No Pakpakat ta Pol tupas ira
ROM
Tano uno aitul a hinahaan Pol ga haan uras tano hanuo Gris ma ga pakat iakan ra pakpakat tupas ira Kristian aras Rom (nes Apostolo 20.2-3). No pise na hala Rom aie no tamat na pise na hala tano ula hanuo bakut ta iakano pakana bung ma Pol ga sip bia na haan uras ho diet wara harharahut diet (nes Rom 1.11-15). Iesen ga wara hinahaan baak uras Ierusalem waing naga tar ra hartabar taar ta ira Kristian kaia (15.25-28). Io kaik, gaam tule iakan ra pakpakat tupas ira Kristian aras Rom bia diet na nunure bia na haan basia kaia ho diet ing na haan uras Spen (15.23-24). Pol pa gale nes baak ira Kristian kaia Rom, kaik gaam sip mah bia na hinawase timaan diet tano harhalon ta God. Halenging ira Kristian kaia Rom diet pai Iudeia, ma sen a mon Iudeia nalamin ta diet mah. Ma Pol ga sip bia na hinawas palai bia no kunubus ta God taar ta ira Iudeia pa ga puko. Taie. God a takodasianai ma i te gil haruatne no uno kunubus. Ma God i te hamines bia i takodas huo ing i kure bia tikai i takodas ra matmataan tana ing i nurnur ta Krais (1.16-17). Iakano no suruno ta iakan ra pakpakat. Ma bia God na kure bia tikai i takodas, io, na halon ie. Pol ga hinawas bia ira tunotuno bakut, ira Iudeia ma diet ing diet pai Iudeia mah, diet ira ut na sakena (1.18-3-20) ma diet pai tale tun at wara murmur ira harkurai ta God waing God naga kure bia diet takodas ra matmataan tana. Taie. Iesen bia tikai na nurnur sen mon ta Jisas Krais, io, God na marse bia ie ma na kure bia i takodas kanong Krais i te kap se ira udahat magingin sakena (3.21-26). Ma bia God na halon dahat huo i hamines bia i takodas mah ma i te gil haruatne no uno kunubus ing ga tange bia na tar no harhalon (3.21, 26). Ma sen pataie tikai pai tale bia na mur ira bilai na magingin ta ira harkurai ta Moses wara kapkap iakan ra harhalon. Taie. Na nurnur sen mon ta Krais hoing Abraham mah ga nurnur ta God (3.27–4.25). Io kaik, bia God i te kure bia dahat takodas narako ta Krais, pa na ngalngaluan ma dahat. Taie. A malum i kis ta dahat ma God kanong Krais i te hamaraam dahat ira ut na sakena tika ma God (5.1-11). Ma a tutun bia dahat bakut ga kis ra minaat kanong dahat bakut ira ut na sakena iesen no hartabar bia ta God i manga tamat sakit ta ira udahat magingin sakena, kaik God gi tar no nilon hathatika ta dahat (5.12-21). Ma bia God i te halangalanga ise dahat sukun no dadas ta ira magingin sakena i tahut bia dahat pa na tultulai baling ta ira sakena iesen dahat na tultulai ta Krais ma ira magingin takodas (6.1-23). Ma a tutun bia ira tunotuno diet wara gilgil ra sakena (7.7-25) iesen dahat pai kis ra hena ira harkurai baling (7.1-6). Taie. Dahat langalanga um ma dahat lon ma no dadas tano Halhaliana Tanuo (8.1-39). Ma warah bia ira Iudeia diet pai kap no harhalon? Pai no burena bia no kunubus ta God i te puko. Taie. Iesen kanong diet pai nurnur (9.1–11.36). Io, ma bia God i te kure bia dahat takodas i tahut bia dahat na mur ira takodasiana magingin (12.1–15.13).
1
1 Iau Pol, tiga ut na tinaram tano pinapalim Jisas Krais i tar tagu. Ma God gate tatau leh iau bia iau tiga apostolo ma ga bul hasisingen iau wara harharpir tano tahut na hinhinawas tana. 2 Ma iakano no tahut na hinhinawas nong God ga kukubus taar utana menalua kenam narako ta ira halhaliana pakpakat ta ira tangesot. 3 Ma iakan ra tahut na hinhinawas, io, i iangianga utano Natine ma tano ninaas i ga hanuat tunotuno, a bulumur ta Dawit. 4 Iesen tano ninaas tano uno kinkinis tano Halhaliana Tanuo, God ga bul um ie bia aie no dadas na Nati God ing God ga hatut ie sukun no minaat. Ma aie um, ne Jisas Krais no udahat Watong. 5 Ma tano nugu kinkinis narako ta Krais, God ga tabar bia iau ma no uno harmarsai bia iau nigi tiga apostolo. Ga tabar iau huo waing nigi lamus diet ing diet pai Iudeia bia diet na taram ie hokaiken, bia diet na nurnur tana, waing da manga hatamat no hinsana. 6 Muat nalamin mah ta diet. Ma muat mah, God i te tatau leh muat bia muat gar ta Jisas Krais.
7 Io, ma iau pakpakat tupas muat ira matanaiabar kenas Rom, muat ing God i manga sip muat ma i te tatau leh muat bia muat ira uno gamgamatien na matanaiabar tus. A harmarsai ma ra malum tupas muat meram ho God no adahat Sus ma no Watong Jisas Krais.
Pol ga manga sip bia na harpir aras Rom mah.
8 Io, ma no luena linge bia tano udahat kinkinis narako ta Jisas Krais iau tanga tahut tupas God wara gaie muat bakut kanong no numuat nurnur di gate hinhinawas utana tano ula hanuo bakut. 9 Ma meram narako tun at tagu iau la paapalim tane God ing iau harharpir ma no tahut na hinhinawas utano Natine. Ma God aie nong i tale bia na hinawas palai ta iakano linge i nunure bia i tutun, ma i hoken, bia iau pai sangeh wara kilkilam muat narako ta ira nugu sinasaring ta ira pakana bung bakut. 10 Iau la saasaring bia iau nigi petlaar bia ni haan tupas muat ing bia no Watong na sip huo. Ga talona pakana bung sakit iau ga sip huo ma iau pai palai bia na ngan um hohe kaiken, iesen iau saasaring hait bia na ngan huo. 11 Iau manga sip bia ni me nes muat waing nigi tabar muat ma ra mangana hartabar ing i haruat wara harharahut ira tanua muat waing muat naga tur dadas. 12 Ma ing iau tangtange, i hoken. Iau sip bia iau ma muat, dahat na harhabalaraan hargilaas ta dahat ma ta ira udahat nurnuruan. 13 Bar hinsakagu ta Krais, iau sip bia muat na palai bia iau ga pingit ra haleng na pakaan bia ni me nes muat, iesen a mon tur harbat tuk taar katin. Ma iau ga pingpingit huo waing nigi kap ra hunena me nalamin ta muat hoing iau te kap ra hunena me nalamin ta diet ira mes ing diet pai Iudeia mah. 14 No nugu binlan at bia ni haan tupas diet ing diet te manga laka ta ira tintalen ma ira mangana lilik ta diet ira Grik. Ma huo mah ta diet ing diet pai mur kaike ra magingin. No nugu binlan ie mah bia ni haan taar ta ira ut na mintot ma diet ing diet pai kap ra tamat na harausur. 15 Ma iakano no burena bia iau manga kanan bia ni harpir ma no tahut na hinhinawas taar mah ta muat kaia Rom.
No tahut na hinhinawas i hapuasne bia ira tintalen ta God i takodas ma bia God na kure bia tiga ut na nurnur i takodas mah.
16 Kanong warah, iau pai hirhir utano tahut na hinhinawas kanong no dadas ta God i kis taar tana wara halhalon diet bakut ing diet nurnur. Ira Iudeia diet ga lua ma namur um i halon diet ing diet pai Iudeia. 17 Ma iakano i tutun kanong no tahut na hinhinawas i hapuasne bia God i takodas ma na kure bia tikai mah na takodas. Ma God na kure bia tikai na takodas tano magingin na nurnur sen mon. Hoing no nianga ta God i tange bia, “No taktakodasuana tunotuno na lon tano uno nurnur.”* I tale mah bia da pukusane iakan ra buturkus hoken: Ma iakano i tutun kanong no tahut na hinhinawas i hapuasne bia God i takodas ma na kure bia tikai mah na takodas. Kanong warah, God i gil haruatne ira uno nianga, ma na kure diet huo ing diet nurnur. Hoing no nianga ta God i tange bia, “No taktakodasuana tunotuno na lon tano uno nurnur.”
God i hapuasne no uno ngalngaluan taar ta diet ira ut na sakena, diet ing diet nunure tar ie ma diet malok isei.
18 I palai bia na ngan huo kanong no ngalngaluan ta God i hanuat puasa meram ra mawe ma i kis taar ta ira sakana magingin ma ira magingin na tur talur God ing ira tunotuno diet gil, diet ing diet ma ira udiet sakena, diet suhe ira linge i tutun ta God. 19 I palai bia diet la gilgil huo kanong ira linge i tale bia diet na nunure uta God, diet palai ine. Kanong warah, God i te hapalaine diet ine. 20 Ma i palai bia iakan i tutun kanong tur leh tano hakhakisi tano ula hanuo di te manga palai ta ira uno tintalen ing pai tale bia tikai na nes. Ma kaiken, no uno dadas ing pa nale pataam, ma no tutun bia aie nora tamat na Tanuo. Ma diet palai utana huo kanong diet te nes um ira linge ing i te hakisi. Io kaik, diet pai tale bia diet na ianga bat ta ira udiet sakana magingin. 21 Hokaiken, a tutun diet ga nunure God iesen diet pa ga pirlat ie bia God ie ma diet pa ga tanga tahut tana. Taie. Ira udiet lilik ga hanuat linge bia ma diet ga ul ba kanong ira udiet lon i kankado. 22 A tutun diet ga tange bia diet ira ut na mintot iesen diet ga hanuat ul ba. 23 Diet ga malok bia diet na lotu tupas no tamat na God nong pai tale bia na maat. Diet ga kios no udiet lotu, diet gaam lotu tupas ira palimpuo ing diet ga gil hoira tunotuno i tale bia diet na maat, diet gaam lotu tupas ira maan mah, ma ira wawaguai, ma ira mangana linge i kaikaiau.
24 Iakano no burena bia God ga waak se um diet bia diet na gilgil ira bilingana magingin haruat ma ira udiet sinisip meram narako tun at ta diet, kaik diet gaam murmur ira hirhiruana tintalen ta ira palatamai diet. 25 Ma God ga gil huo kanong diet ga malok ise ira tutun ing i te hapuasne utana ma diet ga mur balik no hinarabota wara lotu tupas ma wara bulbul hanapu diet ta ira linge God ga hakisi, ma pataie bia God, aie nong da lat ie hathatikai. A tutun sakit.
26 Io kaik, God ga waak se um diet bia diet na murmur ira hirhiruana sakana sinisip. Hokaiken, ira hahin diet ga malok ise no magingin haruat ta ing God ga hakisi tar diet huo ma diet ga mur balik tiga mes. 27 Ma i haruat mah huo ta ira tunaan. Diet ga malok ise no udiet kinkinis tika ma ira hahin haruat ma ing God ga hakisi tar diet huo, ma ga manga mamahien ira udiet sakana sinisip harbasia ta diet. Ira tunaan diet ga mur ira hirhiruana magingin harbasiane ta diet at ma diet ga hatur kawase nora harpidanau haruat at ma ing diet ga haan ronga ine.
28 Ma diet pa ga lik bia a tamat na linge bia diet na nunure God bia sigei, kaik God gom waak se diet bia diet na mur sen mon ira udiet lilik na ba wara gilgil kaike ra magingin ing diet tale bia diet pa gor gil. 29-30 Diet te hung um ma ira kaba mangana magingin ing pai takodas, ira sakena, no magingin na nes kalak linge, ma ira bilingana magingin. Diet hung ma no tintalen na harubu bingibing ma ra bala ngungut mah, no magingin na harhuli, no sinisip wara hanghagahe ira mes, ma no magingin na sipsip ira kinkinis gar na mes. Diet pinas hagahe ma diet tange hagahe ira mes. Diet malentakuane God ma diet ira dadas na ul pat. Diet nes hanapu ira mes ma diet ira ut na latlaat. Diet lik leh ari a mangana sigar nironga wara gilgil. Diet patnau ta ira pawasi diet ma ira adiet sus. 31 Diet pai palai tun at ta ira bilbilai. Diet pai gil haruatne ing diet tange. Diet pai sip at ira hinsaka diet ma diet pai marse ira tunotuno. 32 A tutun, diet manga nunure tar no takodasuana harkurai ta God ing i tange bia diet ing diet gil kaiken ra linge, i takodas bia diet na maat. Iesen diet gilgil haitne balik kaiken ra magingin at. Ma pai iakano sen mon. Taie. Diet manga haut leh mah diet ing diet la gilgil huo.
*1:17: I tale mah bia da pukusane iakan ra buturkus hoken: Ma iakano i tutun kanong no tahut na hinhinawas i hapuasne bia God i takodas ma na kure bia tikai mah na takodas. Kanong warah, God i gil haruatne ira uno nianga, ma na kure diet huo ing diet nurnur. Hoing no nianga ta God i tange bia, “No taktakodasuana tunotuno na lon tano uno nurnur.”