1 Yiitjuku walytja manta Tjuutiyanya ngurrara tjuṯangku, Yiitjuku waarrkana tjuṯangkuṯarra tjakulpa kuliṉu Tjuwuwiya tjuṯangku Yiitjukuṉu wangka kuliṉutjangka. 2 Yalatjiya Tjuwu tjaampalangku kulira Piitanya kuru watjaṉingi, paluru Tjarutjalumalakutu ngalya tjarrpangutjangka. Paluru tjana kuliṉingi Yiitjuku walytjarringkula Tjuwuwiya tjuṯaya watirrinytjaku. 3 Paluru tjana Piitanya kuru watjaṉu, “Nyuntu nganampa luwu kilytjuntanu. Kuuniliyatjanyangarri nyuntu tjanala waaḻangka tjarrparra tjungurringkunytjawiyangku wantimara. Nyuntu tjanala ngalkuwiyangkuṯarra wantimara.” 4 Piitalu tjananya yalatji tjakultjunu, 5 “Tawunu Tjuupalaṉa nyinarra Katutjanya tjapira yankurringu. Ngayulu tjukurrpa nyangu, kaliki tiṉa ilkaringuru ngalya tjarutjunutjangka. Kaliki kuuna puupala ruupa nguwanpatjarra karrpira ngalya tjarutjunutjangka ngayulu nyangu. 6 Kaliki palula ngayulu nyangu kukawiya tjuṯa ngarangi, tuungkiyi kamula, tjuḻpu, piḻkaṯiṯarra ngarringi. 7 Ilkari katunguru ngayunya watjaṉu, ‘Piita, pakara kukawiya pala tjuṯa pungkula ngalkula!’ 8 Ngayulu watjaṉu, ‘Mayutju, luwu yalatji nganampatju ngaranyi, yalatji nganaṉa ngalkuwiyangku wantipayi. Ngayuluṉa pala tjuṯa ngalkuwiyangku wantinyi, ngayulu luwu palunya wiya kilytjuntankuku.’ 9 Ilkari katunguru ngayunya piyuku watjaṉu, ‘Wiya. Katutjalu watjaṉu pala tjuṯa palya nyuntu ngalkuntjaku. Nyuntu ngalkura wiya palumpa luwu kilytjuntankuku.’ 10 Yalatji ilkari katunguru watjaṉu maṉkurrngara. Palulanguru kaliki paluru ilkarikutu maḻaku kaḻpangu.

11 “Palulanguru wati Tjuwuwiya maṉkurrpa ngalya yankula waaḻangka yurilpangka ngarangi, Tjiitjarriyanya ngurrara tjuṯa. Palunya tjananya mayutju Kuuniliyatjalu wantirriyaṉu ngayunya yaḻṯirra katinytjaku. 12 Katutjaku kurrunpangkuṉi watjaṉu nganampa luwu kulintjawiya ngayulu tjanala tjungurringkula yankunytjaku. Yiitjuku walytja Tjuupanya ngurrara tjuṯa tjungulatju yanu tawunu Tjiitjarriyalakutu, Kuuniliyatjaku waaḻakutu. Tjuupanya ngurrara tjikitjipalalatju nyinangi. 13 Kuuniliyatjalulanyatju tjakultjunu ilkari ngurrara nyangutjangku. Ilkari ngurrara paluru Kuuniliyatjanya watjaṉu, ‘Wantirriyala tjananya nyuntupa waarrkana maṉkurrpa tawunu Tjuupalakutu!, Tjaamananya yini kutjupa Piitanya yaḻṯirra ngalya katinytjaku. 14 Paluru nyurrangarrinya Katutjaku wangka nintilku. Wangka palunyanyurra kulintjala, Katutjalu nyurrangarrimpa kuya waṉiku, nyuntupa walytja tjuṯakuṯarra. Yalatji waṉinytjala, nyurrangarri palumpa ngurrangka ngula kana nyinamalpa.’ ” Piitalu tjananya piyuku tjakultjunu, 15 “Kuuniliyatjaku ngurrangka ngayulu tjanala Katutjaku wangka nintintjala, Katutjaku kurrunpa tjanala tjarrpangu, yirriṯi nganaṉala tjarrpangutja nguwanpa. 16 Nyakula ngayulu kuliṉu, Yiitjulu nganaṉanyatju yurrunpa watjaṉu yalatji, ‘Tjaanalu tjananya yaṉangu tjuṯa kapingka tjarrpatjunkula papatatjimilalpayi, tjana Katutjaku tjukarurru nyinanytjaku. Tjiṉṯu maṉkurrpa Katutjalulpi nyurrangarrila palumpa kurrunpa tjarrpatjunku nyurrangarri palumpa tjukarurru nyinanytjaku.’ 17 Yirriṯi nganaṉa mayutju Yiitjunya Katutjakuṉu katja kulintjala, Katutjalu nganaṉala tjarrpatjunu palumpaṉu kurrunpa. Yalatji, Tjuwuwiya tjuṯangkalpi tjanala palumpaṉu kurrunpa paluru tjarrpatjunu. Katutjalu yalatji tjanala tjarrpatjunutjangka, ngayulu puṯu kuliṉangi Katutjanya yalatji nguwanpa marrkuntjaku, ‘Katutja, nyuntu wiya tjanala nyuntupa kurrunpa tjarrpatjunamara, nyuntu wantimara.’ ”

18 Paluru tjana Piitaku wangka kulira yunyparringulpi. Katutjanyalpiya waḻkuṉu yalatji, “Katutjanya palya nyinanyi. Palurulpi tjanampa Tjuwuwiya tjuṯakuṯarra kuya waṉingi, ngula nganaṉa tjungu palumpa ngurrangka kana nyinanytjaku.”

19 Yiitjuku yunytjuwiya tjuṯangku yirriṯi Tiipananya iluntara, Yiitjuku walytja kutjupa tjuṯakulpiya ngurririnangi mirri pungkukitjangku. Palulanguruya Yiitjuku walytja tjuṯa nguḻu yankula waṉingu manta tjuṯawana. Kutjupa tjuṯa tjana manta Panitjiyalakutu yankula nyinangi, kutjupa tjuṯa manta Tjapurritjalakutu, anta tawunu Yantiyukalakutuṯarra yankula nyinangi. Paluru tjana Tjuwu tjuṯangka kutju tjanala, Yiitjukuṉu wangka tjakultjurinangi. Tjuwuwiya tjuṯa tjana nyakula wantipayi Yiitjukuṉu wangka tjakultjunkunytjawiyangku.

20 Yiitjuku walytja tjaampalangkuya, manta Tjapurritjanya ngurrara tjuṯangku, manta Tjayirininya ngurrara tjuṯangkuṯarra yankula wangka Yiitjunyatjarra tjakultjunu Tjuwuwiya tjuṯangka, tawunu Yantiyukala. 21 Katutjalu tjakultjunkupayi palunya tjananya rapaṉu tjukarurru Yiitjukuṉu wangka nintintjaku. Yantiyukanya ngurrara tjuṯalingkungkuya Yiitjukuṉu wangka kulira palumpa walytjarringu. 22 Yiitjuku walytja Tjarutjalumanya ngurrara tjuṯangkuya tjakulpa kuliṉu, Yantiyukanya ngurrara tjuṯaya Yiitjuku walytjarringkula nyinangutjangka. Tjakulpa kulira tjana Panapatjanya wantirriyaṉu tawunu Yantiyukalakutu.

23 Tawunu palula Panapatjanya tjarrparra Yiitjuku walytja Tjuwuwiya tjuṯa nyakula yunyparringu, Katutjalu tjananya yunypalingku palyaṉutjangka. Panapatjalu tjananya tjungura nintiṉingi tjukarurru kutu Yiitjuku nyinanytjaku. 24 Katutjaku kurrunpangku rapara kanyintjala Panapatjalu palumpa wangka tjukarurru kulira tjananya nintiṉingi. Palulanguru Yantiyukanya ngurrara kutjupa tjuṯangku Yiitjukuṉu wangka kulira palumpa walytjarringu. 25 Palulanguru Panapatjanya tawunu Taatjatjalakutu yanu, wati Tjuulaku ngurrilkitja. 26 Tjuulanya nyakula wangkangu tawunu Yantiyukalakutu yaḻṯirra katikitjangku. Panapatjalu Tjuulanya katingu, tawunu palulakutu. Paluru kutjarrapula Yiitjuku walytja tjuṯa nintiṉingi, rawangku, yiiya kutju. Yiitjuku walytja paluru tjana tjungurrinytjala yaṉangu Yantiyukanya ngurrara tjuṯangku wangka yalatji watjalpayi, “Kurayitjaku walytja tjuṯaya tjungurrinyi.” Yurrunpa Yiitjuku walytja tjuṯa nyakula kutjupa tjuṯangku wiya wangka yalatji, “Kurayitjaku walytja tjuṯa” watjalpayi, Yantiyukanya ngurrara tjuṯangku kutju. Yaṉangu ngaṉṯitja tjuṯangku wangka yalatji, “Kurayitjaku walytja tjuṯa” watjalpayi.

27 Palulanguruya Katutjaku wangka watjalpayi tjuṯaya Tjarutjalumalanguru tawunu Yantiyukalakutu yanu. 28 Katutjaku wangka watjalpayi palunya tjuṯawana kutju yini Yakapatjanya nyinangi. Paluru tjana Yiitjuku walytja tjuṯangka tjungurringkula Yakapatjalu ngarala tjananya watjaṉu, “Katutjaku kurrunpangku ngayunya nintiṉu yalatji. Ngurra tjuṯawana ngula mangarri yaṉangu tjuṯaku wiyarriku. Yaṉangu tjuṯangku, nganaṉaṯarra puṯu kulilku mangarriku.” Wangka palumpaṉu ngula yiltarringu, mayutju Kulutiyatjanya tawunu Ruumala nyinanytjala. 29 Yakapatjaku wangka tjana kulira wangkangu, “Nganaṉa uwankarrangku mani tiṉa waṉinytjaku. Mani waṉingutja maṉkurrpangku Tjarutjalumalakutu katirra Yiitjuku walytja tjuṯa yungkunytjaku. Mangarri tjanampa manta Tjuutiyanya ngurrara tjuṯaku pakantjawiyangka, mani palunyatjarrangkuya mangarri payimilantjaku.” 30 Yilta mani tiṉaya waṉirra watjaṉu Panapatjalu, Tjuulalu Tjarutjalumalakutu katirra tjaatjiku mayutju tjuṯa yungkunytjaku.