.

Huan quiijtohuaj: “Nica tijtlalise ni tlaquetztli campa amo aqui huelis quiitas.”

6 Ica miyac cuidado quisencahuaj quenicatza quichihuase para temictise.

Ica yolic quitemolíaj quenicatza quichihuase catli fiero quisencajtoque quichihuase para ma cualquisa.

Iyolo huan itlalnamiquilis se masehuali tlahuel quimati quisencahuas catli fiero para quichihuas.

7 Pero Toteco Dios yaya iseltzi quintlamicocos.

Elis quen quinmajcahuilis cuatlamintli quema amo quichiyaj,

huan nimantzi quintlanis.

8 Quena, huetzise huan motzontlamiltise,

por nopa camanali catli quiijtojtoque.

Huan nochi catli quinitase momajmatise.

9 Huajca nochi masehualme quitlepanitase Toteco Dios huan quiimacasise quiixpanose.

Tepohuilise nochi catli yaya quichijtoc.

Huan huajca quimachilise para san ya quichihua huejhueyi tlamantli.

10 Huan nochi masehualme catli itztoque xitlahuaque quipaquilismacase TOTECO,

huan más motemachise ipan ya huan quihueyimatise.