37
Devit ga pit iakan ra ninge.
1 Snd 3:31; 24:19Waak u kalar ta ira ut na sakena.
Waak u masingan bia nu haruat ma ira ut na gil nironga,
2 Jm 1:11kanong hutet um ma diet na mahiawa hoing ira huro.
Hutet diet na maat laah hoing ra nuhnuhuan na pitoka.
3 Lo 30:20Nurnur tano Watong ma gil ra bilbilai.
Nu lon narako tano uno taman, ma no num kinkinis na bilai narako tano uno harbalaurai.
4 Nu kanakana tano Watong,
ma na tabar haruatne ugu ma ira masmasingan tano kaatim.
5 Snd 16:3; 1Pt 5:7Tar se tar no num ngaas uram hono Watong.
Nurnur tana ma na gil hoken:
6 Ais 58:8,10Na hamines no num taktakodas bia na mararang hoing no laar i daras ie,
ma ing na kure bia pau gil ta nironga, io, na ngan hoing ra tingena langlangar na kasakes.
7 Sangeh ra matmataan tano Watong ma nu kis kawase timaan leh ie.
Waak u kalar bia ira tunotuno diet te petlaar ira nudiet sinisip
ma ing diet te gil haruatne ira udiet sakana harpingit.
8 Ep 4:31; Kl 3:8Waak u bale ra nginangar, ma hamalum se no ngalngaluan.
Waak u kalar. Iakano magingin na lam tar mon ugu ra nironga.
9 Kanong warah, sige ing diet kis nanaho tano Watong, diet na tinane leh no pise hoing ra pinlawe diet,
iesen no Watong na pasak hasur ira ut na sakena.
10 I te hutet um, ma na taie baling um ta ut na gil sakena.
I tale be nu sisilih ta diet, iesen pa nu nes tupas leh diet.
11 Mt 5:5Iesen ira matien na tunotuno diet na tinane no pise hoing ra pinlawe diet,
ma diet na guama tano tamat na malum.
12 Nng 31:13,20Ira ut na sakena diet harpingit tika wara hanghagahe ira ut na takodas,
ma kaike ra sakana tunotuno diet na hatagiris na ngise tar ta diet.
13 Nng 2:4; 1Sml 26:10Iesen no Watong i kurus ira ut na sakena,
kanong i nunure tar be ira udiet bung na haruat.
14 Ira ut na sakena diet te palim tagure tar ira udiet wise na hinarubu,
ma diet te lukun tagure tar ira udiet laplapot,
wara lapot hasur diet ira maris ma ira malahahin,
ma wara bubu bing diet ing ira udiet tintalen i takodas.
15 Nng 46:9Iesen ira udiet wise na hinarubu na salok habaling ira kaati diet at,
ma ira udiet laplapot na takap.
16 Snd 15:16; 16:8Ira dahin mon nudiet ira ut na takodas i manga bilai
ta ira tamat na kinewa nudiet ira haleng na ut na sakena.
17 Nng 10:15; Ese 30:21Kanong warah, no dadas tano ut na sakena na pataam,
iesen no Watong na hatur hadadas no ut na takodas.
18 No Watong i nunure tar ira bung nudiet ira gamgamatien na tunotuno,
ma asa ing diet tinane tar na kis hatika taar.
19 Ta ira pakana bung na tamat na halhaliarai, diet pa na maris.
Ta ira pakana bung na taburungan, diet na guama ma ra haleng na nian.
20 Nng 68:2Iesen ira ut na sakena diet na pataam.
Ira ebar tano Watong diet na ngan hoing ra bilai na purpur na pitoka,
diet na panim. Diet na panim laah hoing ra mis.
21 Nng 112:5,9Ira ut na sakena diet la sarsaring ma diet pa na balu pukus,
iesen ira ut na takodas diet la manga hartabar bia.
22 Sige diet ing no Watong i haidane, diet na tinane no uno taman,
iesen sige diet ing God i sasalim bia na haliare diet, na pasak hasur diet.
23 Nng 40:2; 66:9Ing bia no Watong i kanakana pane tikai ma ira uno tintalen,
na hadadas ie ta ira uno hinahaan.
24 Snd 24:16; Mai 7:8Ing bia na laleka, pa na puko,
kanong no Watong i palim hadadas tar ie ma no limana.
25 Ais 41:17; Hb 13:5Iau ga marawaan taar baak ma kaiken iau te takana,
iesen iau pa ga nes tiga pakana bung bia no Watong i waak kapis ira ut na takodas,
ma bia ira nati diet na sasaring marmaris wara adiet ta nian.
26 Lo 15:8Diet la manga hartabar bia, ma diet la hatatol mah ira mes.
A haraidaan na kis ta ira nati diet.
27 Tahurus talur ra sakena ma nu gil ra bilai.
Kaik, nugu lon hatika tano uno taman.
28 Kanong warah, no Watong i sip ira ut na takodas,
ma pa na haan sukun diet ing diet te tar tutun ira udiet nilon tana.
No Watong na balaure bat hatikane diet,
iesen na pasak hasur se ira nati diet ira ut na sakena.
29 Snd 2:21Ira ut na takodas diet na tinane leh no pise,
ma diet na lon hathatika tana.
30 Snd 10:13No hana no ut na takodas i la tangtange ra minonasuana nianga,
ma no karamena i la iangianga ma ra tutun.
31 Lo 6:6; Nng 40:8; 119:11; Ais 51:7; Jer 31:33No harkurai tano uno God ie ke narako tano kaatine.
Ira kakine pa na surmalagir.
32 Ira ut na sakena diet mun kawase tar no ut na takodas,
ma diet sisilih ta ngaas wara bubu bing ie.
33 2Pt 2:9Iesen no Watong pa na waak tar ie ta ira lima diet,
ma pa na bale mah bia da kurei bia i te gil ta sakena ing i tur ra harkurai.
34 Kis kawase no Watong,
ma nu mur no uno ngaas.
Na raun haut ugu wara tintinane leh no pise.
Nu nes ma ira mataam ing no Watong na pasak hasur ira ut na sakena.
35 Iau te nes tiga ngangarina sakana holmatau,
i hoing tiga nunuhuan na ina daha i tur timaan taar tano ana pise at,
36 iesen i maat laah mon ma pai lon baling um.
Iau ga nanaas tana iesen iau pa ga nes leh ie.
37 Ais 57:1,2Lilik timaan uta no gamgamatien na tunotuno, ma nes mur no ut na takodas.
No tunotuno nong i mon malum tana, auno mon bilai na bung namur.
38 Iesen ira ut na laka harkurai bakut, no Watong na haliare diet.
Ira ut na sakena, God na hakumkum ira udiet bung na nilon.
39 Iesen no harhalon ta ira ut na takodas na hanuat meram tano Watong.
Aie nong i la balbalaure hadadas diet ta ira pakana bung na tinirih.
40 Nng 54:4; 34:22; Dan 3:17; 6:23; 1Sto 5:20No Watong i la harharahut diet ma i la kapkap hasur diet.
I la kapkap hasur leh diet sukun ra lima diet ira ut na sakena, ma na halon diet,
kanong diet la barbarahit tana.
37:1: Snd 3:31; 24:19
37:2: Jm 1:11
37:3: Lo 30:20
37:5: Snd 16:3; 1Pt 5:7
37:6: Ais 58:8,10
37:8: Ep 4:31; Kl 3:8
37:11: Mt 5:5
37:12: Nng 31:13,20
37:13: Nng 2:4; 1Sml 26:10
37:15: Nng 46:9
37:16: Snd 15:16; 16:8
37:17: Nng 10:15; Ese 30:21
37:20: Nng 68:2
37:21: Nng 112:5,9
37:23: Nng 40:2; 66:9
37:24: Snd 24:16; Mai 7:8
37:25: Ais 41:17; Hb 13:5
37:26: Lo 15:8
37:29: Snd 2:21
37:30: Snd 10:13
37:31: Lo 6:6; Nng 40:8; 119:11; Ais 51:7; Jer 31:33
37:33: 2Pt 2:9
37:37: Ais 57:1,2
37:40: Nng 54:4; 34:22; Dan 3:17; 6:23; 1Sto 5:20