1 Tawunu Tjiitjarriyala mayutju Kuuniliyatjanya tjanampa nyinangu tjuulytji tjuṯaku. Tjuulytji tjuṯa panyapa yinitjarra nyinangu. Yini yalatji, “Yitaliyanya tjuṯanya.” 2 Mayutju paluru Kuuniliyatjanya Katutjaku walytja nyinangu, Yiitjuku walytja wiya. Paluru Tjuwuwiya nyinangu. Walytja tjuṯa palumpaṯarra Katutjaku walytja nyinangu, Yiitjuku walytja wiya. Paluru Katutjala kututja tjapira nyinapayi. Tjuwu yulytjawiya maralpa tjuṯa tjananya yaṉṯayaṉṯalpayi, mani yulytjaṯarra yungkupayi. 3 Mungarrtji tjiṉṯu katu, Kuuniliyatjalu tjukurrpa nyangu, Katutjakuṉu ilkari ngurrara palumpa waaḻangka tjarrpanytjala. Ilkari ngurrara paluru Kuuniliyatjanya yini watjaṉu, “Kuuniliyatja.” 4 Kuuniliyatjalu yirra nyakula puṯu kulira nguḻunguḻurringkula tjapiṉu, “Nyaakuṉin yini watjara yaḻṯingu?” Ilkari ngurrarangku watjaṉu, “Katutjanya nyuntupa yunyparringanyi nyuntu maralpa tjuṯa yaṉṯayaṉṯaṉingitjangka. Nyuntu palunya tjapintjala palurunta kulilpayi.” Ilkari ngurrarangku piyuku watjaṉu, 5 “Waarrkana nyuntupaṉu maṉkurrpa tjananya wantirriyala!, tawunu nyarra Tjuupalakutu, wati kutju yini Piitanya yaḻṯirra ngalya katinytjaku. Palunya yini kutjupaya tjana watjalpayi, ‘Tjaamananya.’ 6 Tjaamana kutjupangka paluru nyinanyi, laatja palyalpayingka. Palumpa waaḻa, yurungka tjayiṯi ngaranyi.” 7 Ilkari ngurrara paluru wangka panyapa wangkarra Kuuniliyatjanya wantikatirra yanu. Palulanguru Kuuniliyatjalu tjananya yaḻṯingu, palumpa waarrkana kutjarra tjuulytji kutjuṯarra. Tjuulytji paluru maḻpangku Kuuniliyatjanya yaṉṯayaṉṯalpayi, paluru Katutjaku tjukarurru nyinapayi. 8 Ilkari ngurrarangku watjaṉutjangka tjakultjunkula Kuuniliyatjalu tjananya iyaṉu, tawunu Tjuupalakutu.

9 Wati panyapa maṉkurrpaya yankula mungarringu. Kutuya yankula tjiṉṯurringkula tjana yankula aaa tawunu Tjuupala ilarringu, kaḻaḻa. Piitanya waaḻangka katu kaḻpangu, Katutjala wangkakitja. 10 Kaḻparra paluru tjapira paḻtjatjirratjarringu, mangarri waaḻa ngurrarangku kuwarripa kutjantjala. 11 Paluru paṯara tjukurrpalpi nyangu, ilkari alytjurankunytjala, kaliki tiṉa ilkaringuru ngalya tjarutjunutjangka. Kaliki kuuna puupala ruupa nguwanpatjarra karrpira tjarutjunutjangka nyangu. 12 Kaliki palula aṉangungku ngaa tjuṯa wiya ngalkupayi. Ngarangiya kukawiya tjuṯa tuungkiyi kamula, tjuḻpu yalatji, piḻkaṯiṯarra ngarringi. Kukawiya palunya tjananya Tjuwu tjuṯangku ngalkuwiyangku wantipayi, luwu tjanampa yalatji ngarapayi. 13 Ilkari katunguru Piitanya watjaṉu, “Piita, pakara kukawiya ngaa tjuṯanya pungkula ngalkula!” 14 Piitalu watjaṉu, “Mayutju. Luwu yalatji ngaranyilampatju, nganaṉa ngalkuwiyangku wantipayi. Ngayuluṉa pala tjuṯa ngalkuwiyangku wantinyi, ngayulu luwu palunya wiya kilytjuntankunytjaku.” 15 Ilkari katunguru Piitanya piyuku watjaṉu, “Wiya. Katutjalu watjaṉu pala tjuṯa palya nyuntu ngalkuntjaku. Nyuntu ngalkura wiya palumpa luwu kilytjuntankuku.” 16 Yalatji ilkari katunguru watjaṉu maṉkurrngara. Palunyatjanu wangkarra wiyarringutjangka, kaliki paluru piyuku katukutu kaḻpangu. 17 Yalatji nyakula Piitalu puṯu kuliṉingi, “Nyaa ngayunya nintilkitjangku tjukurrpa nintiṉu?” Yalatji kulintjala paluru wati panyapa maṉkurrpaya yankula kiiṯangka wirrkara ngarangu, Kuuniliyatjalu wantirriyaṉutja tjuṯanya. 18 Kiiṯangkaya ngarala tjapiṉu yalatji, “Tjinguru Tjaamana Piitanya waaḻa ngaangka nyinanyi?”

19 Piitalu tjukurrpa panyapa nyakula kutu puṯu kulintjala, Katutjaku kurrunpangkulpi palunya watjaṉu, “Kulila! Wati maṉkurrpangku nyuntunyaya wati Tjuwuwiya maṉkurrpangku tjapiṉu kiiṯangka aatjayiṯinguru ngarala. 20 Pakara tjarukatirra palula tjanalawana nyuntu kuwarri palya yankunytjaku. Luwu nyurrangarrimpaṉu puntura kulintjawiya nyuntu tjanalawana yankunytjaku. Ngayulu watjaṉu tjana nyuntunya ngurrira mantjira maḻaku katinytjaku.” Tjuwu tjuṯaku luwu ngarangi, tjana wiya Tjuwuwiya tjuṯawana tjungu yankunytjaku.

21 Piitalu tjarukatirra tjananya tjapiṉu, “Nyurrangarri ngayuku tjapiṉu? Nyaakitjanyurra ngalyanu?” 22 Tjana Piitanya watjaṉu, “Nganampa mayutju Kuuniliyatjalu nganaṉanya iyaṉulanyatju. Paluru tjuulytji tjuṯaku mayutju nyinanyi, Katutjaku walytja. Tjuwu tjuṯangkuya watjalpayi yalatji, ‘Kuuniliyatjanyakunyu palya nyinanyi, nganampa ngulytju.’ ” Paluru tjana piyuku watjaṉu yalatji, “Ilkari ngurrarangku Kuuniliyatjanya watjaṉu, nyuntu kuwarri palumpa ngurrakutu yankula wangka tjakultjunkunytjaku.” 23 Palulanguru Piitalu tjananya watjaṉu, “Palya nyurrangarri waaḻa ngaangka tjarrparra ngalkura ngarrinytjaku, aaḻi yankukitja.” Tjiṉṯurringkula pakara tjana tjungu yanu tawunu Tjiitjarriyalakutu, Yiitjuku walytja tawunu Tjuupanya ngurrara tjuṯaṯarra. 24 Ngururrpa tjana ngarrirra aaḻi tawunu Tjiitjarriyalaya tjarrpangu. Kuuniliyatjalu yurrun yurrunpangku kulira tjunguṉu tjananya, palumpa walytja tjuṯa, walytja yilatja tjuṯaṯarra. 25 Kuuniliyatjaku waaḻa yurilpangka Piitanyapula Kuuniliyatjanya tjungurringu. Tjungurringkula Piitala pupakatirra palunya waḻkuṉu. 26 Piitalu witira palunya ngaratjunkula watjaṉu, “Ngayulu wiyaṉa mayutju tiṉa nyinanyi, nyuntu wiya ngayunya waḻkuntjaku.” 27 Wangkarrapula waaḻangkalpi maa tjarrpangu. Tjarrparra tjananya Piitalu nyangu yaṉangu tjuṯa nyinanyingka. 28 Piitalu tjananya Tjuwuwiya tjuṯa watjaṉu yalatji, “Nganaṉatju Tjuwu tjuṯangku yaṉangu Tjuwuwiya tjuṯa nyakula wantipayi tjungurrinytjawiyangku, nganampatju luwu yalatji ngaranytjala. Yalatjikunyurra ninti nyinanyi. Katutjalulpiṉi nintiṉu luwu nganampa wantirra nyurrangarrilawana tjungurrinytjaku. 29 Katutjaluṉi yalatji nintintjala luwu palunya wantirra ngayulu nyurrangarrimpa walytja tjuṯawana tjungurringkula ngalyanu. Nyurrangarri nyaakitjangku ngayunya watjaṉu ngalya yankunytjaku?” 30 Kuuniliyatjalu watjaṉu, “Mungaṯu ngayulu mungarrtji yalatjipuru Katutjala wangkangi, ngurra ngaangka, kanya ilkari ngurrara ila ngarakatingu, mantarra palumpa yirrnyaṉingi. 31 Paluruṉi watjaṉu, ‘Kuuniliyatja. Katutjanya nyuntupa yunyparringangi nyuntu maralpa tjuṯa yaṉṯayaṉṯaṉingitjangka. Nyuntu palunya tjapintjala palurunta kulilpayi rawangku.’ 32 Piyukuṉi watjaṉu ilkari ngurrarangku, ‘Waarrkana maṉkurrpa tjananya wantirriyala!, tawunu Tjuupalakutu wati kutju yaḻṯirra ngalya katinytjaku, yini Tjaaman Piitanya. Tjaamana kutjupangka paluru nyinanyi, laatja palyalpayingka.’ 33 Ilkari ngurrarangku panyapa watjaṉutjangka, ngayulu waarrkana tjuṯa parrpaṯu yaḻṯirra iyaṉu nyuntunya yaḻṯirra ngalya katinytjaku. Palya nyuntu kulira ngalya yanu. Katutjanya nganaṉalawana kuwarri nyinanyi. Kala, nyuntu palumpa wangkalanyatju tjakultjurra!”

34-35 Piitalu tjananya watjaṉu, “Kuwarrilpi ngayulu kuliṉi, Katutjalu wiya Tjuwu tjuṯaku kutju yunyparringanyi. Paluru Tjuwuwiya tjuṯakuṯarra yunyparringanyi. Yaṉangungku palumpa wangka kulira tjukarurru nyinanytjala Katutjanyara yunyparringanyi, Tjuwu tjuṯaku kutju wiya. 36 Katutjaku wangka palunya nganaṉatju Yitjurilaku walytja ngaṉṯitja tjuṯangku kuliṉu Yiitju Kurayitjalu nganaṉanya tjakultjunanyingka. Katutjalu Yiitjunya mayutju tiṉa wantirriyaṉu nganaṉatju palumpa wangka kulira palumpa walytjarrinytjaku, kalyparringkula nyinanytjaku, Katutjaku. 37-38 Nyurrangarri nintingku kuliṉi tjana Yiitjukuṉu wangka manta Tjuutiyalawana tjakultjurinangitjangka. Yurrunpa Tjaanalu tjananya nintira watjaṉu kapingka tjarrparra papatatjirringkunytjaku. Palulanguru Katutjalu palumpa kurrunpa Yiitjula Natjaritjanya ngurrarangka tjarrpatjunu. Kurrunpa paluru Yiitjula tjungu parra yanangi manta Kaliliyilawana. Katutjaku kurrunpatjarrangku ngangkari tiṉatjarrangku Yiitjulu ngurra palulawana miiṉṯa tjuṯa, mamutjarra tjuṯaṯarra palyarinangi. Miiṉṯa an mamutjarra palunya tjananya mamuku mayutjungku kuyara kanyilpayi. Yiitjulu tjananya palyarinangi. 39 Yiitjulu Tjuwuku ngurra tjuṯawanangku Tjarutjalumalawanangkuṯarra palyarinkunytjala, nganaṉatju tjungu parra yankula nyakuyinkupayi. Palulanguru Yiitju palunya tjana waralytjunkula yiluntanu. 40-41 Paluru munga kutjarra mirri ngarrirra kanarringkula pakaṉu. Katutjalu palunya yalatji mirringuru pakaltjingaṉu. Wiya yaṉangu yuwankarrangkuya kanarrinytja palunya nyangu, maṉkurrpangku kutjulatju. Nganaṉatju palulawana ngalkura tjikilpayi. Katutjalu yurrunpa kuliṉu, nganaṉatju palumpa wangka kulira yaṉangu kutjupa tjuṯangka tjakultjurinkunytjaku.

42 “Katutjalulanyatju watjaṉu Yiitjukuṉu wangka tjakultjurinkunytjaku. Yara kutjupaṯarralatju tjakultjurinkunytjaku Katutjalu watjaṉu yalatji. Paluru kuliṉi, ngula Yiitjunya kuutawutjuku mayutju tiṉa nyinaku yaṉangu yuwankarra watjantjaku, mantangka kana nyinapayi tjuṯa, yurrunpa mirrirringutja tjuṯaṯarra. 43 Katutjaku wangka watjalpayi tjuṯangku yalatji watjaṉu, ‘Yaṉangungku mayutju Kurayitja palumpa wangka kulintjala, Katutjalu palumpa kuya waṉirra kalyparriku.’ ”

44 Piitanya yalatji wangkanyingka, Katutjaku kurrunpa tjanala tjarrpangu. 45-46 Katutjaku kurrunpa tjanala tjarrpangutjangka tjana wangka kutjupalpi wangkangu. Tjuwu tjuṯangku Piitalawana ngalya yanutja tjuṯangku puṯu kuliraya watjaṉu yalatji, “Yilta, ngaa tjuṯa, Tjuwuwiya tjuṯakampa wangka kutjupa wangkanyi Katutjaku kurrunpa tjanala tjarrpangutjangka. Tjana Katutjanya puntura waḻkuṉi.” Piitalu tjananya watjaṉu, 47 “Nyaanyurra kuliṉi? Palya ngaa tjuṯanya nganaṉa kapingka tjarrpatjunkula papatatjimilantjaku? Katutjalu tjanala palumpa kurrunpa tjarrpatjunkula nganaṉanya nintiṉi, tjana ilta palumpa walytja tjuṯa nyinanyi. Yalatji nguwanpa nganaṉala Tjuwu tjuṯangka palumpa walytja tjuṯangka yirriṯi kurrunpa tjarrpatjunu.” 48 Palulanguru Piitalu watjaṉu palunya tjananya kapingka tjarrpatjunkula papatatjimilantjaku, tjana yalatji watjantjala, “Ngayulu mayutju Yiitjuku walytja nyinanyi.” Palulanguru Kuuniliyatjalungarriya Piitanya tjapiṉu, paluru tjanalawana tjiṉṯu maṉkurrpa nguwanpa nyinanytjaku.