1 ¡Ximotlanana, Toteco Dios, huan xiquinsemana nochi mocualancaitacahua!

Xiquinchihua ma choloca tlen moixtla nochi catli amo mitzcualitaj.

2 Xiquinixpolo quen poctli ixpolihui ipan ajacatl.

Xiquintlamilti quen nopa cera catli atiya ipan tlitl.

Quej nopa ma ininpanti moixpa nochi amo cuajcualme.

3 Pero nochi masehualme catli itztoque xitlahuaque ma paquica iixpa Toteco Dios huan ma huitonica ica paquilistli.

4 Xijhuicatica Toteco huan xijpaquilismacaca.

Xijhueyitlalica yaya catli nejnemi iixco mixtli,

yaya catli itoca TOTECO.

Xipaquica miyac iixpa ya.

5 Toteco Dios yaya inintata catli icnotzitzi.

Yaya quinchihuilía catli xitlahuac nopa cahual toahuihua,

pampa yaya tlatzejtzeloltic.

6 Toteco Dios quinmaca ininchampoyohua catli itztoque ininseltzitzi.

Huan quinchololtía catli quintzactoque.

Pero catli motlepanitaj quintitlanilía mayantli huan tlaijiyohuilistli.

7 NoTeco Dios, quema tiquinyacantiyajqui momasehualhua tlen tlali Egipto

huan tiquinhuicac ipan nopa huactoc tlali,

8 nopa tlali mojmolini huan huetzqui atl tlen ilhuicactli moixpa.

Nopa tepetl Sinaí mojmolini moixpa ta catli titoTeco tiisraelitame.

9 Toteco Dios, ta tijchijqui ma huetzi miyac atl ipan ni tlali catli tiquinmacac momasehualhua.

Quena, ica nopa atl tiquinfuerzajmacac catli moaxcahua quema tlahuel siyajtoyaj

10 Yeca momasehualhua mocajque nica ipan ni tlali.

Huan ta ica motlaicnelijcayo tiquinmacac nopa teicneltzitzi nochi catli monequiyaya para ica mopanoltise.

11 Toteco quiijto para ya tlatlantoya,

huan miyac masehualme tzajtzique chicahuac para tepohuilise catli panotoc.

Quiijtojque:

12 “Cholojtejque nopa soldados catli hualajtoyaj para techtzontlamiltise.”

Quena, ama nopa israelita sihuame momajmacaj nochi tlamantli catli quicajtejque nopa soldados.

13 Xiquitaca, masque quinmocuitlahuiyayaj borregojme,

ama nopa sihuame hasta petlanij ica oro huan plata.

Nochi inintlacayo quitlamitzactoque ica tlamantzitzi catli yejyectzitzi quen se paloma quitlamitzacua itlacayo ica ieltlapal.

14 Toteco Dios Catli Quipiya Nochi Chicahualistli quinsemanqui icualancaitacahua quen nopa setl catli huetzi ipan tepetl Salmón.

15 Nochi nopa tepeme catli huejcapantique catli mopantíaj ipan tlali Basán iaxcahua Toteco huan nelía yejyectzi inintzonatipa,

16 pero ma amo mochicoitas ica nopa Tepetl Sion catli TOTECO quitlapejpenijtoc para ipan itztos para nochipa.

17 Toteco Dios quisqui ipan tepetl Sinaí ica millones icuacarros huan itequihuajcahua.

Yaya yajqui ipan itiopa catli tlatzejtzeloltic ipan tepetl Sion.

18 Quema Toteco tlejcoc ilhuicac campa más huejcapa,

quichihuayaya quen se tlatlanquetl catli mocuepa ipan se tlahuilancayotl,

huan quinhuicac ilpitoque nopa masehualme catli quintlantoya para iaxcahua.

Huan nopa tonal Toteco quiseli nemactli tlen nochi masehualme,

hasta nojquiya masehualme catli amo quinejque quitlepanitase.

Huan ama TOTECO temachtli itztos ica tojuanti.

19 Ma tijpaquilismacaca Toteco,

pampa yaya mojmostla techmaca itlatiochihualis.

Yaya Toteco catli techpalehuía huan techmaquixtía.

20 Toteco Dios, yaya catli techchololtía ininmaco tocualancaitacahua.

Huan yaya Toteco catli techmanahuía para amo timiquise.

21 Temachtli Toteco quintzontlamiltis nochi icualancaitacahua,

pampa inijuanti tlahuel yoltetique huan amo quinequij quicahuase inintlajtlacolhua.

22 Toteco quinilhuijtoc imasehualhua:

“Na niquinhualicas nochi amocualancaitacahua.

Niquincuiti masque motlatijtose ipan nopa huejcapantic tepetl catli itoca Basán,

o masque motlatijtose hasta tlatzintla tlen nopa hueyi atl.

23 Niquinhualicas pampa monequi nochi anquintzontlamiltise.

Inieso quixolonise amoicxihua huan amochichihua quipipitzose.”

24 NoTeco Dios, tinotlanahuatijca,

niquinita miyac masehualme mitztoquilíaj para yase ipan motiopa.

25 Inijuanti catli huicaj tlayacantiyohuij.

Tlatlajco yohuij nopa ichpocame catli quitzilinijtiyohuij panderos.

Tlatepotzco yohuij catli tlatzotzonaj.

26 Huan quej ni huicaj:

“Nochi anisraelitame, xijhueyimatica Toteco Dios.

Xijpaquilismacaca Toteco catli techmacatoc nemilistli nochi tojuanti.”

27 Tlayacantiyohuij iixhuihua Benjamín.

Huan tlatepotzco hualahuij nopa tlayacanani huan huehue tlacame tlen iixhuihua Judá,

huan nopa tlayacanani catli iixhuihua Zabulón huan Neftalí.

28 Toteco Dios, ica mohueyi chicahualis xijchihua nochi catli techilhuijtoc.

Quena, xijnexti mohueyi chicahualis para sequinoc ma quiitaca nopa huejhueyi tlamantli catli ta techchihuilijtoc.

29 Nopa tlanahuatiani tlen nochi tlalme quihualicaj iniofrendas ipan motiopa catli eltoc ipan altepetl Jerusalén.

30 Toteco Dios, xiquinajhua tocualancaitacahua.

Xiquinechcapantlali nopa tlacame catli mosisiníaj quen torojme,

huan xiquinchihua ma motemactilica ica ta.

Ma mitzhualiquilica inintepos plata quen se nemactli.

Xiquinsemana nopa mosisinijca masehualme catli tlahuel quinpactía tlahuilanase.

31 Nopa Egipto ehuani quinhualicase inintelpocahua huan nochi tlamantli ininteposhua catli yejyectzitzi huan pajpatiyo.

Huan nopa Etiopía ehuani momatlananase moixpa para mitzhueyichihuase.

32 Nochi antlanahuatiani ipan nochi ni tlaltipactli,

xijhuicatica Toteco Dios.

Xihuicaca huan xijpaquilismacaca Toteco.

33 Yaya catli nentinemi ipan nopa ilhuicactli catli hasta huejcajya eltoc.

Xijcaquica itoscac catli chicahuac caquisti quen quema tlatomoni.

34 Xiquinpohuilica nochi masehualme quenicatza hueyi ichicahualis Toteco Dios.

Huan itlatlanex ajsi ipan nochi israelitame.

Quena, nelía tlahuel hueyi ichicahualis nepa ilhuicac.

35 Ma tijhueyitlepanitaca Toteco Dios pampa temajmati ihueyitilis nopona ipan itiopa.

ToDios tiisraelitame quinmaca tetili huan chicahualistli nochi imasehualhua.

¡Ma tijpaquilismacaca Toteco Dios!