38
Devit ga pit iakan ra ninge na lotu. Tiga sinasaring.
1 Nng 6:1Watong, waak u boor iau ma no num nginangar
ma bia nu hapidanau iau ma no num ngalngaluan,
2 Jop 6:4; Nng 32:4kanong ira num rumus diet te salok iau,
ma no limaam i te bu hasur iau.
3 Nng 6:2; 31:10I burena tano num ngalngaluan, iau pai kilingane ra bilai na nilon.
Taie ta dadas ta ira surugu tako bia ta ira nugu magingin sakena.
4 Ira nugu nironga i te ubu hasur iau
hoing ra kinakap i manga tirih saakit ma i ubal iau.
5 Ira nugu unien i mapus ma di mikiane,
kanong ta ira nugu sakana tintalen na tabuna lilik.
6 Nng 35:14I ubal iau ma i manga bul hasur iau.
Iau tur ra sunuah tano kidilona bung bakut.
7 No tihigu i te kilingane ra dadas na ngunngutaan ing i mamahien hoing ra iaah.
Taie um ta bilbilai tano tamaigu.
8 Kra 1:13,20; Nng 22:1Taie nugu ta dadas ma di te haliare hatikane iau.
Iau kup ma ra ngunngutaan meram narako tunat tagu.
9 Watong, ira nugu dadas na masmasingan i kis palai taar menalua taam.
Ira nugu sunuah pai mun taam.
10 Nng 6:7No kaatigu i tiptip, ira nugu baso i patpataam talur iau,
ma no lulungo mah i te haan laah ta ira matagu.
11 Ira nugu harwis ma ira nugu harsakata diet pas iau kanong ta ira nugu unien.
Ira hinsakagu diet haan tapaka tagu.
12 Diet ing diet silsiliha ngaas wara hapataam no nugu nilon, diet tagure ira udiet kuun,
ma diet ing diet wara hanghagahe iau, diet iangianga bia diet na haliare iau.
Tano kidilona bung bakut diet harpingit wara habato iau.
13 Iau haruat ma tiga talinga bau nong pai tale bia na hadoda.
Iau hoing tiga ngulo, nong pai haruat bia na ianga.
14 Iau te haruat hoing tiga tunotuno pai la hanhadoda,
nong pa na balu tiga nianga ma no hana.
15 Nng 39:7Iau kis kawase ugu, Watong,
bia nu babalu, Watong, nugu God.
16 Nng 35:26Iau te tange, “Waak u bale diet bia diet na latlaat tano nugu tinirih,
ma bia diet na hatamat habaling diet taar tagu ing no kakigu i malmalagir.”
17 Nng 35:15; 13:2Kanong warah, i hutet bia ni puko,
ma no nugu ngunngutaan i la kis hatika taar ma iau.
18 2Ko 7:9,10Iau hapuasne ira nugu nironga.
No nugu nilon i manga tirih kanong ta ira nugu magingin sakena.
19 A haleng ira nugu ebar, ma diet bakut adiet mon tabi bolbol.
Diet manga haleng saakit ing diet malentakuane bia mon iau.
20 Nng 35:12; 1Jn 3:12Diet ing diet balu pukus ira nugu bilbilai ma ra saksakena,
diet tange hagahe iau kanong iau wara murmur asa i tahut.
21 Nng 22:19; 35:22Watong, waak u waak kapis tar iau.
Waak u kis tapaka tagu, nugu God.
22 Hanuat gasien wara harharahut iau,
Watong, no nugu Ut na Harhalon.