1 Walytja tjuṯa, wangka ngaatjanyaya kulila! Irriṯi ngayulu nyurrangarrila Yiitjuku wangka tjakultjunkupayi. Wangka palunya kulira nyurrangarri palumpa walytjarringu.

2 Tjinguru nyurrangarri wangka palunya kulira tjukarurru kutu nyinanytjala Katutjalu nyurrangarrinya kana kutu yaṉṯayaṉṯanmalpa. Tjingurunyurra wangka palunya kulira tjukarurru nyinanytjawiyangka Katutjalu nyurrangarrinya ngula payira wantirriyalku warukutu.

3 Irriṯi ngayulu nyurrangarrinya Yiitju Kurayitjakuṉu wangka yalatji tjakultjunu, paluru iltalampa mirrirringu kuyalampa waṉikitja. Irriṯi nyinapayi tjuṯangku wangka palunya wakara tjunu Kurayitjanya ngalya yankula mirrirrinytjaku. Wangka palunya Yiitjuku waarrkana tjuṯangkuṯarra ngayula Puulala tjakultjunu. 4 Yiitju Kurayitjanya tjana kuḻpingka mirri ngarritjunu. Paluru munga kutjarra ngarrirra kanarringu. Katutjalu ilta palunya kanaṉu. Yalatji ngarrinyi Katutjaku wangka yurrunpa wakara tjunutja. 5 Paluru kanarringkula pakara Piitala yutitjarringu. Palula tjanalalpi piyuku yutitjarringu palumpa waarrkana tuwalpalangka. 6 Palulanguru paluru piyuku yaṉangu kutjupa tjuṯangka payip yantaṯangkalpi yutitjarringu, ngurra kutjungka tjana nyinanytjala. Paluru tjana nyinarra kutjupa tjuṯa mirrirringu. Tjaampalaya kana kutu nyinanyi. 7 Palunyatjanu paluru piyuku wati yini Tjayimitjala yutitjarringu. Yiitjuku waarrkana kutjupa tjuṯangkalpi paluru piyuku yutitjarringu.

8-9 Yirriṯi Yiitjunya mantangka nyinanytjala, ngayulu wiya palumpa walytja tjuṯangka tjungu nyinapayi, wiyaṉa Yiitjunya nyakupayi. Palunyatjanu panya ngula ngayula Puulalalpi Yiitjunya yutitjarringu. Ngayuluṯarra Yiitjuku waarrkana nyinanyi. Yiitjuku waarrkana yurruntitja tjuṯa ngayula munkarra nyinanyi, kanya ngayulu palumpa waarrkana kuya nyinanyi. Ngayulu palumpa walytja tjuṯa pungkula tjiilakutu katirra tjarrpatjunkupayi. Kutjupa tjuṯangku ngayunya panypurangkupayi yalatji, “Puulanya wiya Yiitjuku waarrkana nyinanyi, Piitanyangarri kutju Yiitjuku waarrkana yilta nyinanyi.” Ngayulu ilta Yiitjuku waarrkana nyinanyi. 10 Katutjalu aḻṯururringkula ngayunya rapaṉu palumpa waarrka palyantjaku. Palunyatjanu ngayulu palumpa tjukarurru kutu nyinarra palumpa waarrka puntura palyaṉi. Yiitjuku waarrkana kutjupa tjuṯangku palumpa waarrka wiima nguwanpa palyaṉi. Kala, nyurrangarri yalatji kulintjaku Kurinytjiyanya ngurrara tjuṯangku, Katutjaluṉi ngayunya kutu rapalpayi palumpa waarrka palyantjaku. 11 Wiyanyurra yalatji kulintjaku, “Nganalu palumpa waarrka puntura palyalpayi?, tjinguru Piitalungarri, tjinguru Puulalu?” Yalatji kulintjawiyangkunyurra wantinytjaku. Yalatjinyurra kulira yunyparrinytjaku. Ingkaṯa tjuṯangku Yiitjuku wangka tjakultjunkunytjala uwankarrangkunyurra kulira palumpa walytjarringu.

12 Yiitjuku wangka nganaṉa yaṉangu tjuṯangka tjakultjurinkupayi. Wangka yalatjiṯarra nganaṉa tjanala tjakultjunkupayi. Katutjalu yilta Yiitjunya kanaṉu mirringuru. Palunya nguwanpa ngula nganaṉanya, yaṉangu tjuṯaṯarra mirringuru kanalku. Kutjupa tjuṯangkunyurra watjaṉi ngula Katutjalu tjananya yaṉangu tjuṯa wiya kanalku mirringuru. Yalatjinyurra wiyawanangku kuliṉi. Irriṯi Katutjalu palumpa katja mirringuru yilta kanaṉu. Palunya nguwanpa nganaṉanya, yaṉangu tjuṯaṯarra paluru yilta kanalku, mirringuru. 13 Yuwa, wiyawanangkunyurra yalatji kuliṉi, “Katutjalu ngula nganaṉanya yaṉangu tjuṯa wiya mirringuru kanalku.” Wiya yalatjinyurra kulintjaku. Katutjalu ilta Yiitjunya mirringuru kanara nganaṉanyaṯarra paluru ngula mirringuru kanalku. 14 Tjinguru Katutjalu Yiitjunya kanantjawiyangka nganaṉatju kulira nyurrangarrinya ngunytji tjakultjurinamara yalatji, “Yiitjunya mirringuru kanarringu.” Tjinguru Katutjalu Yiitjunya kanantjawiyangka nyurrangarri kulira wiyawanangku wangka Yiitjunya kanarringutjatjarra kulinmara. 15-16 Tjinguru Katutjalu Yiitjunya kanantjawiyangka yaṉangu tjuṯangku yirriṯi yalatji kulinmara, “Yiitjuku wangka tjakultjunkupayi tjuṯangku ngunytji nganaṉanya watjaṉi Yiitjunya mirringuru kanarringutja. Katutjalu wiya palunya kanaṉu.” 17 Tjinguru Katutjalu Yiitjunya kanantjawiyangka puṯunyurra Yiitjukuṉu wangka kulira palumpa walytjarringu, paluru wiya nyurrangarrimpa kuya waṉimara. 18 Tjinguru Katutjalu Yiitjunya kanantjawiyangka Yiitjulu kuya nganampa wiya waṉimara. Kuya nganampa waṉinytjawiyangka Yiitjuku walytja mirrirringutja tjuṯa tjananya Katutjalu warukutulpi wantirriyalku, kuya tjanampa waṉinytjawiyangka. 19 Tjinguru nganaṉanya yaṉangu tjuṯa mirringuru kanantjawiyangka yalatji nganaṉa kulilku, “Ngayulu Yiitjuku walytja nyinanyi. Ngayulu mirrirrinytjala Katutjaluṉi wiya kanalku, wiyaṉa palumpa ngurrangka nyinamalpa, wiya.” Tjinguru wangka panyapa ilta ngaranytjala nganaṉa kuunyi tjuṯangku puṯu kulilku, “Ngurra palyangka wiyala nyinamalpa.”

20 Katutjalu yilta ngangkari tiṉatjarrangku Yiitju Kurayitjanya mirringuru kanaṉu. Yalatji yurrunpa nganampa, yaṉangu tjuṯakuṯarra paluru mirringuru Yiitjunya kanaṉu Katutjalu. Palunyatjanu nganaṉa yalatji kulintjaku, “Yiitju Kurayitjanya nguwanpa nganaṉanya ngangkari tiṉatjarrangku mirringuru kanalku.” 21-22 Yirriṯi wati Yatamanya mirrirringu. Yatamanya nguwanpa nganaṉa aṉangu yuwankarra mirrirriku. Katutjalu Yiitju Kurayitjanya mirringuru kanaṉu. Palunya nguwanpa nganaṉanya mirringuru kanalku. 23 Katutjalu yurrunpa Yiitju Kurayitjanya mirringuru kanara ngula nganaṉanyalpi palumpa walytja tjuṯa mirringuru kanalku, Yiitjunya mantakutu piyuku ngalyankunytjala. 24 Palulanguru Yiitju Kurayitjanya yaṉangu tjuṯaku mayutju tiṉa nyinaku, ilkari ngurrara tjuṯakuṯarra, mamu tjuṯakuṯarra. Palunyatjanu manta ilkariṯarra wiyarriku. Yuḻṯa palula Yiitjulu palumpa paapanya watjalku, “Nyuntulpi nganampatju kuwarri mayutju tiṉa nyinanyi.”

25 Kuwarri Yiitju Kurayitjanya mayutju tiṉa nganampa nyinanyi. Paluru kutu mayutju tiṉa nyinaku ngula uwankarra palumpa waarrkana nyinanyingka, ilkari ngurrara tjuṯa, mamu tjuṯaṯarra. 26 Ngula yuḻṯa palula paluru watjalku yaṉangu tjuṯala, mirrirringutja tjuṯaṯarra kanarringkula kana kutu nyinanytjaku. Palulanguru wiya nganaṉa palumpa walytja tjuṯa piyuku mirrirriku, ngaangka mantangka kutju nganaṉa mirrirringanyi. 27-28 Katutjaku wangka irriṯi tjunutja yalatji ngaranyi, “Kurayitjanya tjanampa mayutju tiṉa nyinaku uwankarraku, ilkari ngurrara tjuṯaku, manta ngurrara tjuṯaku, mamu tjuṯakuṯarra.” Ngayulu Puulalu nyurrangarrinya watjaṉi. Yilta palumpa tjanampa uwankarraku Yiitju Kurayitjanya mayutju tiṉa nyinaku, wiyara Katutjaku paluru mayutju nyinaku, wiya. Ngula, Katutjalu Yiitju Kurayitjanya mayutju tiṉa nyinatjunku uwankarra panyapa tjuṯaku. Palulanguru Yiitjulu paapa Katutjanya yalatji watjalku, “Nyuntulpi kuwarri nganampatju mayutju tiṉa nyinanyi. Nyuntu kutu yalatji nganampatju nyinama!” Palunyatjanu Paapa Katutjanya kutju uwankarraku nyinamalpa, yaṉangu tjuṯaku, ilkari ngurrara tjuṯaku, mamu tjuṯakuṯarra.

29 Kutjupa tjuṯangkunyurra watjalpayi yalatji, “Ngayuku walytjakunyu mirrirringu Yiitjuku walytjarringkula, wiya ingkaṯangku palunya papatatjimilaṉu. Ngayunya ingkaṯangku piyuku papatatjimilantjaku ngayuku walytja mirrirringutjaku. Walytja panyapaku ngayuluṉara piyuku papatatji mantjiṉu, paluru ngula mirringuru Katutjaku ngurrangka kana nyinanytjaku.” Nyaaku paluru mirrirringutjaku papatatji piyuku mantjiṉu?, tjinguru Katutjalu palunya mirringuru kanantjawiyangka. Yalatji ngayulu nyurrangarrinya ngunytji watjaṉu nintilkitjangku. 30-31 Nganaṉatju kuliṉi Katutjalu yilta nganaṉanya mirringuru kanalku. Yalatji kulira nganaṉatju palumpa waarrkana tjuṯangku palumpa waarrka rapangku palyalpayi, yunytjuwiya tjuṯangku panypurangkula pungkunytjala. Wiya nganaṉatju nguḻurringkupayi paluru tjana nganaṉanya mirri pungkukitjangku watjantjala. Ngayulu nyurrangarrimpa yunypa nyinanyi Yiitju Kurayitjakunyurra tjukarurru nyinanytjala. Yalatji yunyparringkula ngayulu nyurrangarrinya wangka ngaatjanya watjaṉi. 32 Yirriṯi tawunu Yipitjala yunytjuwiya tjuṯangku ngayunya panypurangkula pungkupayi. Wantinytjawiyangku ngayulu kutu Yiitjuku wangka kutjupa tjuṯangka tjakultjunkupayi. Ngayulu yalatji kulilpayi, “Tjinguru tjana ngayunya mirri pungkunytjala, ngula ngayulu mirringuru kanarriku. Katutjaluṉi kanara kanyilku.” Wiyawana paluru tjana watjalpayi, “Ngula Katutjalu nganaṉanya wiya kanalkukunyu.” Yaṉangu Yiitjuku ngurrpa tjuṯangku yalatji watjalpayi, “Kuwarri ngayulu yunypangku mangarri ngalkura waama tjikilku. Tjinguru aaḻi mirrirringkula mirri kutuṉa ngarrimalpa.” Yalatji nganaṉa wiya kulira wiyawana nyinanytjaku. Katutjalu nganaṉanya ilta mirringuru kanara kanyilku palumpa ngurrangka.

33-34 Paluru tjana wiyawanangku kulira wiyawanangkulpiya palyalpayi. Palula tjanalawana wiya nyurrangarri yankula tjungurrinytjaku, yalatji tjungu nyinarra wiyawananyurra palyaltjipingka, palunya tjananya nguwanpangku. Kutjupa tjuṯangkunyurra yalatji wiyawana kuliṉi, Katutjalu nganaṉanya wiya mirringuru kanalku. Wiyanyurra Katutjaku walytja tjuṯa nyinanyi, palumpa wangkanyurra kulira wantinyi. Tjukarurrulpinyurra kulintjaku. Kutjupa tjuṯangkunyurra tjukarurru kuliṉi. Panyapa tjuṯakunyurra watjilarrinytjaku tjana wiyawana kulintjala.

35 Yaṉangu panyapa tjuṯangku yalatji watjalpayi, “Katutjalu tjananya yaṉangu tjuṯa wiya kanalkukunyu. Mirrirringkula yaṉangu mantangka ngarrirra wiyarriku, wiya tjananya Katutjalu yaṉangu kutjupara kana nyinatjunku.” 36-37 Yalatji paluru tjana wiyawanangku kuliṉi. Tjiiṯaya kulila! Tjiiṯa nganaṉa mantangka tjawara tjunkupayi. Tjiiṯa nguwanpa nganaṉa yaṉangu mirri mantangka tjunanyi. Tjiiṯa palulanguru yukiri pakara watiyalpi ngaraku. Yukiri nguwanpa yaṉangu mirringuru pakara yaṉangu kutjuparriku. 38 Katutjalu walytjangku kulira yukiri palunya palyalku. Palunya nguwanpa Katutjalu walytjangku kulira yaṉangu kutjupara palyara nyinatjunku, mirringuru. 39 Katutjalu walytjangku kulira ngaangka mantangka yaṉangu nganaṉanya nyinatjunanyi, maḻu tjuṯaṯarra nyinatjunanyi. Naanytja tjuṯaṯarra tjananya paluru nyinatjunanyi. Tjuḻpu tjuṯaṯarra paluru nyinatjunanyi. Piitji tjuṯaṯarra paluru nyinatjunanyi. Yalatji tjananya yaṉangu tjuṯa, kuka tjuṯaṯarra nyinatjunanyi. 40 Kutjupa tjuṯaṯarra Katutjalu palyaṉu tjiṉṯu, pira, piṉṯirri tjuṯaṯarra palyaṉu. Mantangka watiya tjuṯa palyaṉu yukiritjarra, puḻi tjuṯaṯarra palyaṉu. Yalatji nguwanpa Katutjalu kutjupa kutjupa palyalpayi. 41 Wiya tjiṉṯu pira tjungu ngaranyi, tjaalpapula ngaranyi. Piṉṯirri kutjupa tjuṯa tiṉa ngaranyi, kutjupa tjuṯa wiima ngaranyi. Palya tjuṯaya yalatji ngaranyi.

42 Yuwa, Katutjalu walytjangku kulira palunya tjuṯa palyalpayi, yalatji nguwanpa paluru walytjangku kulira nganaṉanya yaṉangu tjuṯa mirringuru kanara yaṉangu kutjuparalanya nyinatjunku. Nganaṉa yaṉangu kutjuparringkula kana kutu nyinamalpa. 43 Mantangka nyinarra nganaṉa mirrirriku. Mirrirringkula nganaṉa yaṉangu mantarringkula wiyarriku. Ngula nganaṉa kanarringkula yaṉangu kutjuparringkula yaṉangu palyalpila nyinaku miiṉṯawiya. 44 Nganaṉa yaṉangu ilytjanpatjarra mantangka nyinanyi. Ngula nganaṉa yaṉangu kutjuparrikulpi. Yilta Katutjalu nganaṉanya kanara yaṉangu kutjupara nyinatjunku, yaṉangu ilkari ngurraralpi.

45 Katutjaku wangka irriṯi tjunutja ngaranyi yalatji. Katutjalu yurrunpa wati yini Yatamanya palyaṉu, manta ngurrara. Palulanguru wati kutjupalpi Yiitjunya mantangka nyinapayi. Paluru mirrirringkula yaṉangu kutjuparringu, ilkari ngurraralpi. 46 Nganaṉa kuliṉi wati Yatamanya paluru manta ngurrara yurrunpa mantangka nyinapayi. Palulanguru wati kutjupa Yiitjunya ilkari ngurrara mantangka nyinapayi. 47 Wati paluru Yatamanya mantatjanu Katutjalu palyaṉu. Wati panyapa ilkari ngurrara nyinangi, Katutjalu mantatjanu palyantjawiya. 48 Nganaṉa uwankarra manta ngurrara nyinanyi yaṉangu Yatamanya nguwanpa. Nganaṉa ngula yaṉangu ilkari ngurrara tjuṯa nyinaku, yaṉangu Yiitjunya nguwanpa. 49 Kuwarri nganaṉa yaṉangu yilytjanpatjarra Yatamanya nguwanpa nyinanyi. Ngula nganaṉa yaṉangu kutjuparringkula yaṉangu Yiitjunya nguwanpa nyinaku.

50 Walytja tjuṯa, wangka ngaatjanyaya kulila! Yaṉangu yilytjanpatjarra wiyala Katutjaku ngurrangka palumpa walytja tjuṯa nyinaku. Yaṉangu yilytjanpatjarra wiyala kana kutu nyinaku, yaṉangu kutjuparringkula nganaṉa kana kutu nyinaku.

51-52 Kulilaya! Wangka ngaatjanya kuwarri kutjunyurra kuliṉi. Wiya yaṉangu kutjupa tjuṯangku wangka ngaatjanya yurrunpa kuliṉu. Ngula, wiya nganaṉa yuwankarra mirrirriku, kutjupa tjuṯa nganaṉa kana nyinaku. Kana nyinarra nganaṉa parrpaṯu yaṉangu kutjuparriku, kuru parrpaṯu pinypanytja nguwanpa. Ilkari ngurrarangku turampata mirratjingantjala Katutjalu tjananya mirri tjuṯa kanara yaṉangu kutjupalku, nganaṉaṯarra yaṉangu kutjuparriku. Palulanguru nganaṉa kana kutu nyinaku Katutjaku walytja tjuṯa, wiyala piyuku mirrirriku. 53-55 Katutjalu tjananya mirri palumpa walytja tjuṯa kanara yaṉangu kutjupalku. Kana nyinapayi tjuṯaṯarra paluru yaṉangu kutjupalku. Uwankarra yaṉangu kutjuparringkula kana kutu nyinamalpa. Yalatji paluru tjana yaṉangu kutjuparrinytjala Katutjaku wangka yurrunpa tjunutja iltarriku. Wangka palunya yalatji ngarrinyi,

56 Yaṉangungku Katutjaku wangka kilytjuntankula kutu paluru kuya palyanmalpa, wiya paluru Yiitjunya tjapilku kuya waṉinytjaku, wantiku. Ngula yaṉangu paluru mirrirriku. Ngula Katutjalu yaṉangu palunya kuutawutjungka watjara warukutu wantirriyalku. 57 Yiitju Kurayitjalu nganampa kuya waṉinyi, mirrirringkula kana kutu nyinanytjaku. Katutjanya nganaṉa puḻkawaṉinytjaku Yiitju Kurayitjanya mantakutu ngalya wantirriyaṉutjangka.

58 Walytja tjuṯa, wangka ngaatjanyalpiya kulila! Rapaya kutu nyinama Yiitjuku!, wiyanyurra puṯu kulintjaku. Katutjalu ilta nganaṉanya mirringuru kanalku. Kutu nyurrangarri Katutjaku waarrka palyantjaku. Nintingkunyurra kuliṉi, kutunyurra yalatji palyantjala Katutjanya nyurrangarrimpa yunyparringamalpa.