1 Nganaṉa palumpa wangka kulira walytjarringkula yalatji kuliṉi, “Paluru watjara ilta nganaṉanya palumpa ngurrangka yaṉṯayaṉṯalku.” 2 Nganaṉanya nguwanpa tjana yirriṯi nyinapayi tjuṯangku Katutjaku wangka kulira walytjarringkunytjala Katutjanya tjanampa yunypa nyinapayi. 3 Nganaṉa wiyangka Katutjalu manta, ilkariṯarra palyalkitjangku watjaṉu. Yalatji nganaṉa nintingku kuliṉi. Nganaṉa palumpa wangka kulira walytjarringkula kuliṉi yalatji, “Manta ilkariṯarra ngaranytjawiyangka Katutjalu irriṯi watjaṉu manta ilkariṯarra ngaranytjaku. Paluru watjantjala iltalpi ngarangu.”

4 Yirriṯi wati Yipulalu Katutjaku wangka kulira kuka tjawirrilyi pungu. Katutjalu tjawirrilyi palumpa yunyparringkula kuliṉu, “Yipulanya ngayuku tjukarurru nyinanyi.” Palumpa kaakaku yini Kayinaku mangarri tjawirrilyi nyakula wiya yunyparringu. Nganaṉa Yipulanya kulira yalatji kuliṉi, “Yipulalu Katutjaku wangka yilta kulira palumpa walytja nyinapayi.”

5 Palunyatjanu wati kutjupa yini Yiinukanya Katutjaku wangka kulira palumpa walytja nyinanytjala Katutjalu palunya ilkarikutulpi katingu. Yalatji katinytjala yaṉangu tjuṯangku palumpa puṯu ngurriṉingi. Katutjaku wangka yirriṯi tjunutja yalatji ngarrinyi, “Katutjalu wati Yiinukaku yunypa nyinarra ilkarikutu palunya katingu.” 6 Yaṉangungku Katutjaku wangka wiya kulira walytjarrinytjala, Katutjanyara wiya yunypa nyinaku yaṉangu palumpa. Yaṉangungku tjinguru Katutjaku walytja nyinakitjangku kulira, paluru palumpa wangka kulira walytjarrinytjaku. Yalatji paluru kulintjaku, “Ngayulu Katutjanya tjapiṉi, paluru ilta ngayuku wangka kuliṉi. Ngayulu palunya tjapintjala ilta paluruṉi yaṉṯayaṉṯalku.”

7 Yurrunpa kapi tiṉangku pungkukitjangku kuwarripangka wati Nuuwalu Katutjaku wangka kulira walytjarringu. Katutjalu yalatji watjantjala paluru kulira puuta tiṉa palyaṉingi. Yaṉangu tjuṯa kapi tiṉangka mirrirringangi, kanya Nuuwanya palumpa pamuli tjuṯaṯarra tjarrparra puuta palula kanarringu. Yalatji Katutjalu Nuuwanyangarri kanaṉu tjana palumpa wangka kulira walytjarrinytjala. 8 Wati Yipuramaluṯarra Katutjaku wangka kulira palumpa walytjarringu. Katutjalu palula watjaṉu, “Ngurra kutjupangka nyuntu yankula nyinanytjaku. Ngurra palula nyuntupa walytja ngaṉṯitja tjuṯaṯarra nyinamalpa, ngayulu tjananya kanyilku. Ngurra palunya nyurrangarri kanyinmalpa.” Paluru ngurra palumpa ngurrpa nyinangi. Kala, paluru Katutjaku wangka palunya kulira ilta yanu ngurra palulakutu. 9-10 Yankula Katutjalu piyuku nintiṉu ngurra palulakutu tjukarurru yankunytjaku. Ngurra palulawana rawa nyinangi kalikingka yalatji paluru kuliṉangi, “Ngurra ngaawana ngayulu kutu nyinaku Katutjaluṉi panyapa watjaṉutjangka.” Yalatji Yipuramalu Katutjaku wangka kulira walytjarringkula ngurra palulawana kutu nyinangi. Palumpa katja Yatjikanya, palumpa tjamu Tjikupanyaṯarra ngurra palulawana kalikingka nyinangi. Palulanguru Katutjalu palunya kutjarra piyuku watjaṉu ngula ngurra palula palumpa kutjarraku walytja ngaṉṯitja tjuṯa kutu nyinanytjaku. Yalatji Katutjaku wangka kulira Yipuramanya ngurra palulawana kutu nyinangi. Wangka yalatji paluru kuliṉingi, “Ngayulu kalikingka ngurra tjuṯawana nyinapayi, ngula ngayulu Katutjaku ngurra ilkaringka tawunu kutjungka nguwanpa nyinamalpa, ngurra tjuṯawana nyinanytjawiya. Katutjalu ngurra palunya palyaṉu ngayuku kutu ngaranytjaku.”

11 Yipuramaku miiṯa Tjaaranya wulkumanu kata tjulkuratjarra nyinangi, pipirri mantjilwiya. Palulanguru Katutjalu watjaṉu, pipirri yungkukitjangku. Tjaaralu palumpa wangka kulira pipirrilpi mantjiṉu, wulkumanu kata tjulkurangku kutju. 12 Tjiḻpi Yipuramalu mirrirrikitjangku kuliṉu katjatjarrangku. Katja palulanguru walytja ngaṉṯitja tjuṯalpi nyinangu. Paluru tjana tjuṯalingku nyinarra waṉingi, piṉṯirri tjuṯa nguwanpa, mingalingku.

13 Katutjalu watjaṉutja Yipuramalungarri kulira nyinapayi. Yalatji rawangku kuliralpi tjana mirrirringu. Wiya tjana nyangu Yipuramaku walytja ngaṉṯitja tjuṯalingku ngurra Kayinanala nyinarra waṉinyingka, wiya, maṉkurrpa kutjuya tjana nyangu. Yipuramalungarri nyinarra yalatji kulilpayi, “Yilta, Katutjalu watjaṉutjangka nganampa walytja ngaṉṯitja tjuṯalingkulpiya manta ngaangka Kayinanalawana nyinamalpa. Yaṉangu wangka kutjupatjarra tjuṯa ngurra ngaangka kuwarri nyinanyi. Nganaṉa ngunytji ngurra ngaangka kuwarri nyinanyi.” 14 Yalatji paluru tjana ngurra Kayinanala nyinarra kuliṉu ngurra palula rawa nyinakitjangku, ngurra palumpa walytjarringkula nyinakitjangku. 15-16 Wiya tjana watjilarringkula kuliṉu ngurra Tjaltiyalakutu piyuku yankula nyinanytjaku, wiya. Tjinguru tjana watjilarringkula ngurra Tjaltiyalakutu yankula nyinamara. Wiya. Tjana ngurra Kayinanala kutu nyinarra kuliṉingi yalatji, “Ngula nganaṉa ngurra palyangka ilkaringkalpi nyinaku.” Tjana yalatji kulintjala Katutjalu tjanampa nyinarra yunypangku kutjupa tjuṯa watjaṉu, “Ilta ngaa tjuṯa ngayuku walytja nyinanyi.” Paluru tjanampa mayutju tiṉa nyinangu. Ilta paluru tjananya yaṉṯayaṉṯalpayi, ngurra ilkaringka tjananya nyinatjunkukitjangku.

17-18 Yurrunpa Katutjalu Yipuramanya yalatji watjaṉu, “Nyuntupa katja Yatjikakuṉu walytja ngaṉṯitja tjuṯalingkulpi nyinarra waṉimalpa.” Palulanguru Katutjalu Yipuramanya yarrkalkitjangku watjaṉu palumpa katja Yatjikanya katirra kuka tjawirrilyi nguwanpa tjuuḻatjarrangku mirrintankunytjaku. Katutjaku wangka yurruntitja yalatji ngarangi, “Yatjikakuṉu walytja ngaṉṯitja tjuṯalingku nyinaku.” Yipuramalu wangka palunya kulira palumpa katja katingu tjawirrilyi nguwanpa tjuuḻatjarrangku mirrintankunytjaku. 19 Yipuramalu kuliṉingi yalatji, “Ngayuluṉa Yatjikanya tjawirrilyi nguwanpa tjuuḻatjarrangku mirrintankunytjala, Katutjalu palunya kanara nyinatjunku, ngangkari tiṉatjarrangku.” Yalatji Yipuramalu kuliṉu palumpa katja mirringuru piyuku kanarringkula nyinanytjaku. Yipuramalu ilta kuliṉu palumpa katja wakara mirrintankunytjaku. Kala, ilkari ngurrarangku marrkuṉu palunya wakalwiyangku wantinytjaku. Yipurama paluru yunypalingku nyinangu palumpa katja kana kutu nyinanyingka.

20 Katutjaku wangka kulira Yatjikalu tiṉarringkula Katutjanya tjapiṉu palumpa katja kutjarraku, Tjikupaku, Yitjuwukuṯarra. Palumpa kutjarraku paluru tjapiṉu Katutjalu pulanya kutu yaṉṯayaṉṯantjaku. 21 Tjikupaluṯarra tjiḻpirringkula mirrirrikitjangku Katutjaku wangka kulira tjapiṉu Tjutjupaku katja kutjarraku. Palumpa kutjarraku paluru tjapiṉu Katutjalu pulanya kutu yaṉṯayaṉṯantjaku. Paluru tjiḻpirringkula wanatjarrangku ngarala Katutjanya puḻkawaṉipayi. 22 Tjikupaku katja yini Tjutjupanya tjiḻpirringkula mirrirrikitjangku Katutjaku wangka kulira yalatji tjananya palumpa walytja ngaṉṯitja tjuṯangka watjaṉu, “Manta ngaangka Yitjipingkanyurra nyinarra, Yitjurilaku walytja ngaṉṯitja tjuṯa tjungunyurra yanku, ngurra kutjupakutu. Katutjalu nyurrangarrinya nintilku ngurra palulakutu tjukarurru yankunytjaku. Ngula ngurra palulakutu yankukitjangku nyurrangarri ngayunya tarrka katirra ngurra palula tjunutjurra!” Katutjalu tjananya ngula ngurra Kayinanalakutu katinytjaku, Tjutjupalu kuliṉutjangku tarrka katinytjaku tjananya yurrunpa watjaṉu.

23 Muutjaku paapa an maama pipirritjarrarringu. Yini Muutjanyalpipula watjaṉu. Paluru kutjarra kuliṉu, “Ngalimpa pipirri yuṉpa palyalingku ngarrinyi.” Mayutju tiṉangku watjaṉu uḻa wiima tjuṯa mirri pungkunytjaku. Paluru kutjarra kuliṉu, “Katutjanya yilta yaṉṯayaṉṯalpayi.” Yalatjipula kulira pipirri palunya yarrkatjunu, mayutjuku waarrkana tjuṯangku pungkupayingkamarra. Uḻa wiima paluru pira tjirripala yarrka ngarripayi. 24 Muutjanya mayutju tiṉaku yuṉṯalpalawana nyinarra yangupalarringu. Palurulpi kuliṉu Katutjanya mayutju tiṉa nyinanytjala. Yalatji kulira paluru yaṉangu tjuṯa watjaṉu, “Ngayulu wiya mayutju tiṉaku yini Piiruku tjamu nyinanyi, wiya, ngayuku maama Yitjurilaku walytja ngaṉṯitja nyinanyi.” 25 Yitjipinya ngurrara tjuṯawana nyinarra Muutjalulpi tjananya wantikatirra palumpa walytja tjuṯawanalpi nyinangi, Yitjurilaku walytja ngaṉṯitja tjuṯawana. Yalatji Muutjalu kuliṉingi, “Ngayuku walytja tjuṯa Katutjaku walytja nyinanyi. Ngayulu tjanalawana nyinamalpa, wiyaṉa Yitjipiku mayutjuwana nyinaku, paluru anta palumpa walytja tjuṯaṯarra Katutjaku ngurrpa nyinanyi.” 26 Yitjipinya ngurrara yunytjuwiya tjuṯangku Muutjanya panypurangkupayi paluru Kurayitjanya kulira Katutjaku tjukarurru nyinanyingka. Paluru Yitjipinya ngurrara tjuṯawana nyinarra mani tiṉa, yulytja tjuṯaṯarra mantjira palya nyinamara. Kala, paluru mani tiṉa, yulytja tjuṯaṯarra wantirra Katutjaku tjukarurru nyinangu, palumpa walytja tjuṯawana. Paluru yalatji kuliṉingi, “Katutjalu nganaṉanya yaṉṯayaṉṯara kanyilku.”

27 Katutjaku wangka kulira Muutjalu ngurra Yitjipinya wantikatirra kuliṉingi, “Mayutju tiṉa Yitjipinya ngurrara ngayuku yunytjuwiya nyinanyi. Palumpa waarrkana tjuṯangku ngayunya mirri pungkupayingka ngayulu ngurra Yitjipinya wantikatiku. Katutjaluṉi yaṉṯayaṉṯara katiyanku ngurra kutjupakutu. Katutjalu watjaṉu ngayunya yaṉṯayaṉṯalkitjangku.” Wiya paluru Katutjanya kurungku nyakupayi, palumpa wangka kulira kutju ngurra Yitjipinya wantikatingu. 28 Ilkari ngurrara panya mirri pungkupayi kutjungku tjananya Muutjaku walytja tjuṯaku katja yurruntitja tjuṯa, pungkutjipingkamarra, Muutjalu Katutjaku wangka kulira tjananya watjaṉu tjiipikuṉu ngurrka ngurrawana nyapantjaku. Tjana tuuwawana ngurrka nyapalpayi. Yalatji Muutjalu tjananya watjaṉu ilkari ngurrara mirri pungkupayingku ngurrka nyakula ngurra tjanampa wayintanku nyakukatirra, katja yurruntitja pungkuwiyangku wantiku.

29 Yitjurilaku walytja ngaṉṯitja tjuṯangkuya Katutjaku wangka kulira palya yuru Tjatjakawana, ngururrwana yanu. Katutjalu yuru yiwarra nguwanpa palyantjala ngururrwanaya yanu mantawana. Kanya Yitjipinya ngurrara tjuṯangku tjananya pikangku wanaranangi pungkukitjangku. Ngururrpa Katutjalu tjananya turawuntamilara yurungka mirrintanu. Paluru yuru panyapa kiiṯa nguwanpa rayitpayiki patiṉu.

30 Yirriṯi tawunu Tjirikulawana puḻitjanu parriki palyaṉutja, waaḻa tjuṯangka tjayiṯiwana parra ngarala wanaṉingi. Yitjurilaku walytja ngaṉṯitja tjuṯangku puṯu kuliṉu palunya ngurrara tjuṯa tjananya pungkukitjangku. Katutjalu tjananya watjaṉutjangka, paluru tjana kulira parra yanangi parriki tiṉangka tjayiṯiwana, tjiṉṯu tjapanpalangka. Kanya parriki tiṉa paluru punkara yuḻpurringu, palumpa wangka tjana kulira parra yananyingka.

31 Tawunu palula kungka Rayapanya nyinangu. Kungka paluru paṯara nyinapayi, watingku palula kuya palyara mani yungkunytjaku. Kungka palurulpi Katutjaku wangka kulira kanarringu. Yalatji nguwanpa kanarringu. Yitjurilaku walytja ngaṉṯitja tjuṯangku tawunu Tjirikunya ngurrara tjuṯa tjananya Katutjaku yunytjuwiya tjuṯa mirri pungu ngaṉṯi. Yurrunpa Rayapalu pulampa tjukarurru palyaṉu. Yitjurilaku walytja ngaṉṯitja kutjarrapula tawunu palulakutu yarrka yanu nyakukitja. Paluru kutjarra tawunungka tjarrpanyingka Rayapalu pulanya yunypangku yarrkatjunu, kuḻaṯatjarra tjuṯangku pulanya mirri pungkupayingkamarra. Palulanguru ngula Yitjurilaku walytja ngaṉṯitja tjuṯangku, kuḻaṯatjarra tjuṯangku Rayapanya wiya mirri pungu.

32 Katutjaku wangka kulilpayi palunya tjananya nguwanpa kutjupa tjuṯa nyinapayi. Wangka palunya tjuṯatjarra ngayulu nyurrangarrinya nintilkitjangku puṯu kuliṉi, rawangkuṉa piipangka wakalpayingka. Ngaa tjuṯa ngayulu kuliṉi, Kitiyananya, Piirakanya, Tjamtjananya, Tjipitjanya, Tapitanya Tjamiyulanya. Katutjaku wangka watjalpayi kutjupa tjuṯaṯarra. 33 Paluru tjana Katutjaku wangka kulira walytjarringkupayi. Tjaampalangkuya Katutjaku wangka kulira yaṉangu kutjupa tjuṯa tjananya pungkula nguḻutjingara wantirriyaṉu, mayutju tiṉa, palumpa waarrkana tjuṯaṯarra. Tjaampalangkuya Katutjaku wangka kulira yaṉangu tjuṯa tjananya marrkuṉu tjukarurru nyinanytjaku. Tjaampalangku Katutjaku wangka kulira paṯara yutilpi nyangu, Katutjalu yurrunpa watjaṉutjangka. Tjaampalangkuya Katutjaku wangka kulintjala, Katutjalu tjanampa marrkuṉu, layina tjikipaka tjuṯangku tjananya patjaltjipingkamarra. 34 Tjaampalangkuya Katutjaku wangka kulintjala Katutjalu waru tjanampa yangatjunu, kamparra tjananya iluntankupayingkamarra. Kutjupa tjuṯangkuya Katutjaku wangka kulintjala Katutjalu tjanampa marrkuṉu, tjuuḻa waṯawaratjarrangku wakara tjananya iluntankupayingkamarra. Kutjupa tjuṯangkuya nguḻu nyinarra Katutjaku wangka kulintjala, paluru tjananya rapaṉu nguḻuwiyalpi nyinanytjaku. Kuḻaṯatjarra kutjupa tjuṯangku puṯu kuliṉu, kutjupa ngurrara yunytjuwiya tjuṯa tjananya pungkukitjangku. Katutjaku wangka paluru tjana kuliralpi palunya tjananya wakara iluntanu. Kutjupa tjuṯa nguḻu tjalkaḻungu.

35 Minyma tjaampalangkuya Katutjaku wangka kulintjala, Katutjalu tjanampa walytja mirringuru kanaṉu. Kutjupa tjuṯaya nguḻuwiya nyinarra mirrirringu, kutjupa tjuṯangku tjananya panypurangkula mirri pungkunytjala. Paluru tjana Katutjaku wangka kulira mirrirrikitjangku yalatji kuliṉu, “Katutjakula tjukarurru nyinarra mirrirriku. Mirrirringanyingka ngula paluru nganaṉanya kanara nyinatjunku, palumpa ngurrangka.” 36 Katutjaku wangka kulilpayi kutjupa tjuṯa tjananya yunytjuwiya tjuṯangku panypurangkula wiipatjarrangku pungangi. Kutjupa tjuṯa tjananya tjiinangka tayimapira tjiilangka tjarrpatjunkula kanyilpayi. 37 Yunytjuwiya tjuṯangku Katutjaku wangka kulilpayi kutjupa tjuṯa mirrintankukitjangku puḻitjarrangku rungkaṉingi. Kutjupa tjuṯa tjananya tjuuwutjarrangku kilytjuntara wakara mirrintanu. Kutjupa tjuṯa tjananya tjana tjuuḻa waṯawaratjarrangku wakara iluntanangi. Kuunyiya Katutjaku walytja tjuṯa tjanaya mungutja nyinapayi. Mantarrawiyangka tjiipikuṉupaka nanikutakuṉu pangkingkaya tjarrparra nyinangi. Kutjupa tjuṯa mikintjarraya nyinangi kutjupa tjuṯangku tjananya panypurangkula punganyingka. Kutjupa tjuṯa maralpa kutu nyinapayi, kuunyi tjuṯa. 38 Ngurra tjungu nyinanytjawiya ngurra kapiwiyawanaya nyinangi, puḻiwana. Kuḻpingkaṯarra tjana tjarrparra nyinapayi. Paluru tjana Katutjaku wangka kulira nyinapayi, tjukarurruya palumpa nyinangi. Yuwa, paluru tjana Katutjaku, yaṉangu tjuṯakuṯarra palya nyinapayi, manta ngurrara kutjupa tjuṯangku kuya palyara nyinapayi.

39 Paluru tjana Katutjaku wangka kulira nyinanytjala Katutjanya tjanampa yunypa nyinangi. Tjana yalatji kulira nyinarra wiya yuti nyangu Katutjalu watjaṉutjangka, wiya. Yurrunpa tjana mirrirringu. Katutjalu tjanala watjara ngulalpi palyalku tjana kana kutu nyinanytjaku. 40 Katutjalu kuliṉingi paluru tjana nganaṉaṯarra tjungu kana kutu nyinanytjaku palumpa ngurrangka.