108
Devit ga pit iakan ra ninge. A ninge na lotu ie.
1 Nng 57:7-11God, no balagu i patpatuan.
Iau ni inge na pirharlat ma no nugu nilon bakut.
2 Ira haap ma ira gita, muat kakel!
Hokaiken, iau ni hangun no laar.
3 Watong, iau ni pirlat ugu nalamin ta ira hunhuntunaan ta ira mes na hanuo.
Iau ni inge wara utaam nalamin ta ira tunotuno bakut,
4 Lo 7:9; Mai 7:18-20kanong a tamat no num harmarsai, i manga naliu tano mawe.
Ma no num tutun na magingin i hanut uram ra bahuto.
5 God, da raun haut ugu naliu tano mawe,
ma i tahut bia no minamarim na burung no ula hanuo bakut.
6 Nng 60:5-12Halon het ma no dadas na kata na limaam, ma nu taram no nugu sinasaring,
waing mehet ing u manga sip het, mehet naga langalanga taar.
7 God i te ianga meram tano uno halhaliana subaan hoken:
“Iau te kap taman taar, kaik iau ni palau ira nugu matanaiabar ma no taman Sekem
ma ni hapupuo no salil Sukot ma ni tar ie ta diet.
8 Stt 49:10No hanuo Gileat a nugui, ma no huntunaan Manase a nugu mah ie.
Epraim no nugu kukuha na hinarubu,
ma Iudeia no nugu hakilang na harkurai.
9 Moab aie no nugu tultulai wara gisgis ira kakigu.
Iau te se tar ira nugu pala lamaas na pinpaas ta Edom wara hamines bia iau te hahirhir ie.
Iau te barangang ing iau petlaar Pilistia.”
10 Sige na lamus halaka tar iau tano pise na hala nong i manga naliu ira uno lar?
Sige na lua tagu ukaia Edom?
11 Kanong warah, God, augu at u te malok se tar het,
ma pau hanahaan tika ma ira nuhet umri.
12 Tar ta harharahut wara turtur bat ira amehet suk,
kanong a linge bia mon ira harharahut gar na tunotuno.
13 Ais 63:1-4Dahat na bul hasur ira adahat suk ma no harharahut ta God.
Aie at na papasuane hasur diet.