1 Nyurrangarri kutu yaṉangu tjuṯaku yunytjurringkula nyinanytjaku. Palya kutunyurra palyantjaku Katutjaku kurrunpangku nyurrangarrinya nintintjala. Palyanyurra yunytjurrinytjaku Katutjaku wangka palumpa walytja tjuṯangka tjanala tjakultjunkunytjaku, palumpa kurrunpangku nyurrangarrinya nintintjala.

2 Tjaampalanyurra pakara wangka kutjupa nguwanpa wangkapayi, Katutjaku kurrunpangku nyurrangarrinya nintintjala. Wangka palunya Katutjalu palumpa kurrunpangkuṯarra kulilpayi, kanya yaṉangu tjuṯangku wiya kulilpayi. Tjana wiya kulira yunyparripayi.

3 Katutjaku kurrunpangku tjaampala nyurrangarrinya nintintjala pakaranyurra Yiitjuku walytja tjuṯangka wangka walytjangku tjakultjunkupayi, Katutjaku wangka. Yaṉangu tjuṯangku wangka palunya kulira yunyparringkupayi.

4 Wangka kutjupa nguwanpa wangkapayi tjuṯangku yalatji yunypangku kulilpayi, “Katutjalu ngayuku yunytjurringkula nintiṉu wangka kutjupa nguwanpa ngayulu wangkanytjaku.” Paluru tjana tjaatjingka wangka kutjupa nguwanpa wangkanytjala, Yiitjuku walytja tjuṯangku puṯu kulira nyinapayi yunypawiya. Panyapa tjuṯangku wangka walytjangku tjakultjunkunytjala Yiitjuku walytja tjuṯangku yutitja kulira yunyparringkupayi. Palya tjana yalatji kulira yunypa nyinanytjaku.

5 Tjinguru tjaampalangkunyurra kulilku wangka kutjupa nguwanpa tjaatjingka tjakultjunkukitja, palumpa kurrunpangku nintintjala. Yalatji palya. Tjinguru kutjupa tjuṯangkunyurra kulilku wangka walytja yutitja tjakultjunkukitja, palumpa kurrunpangku nintintjala. Yalatji palyalingku, uwankarrangku kulintjaku. Tjinguru nyuntu wangka kutjupa nguwanpa wangkakitjangku kulilku. Tjinguru Katutjalu nintilku yaṉangu kutjupangku wangka palunya kulira taaṉamilantjaku, yaṉangu tjuṯangku kulintjaku. Yalatji paluru taaṉamilara tjakultjunkunytjaku palya. Tjinguru nyuntu kulilku tjaatjingka wangka kutjupa nguwanpa wangkanytjaku. Tjinguru nyuntu puṯu tjapilku yaṉangu kutjupangku kulira wangka taaṉamilara tjakultjunkunytjaku. Palunyatjanu nyuntu wiya pakara wangka kutjupa nguwanpa wangkanytjaku, wanti! Wangkawiya nyuntu nyinanytjaku.

6 Walytja tjuṯa, wangka ngaatjanyaya kulila! Tjinguru ngayulu nyurrangarrilakutu maa yankula tjungurringkula tjaatjingka nyinaku. Katutjaku kurrunpangkuṉi nintintjala ngayulu wangka kutjupa nguwanpa wangkaku. Kutjupangku wiya pakara wangka palunya taaṉamilara tjakultjunku. Ngayulu Katutjaku wangka nintilkitja wangka kutjupa nguwanpa wangkanytjala nyurrangarri puṯu kulira wiya yunyparriku. Ngayulu wangka walytjangku yuti tjakultjunkunytjala kutjunyurra kulira yunyparriku. Katutjaku kurrunpangkuṉi nintintjala ngayulu kulira wangka walytjangku nyurrangarrinya nintilku. Yalatji kuliranyurra yunyparriku. Katutjaku wangkawanaṯarra ngayulu nyurrangarrinya wangka walytjangku nintintjala yalatji kuliranyurra yunyparriku. 7 Pipirri wiimangku kiitawu pampura kuyalku. Palunyatjanu wati ngurrpangku kiitawu palunya mantjira wangkatjingalku tjuuna kuyarringutja. Yaṉangu tjuṯangku palunya tjuuna kuyarringutja kulira wiyaya tjaawuntu yutitja kulilku. Tjaawuntu yutitja kulintjawiya nguwanpa wiya tjana Katutjaku wangka yutitja kulilku, yaṉangungku pakara wangka kutjupa nguwanpa wangkanytjala, wiya. 8-9 Tjuulytji tjuṯangku turampata kulira tjungurringkuku pikangku tjananya pungkunytjaku. Tjinguru turampata kuyarrinytjala nintingku puṯu puyulku yarrkayi. Tjuulytji tjuṯangku wiya turampata yutitja kulira, wiya tjungurriku pikaku. Tjuulytji tjuṯangku turampata yutitja kulintjawiya nguwanpa Yiitjuku walytja tjuṯangku wiya Katutjaku wangka yutitja kulilku tjaatjingka, kutjupangku pakara tjanala wangka kutjupa nguwanpa wangkanytjala. 10 Manta kutjupangkaya wangka kutjupa wangkanyi, palunya ngurrara tjuṯangku wangka palunya yutitja kuliṉi. Manta kutjupangkaya wangka kutjupa wangkanyi, palunya ngurrara tjuṯangku wangka palunya yutitja kuliṉi. Yalatjiya wangka kutjupa kutjupa wangkanyi manta kutjupa kutjupangka. 11 Tjinguru manta kutjupa ngurrara ngalya yankula ngayunya wangkanytjala ngayulu palumpa wangka puṯu kulilku. Paluruṯarra ngayuku wangka puṯu kulilku. Yalatji tjaampala wangka kutjupa nguwanpa tjaatjingka wangkanytjala, tjaatji ngurrara tjuṯangku puṯu kulilku. 12 Wangka kutjupa nguwanpa tjaatjingka wangkanytjaku wiyanyurra yunytjurrinytjaku. Katutjanya tjapila!, palumpa kurrunpangku nyurrangarrinya nintintjaku, palumpa waarrka tjukarurru palyantjaku. Yalatjinyurra palumpa wangka tjaatjingka tjananya yutitja tjakultjunkunytjala yaṉangu tjuṯangku kulira raparringkula palumpa waarrka palyalku.

13 Tjinguru tjaampalangkunyurra kulilku tjaatjingka wangka kutjupa nguwanpa kutu wangkakitja. Yalatji kuliranyurra Katutjanya tjapila!, paluru nyurrangarrinya nintintjaku, wangka kutjupa kulira taaṉamilara yutitja tjakultjunkunytjaku. Yaṉangu tjuṯangku wangka yutitjalpi kulintjaku. 14 Katutjanya puḻkawaṉikitjaṉa wangka kutjupa nguwanpa wangkarra kurrunpaṉa Katutjaku yunyparringanyi, wiyaṉa kuliṉi wangka kutjupa palunya. 15 Yaalytjinkuṉa? Katutjaku kurrunpangkuṉi nintintjala ngayulu ngurrangka nyinarra wangka kutjupawana warralku Katutjanya puḻkawaṉikitjangku. Palumpa kurrunpangkuṉi nintintjala ngayulu ngurrangka nyinarra Katutjanya tjapilku wangka kutjupawanangku. Tjaatjingka nyinarra ngayulu wangka walytjangku yutitja warranmalpa. Tjaatjingka nyinarra ngayulu Katutjanya wangka walytjangku tjapilku palumpa kurrunpangkuṉi nintintjala. 16 Yalatji ngayulu tjapintjala yaṉangu kutjupa tjuṯangku kulira yunyparringkula Katutjanya puḻkawaṉiku. Tjinguru Yiitjuku walytja kutjupangku wangka kutjupawanangku Katutjanya tjapintjala yaṉangu tjuṯangku puṯu kulilku Katutjanya puḻkawaṉikitjangku. 17 Tjinguru wati paluru wangka kutjupawanangku Katutjanya puntura tjapintjala yaṉangu kutjupa tjuṯangku puṯu kulilku tjungu yunyparrikitjangku. 18 Ngayuluṯarra wangka kutjupa nguwanpa wangkapayi, Katutjaku kurrunpangkuṉi nintintjala. Yalatji wangka kutjupa wangkarra ngayulu Katutjanya puḻkawaṉipayi. Yalatji ngayula wangkanytjala Katutjaku kurrunpangkuṉi kutu nintilpayi. Ngayulu tjuṯangara yalatji wangkapayi, kanya paluru tjana maṉkurrngara wangka kutjupa nguwanpa wangkapayi. 19 Yalatji tjuṯangara wangkarra ngayulu kuliṉi. Yaṉangu tjuṯangka nyinarra ngayulu wangka walytjangku kutju tjananya nintilku tjana nintingku kulintjaku. Ngayulu wiya yaṉangu tjuṯangka nyinarra wangka kutjupa nguwanpa wangkamalpa, yalatji ngayulu wantiku.

20 Walytja tjuṯa, wangka ngaatjanyanyurra kulintjaku. Tjaampalanyurra pakara wangka kutjupa wangkapayi kutjupa tjuṯangku nyurrangarrinya nyakula puḻkawaṉinytjaku. Tjana nyurrangarrinya puḻkawaṉinytjaku wiyanyurra yunytjurrinytjaku. Yalatji kuya palyantjawiya nyinakitjanyurra yunytjurrinytjaku. 21 Katutjaku wangka yirriṯi tjunutja yalatji ngarrinyi,

22 Wangka kutjupa wangkanytjala tjaatjingka kulira Katutjaku ngurrpa tjaampalangku kulilpayi, “Katutjanya yilta ngaangka nyinanyi, paluru wati palunya nintiṉi wangka kutjupa wangkanytjaku”, kanya nyurrangarri Yiitjuku walytja tjuṯangku yalatji kulintjaku, “Palya paluru wangka kutjupa wangkanyi. Nganaṉa Katutjaku wangka yutitja tjakultjunutja kulintjaku, nganalulampa wangka taaṉamilara tjakultjunku?” 23 Tjinguru tjaatjingka nyinarra nyurrangarri uwankarra tjungu pakara wangka kutjupa nguwanpa wangkanytjala tjinguru Yiitjuku ngurrpa tjuṯangku ngalyankula tjarrpakitjangku puṯu kulilku. Yalatjiya tjana kulilku, “Rama tjuṯaya wangka kutjupa kutjupa wangkarra waṉinyi.” 24-25 Tjinguru tjiṉṯu kutjupangka nyurrangarri tjaatjingka nyinanytjala nintilpayi kutjungku Katutjaku wangka pakara nintinmalpa. Palunyatjanu nintilpayi kutjupangku pakara Katutjaku wangka nyurrangarrinya piyuku nintinmalpa. Yalatji nintilpayi tjuṯangku nyurrangarrinya kutu nintinmalpa. Yiitjuku ngurrpa tjuṯangku ngalyankula tjarrpakitjangku tjana yalatji kulilku, “Ingkaṯa palangku Katutjaku wangka tjukarurrungku nintiṉi, ngayulu kulira Katutjaku tjukarurrulpi nyinanytjaku.” Paluru tjana nyinarra ingkaṯa tjuṯaku wangka kulira pupakatirra Katutjanya puḻkawaṉiku, “Ilta, Katutjanya ngaangka tjanalawana nyinanyi.”

26 Walytja tjuṯa, wangka ngaatjanyaya kulila! Nyurrangarri tjaatjingka tjungurringkula yalatji kulintjaku. Tjinguru nyuntu kulilku pakara warralkitjangku. Nyuntu yalatji kulila!, “Wangka yutitjawanangku ngayulu warralku, tjana kulira Katutjaku yunyparrinytjaku.” Tjinguru kutjupangku kulilku Katutjaku wangka nintilkitjangku. Yalatji paluru pakara kulintjaku, “Wangka walytjangku ngayulu tjananya nintilku, kuliraya Katutjaku yunyparrinytjaku.” Tjinguru Katutjalu yaṉangu kutjungka watjalku wangka palya. Paluru kulilku Katutjaku wangka palunya tjakultjunkukitjangku. Paluru pakara yalatji kulintjaku, “Wangka walytjangku ngayulu tjanala tjakultjunku, kuliraya Katutjaku yunyparrinytjaku.” Tjinguru yaṉangu kutjupangku kulilku wangka kutjupa wangkakitjangku. Yalatji paluru pakara kulintjaku, “Wangka kutjupa nguwanpa wangkarra ngayulu taaṉamilalku wangka yutitjalpi tjana kulira Katutjaku yunyparrinytjaku.” 27 Tjinguru tjuṯangku kulilku wangka kutjupa nguwanpa tjanala wangkanytjaku. Yaṉangu kutjarra kutju pakara yalatji wangkanytjaku, tjinguru tjirripala, tjuṯalingku wiya. Kutju iitji tjana pakara wangkanytjaku, tjuṯa wiya. Yaṉangu kutjupangku tjanampa wangka kulira taaṉamilara tjanala tjakultjunkunytjaku. 28 Tjaampalanyurra kulira wangka taaṉamilalpayi. Tjingurunyurra tjaatjingka nyinanytjawiyangka tjana kutjupa tjuṯa wiya pakara wangka kutjupa nguwanpa wangkanytjaku, tjana pakara wangkanytjawiya nyinanytjaku. Wangkawiyangku tjana tjaatjingka nyinarra walytjangku Katutjanya puḻkawaṉinytjaku.

29 Tjaatjingkanyurra tjungurrinytjala, yaṉangu kutjarrangku tjinguru tjirripalangku Katutjaku wangka tjakultjunkunytjaku, tjuṯalingkungku wiya. Yalatji tjana tjakultjunkunytjala kutjupa tjuṯangku purinypangku kulintjaku. 30-32 Tjinguru nintilpayi kutjungku tjananya tjakultjunkunytjala Katutjaku kurrunpangku nintilku nintilpayi kutjupa pakara tjakultjunkunytjaku. Paluru pakara ngaranytjala yurrunpa nintilpayingku palunya nyakula kulilku palumpa taaṉalpi. Paluru nyinakatinytjaku. Kutjupangkulpi tjananya Katutjakuṉu wangka tjakultjunkunytjaku. Kutju iitjingku yalatji tjanala tjakultjunkunytjaku, tjuṯangku wiya tjanala tjakultjunkunytjaku. Yalatji nintilpayi kutjungku tjakultjunkunytjala yaṉangu tjuṯangku wangka yutitja kulira nintirringkula yunypalpi nyinanytjaku. 33 Katutjalu kuliṉi nganaṉa tjaatjingka palya tjungurringkula nyinanytjaku. Kutju iitji palya pakara wangkanytjaku, wiya nganaṉa uwankarra pakara tjungu wangkanytjaku. Tjaatjingkanyurra tjungurrinytjala, 34 kungka tjuṯanyurra yarrka nyinanytjaku, wangkanytjawiya. Yarrkangkunyurra kulintjaku wangkawiyangku. Yalatji Muutjaku wangka ngaranyi. 35 Wiya kungkangku yaṉangu kutjupa tjapintjaku, yataṉpaya nyinanytjaku. Yalatji nganaṉa Yiitjuku walytja tjuṯangku kuliṉi. Tjaatjingka ingkaṯangku wangkanytjala kungkangku puṯu kulilku. Palumpa miiṯa paluru tjapilku ngurrangka. 36 Yiitjuku walytja tjuṯa yalatji tjaatji tjuṯangka tjungurringkula kutju iitjingku pakara tjakultjunkupayi. Wiya nyurrangarri Kurinytjiyanya ngurrara tjuṯangku kutjupawana kulintjaku, kutju iitjingkunyurra pakara tjakultjunkunytjaku.

37 Wangka palunya tjuṯa ngayulu piipa ngaangka wakaṉu Katutjaluṉi nintiṉutjangka. Yalatji tjaampalangkunyurra nintingku kuliṉi Katutjaku kurrunpatjarra tjuṯangku, Katutjaku wangka tjakultjunkupayi tjuṯangkuṯarra. 38 Tjinguru tjaampalangku ngayuku wangka ngaatja wakaṉutja kulira wantiku. Kulira wantipayi tjuṯaku wangkanyurra kulira wantinytjaku.

39-40 Walytja tjuṯa, wangka ngaatjanyalpiya kulila! Katutjanyaya tjapila!, palumpa wangkanyurra kulira tjakultjunkunytjaku. Nyurrangarri yaṉangu tjuṯa purinypangku kutju iitjingku tjakultjunkunytjaku tjaatjingka. Palya tjana wangka kutjupa nguwanpa wangkanytjaku kutju iitji.