1 Paluru tjana Katutjaku wangka kulira tjukarurru nyinapayi tjuṯa nganaṉa kulintjaku. Nganaṉaṯarra Yiitjuku tjukarurru kutu nyinanytjaku, kuya kutu palyantjawiya. Nganaṉa kuya palyantjaku yaṉangu kutjupangku, tjinguru mamungkuṯarra tjingapungkunytjala, nganaṉa kulira wantirra tjukarurru kutu Yiitjuku nyinanytjaku. 2 Yiitjulu nganaṉanya ngulytjura kutu yaṉṯayaṉṯaṉi. Paluru nganaṉanya kutu kanyira ngurra ilkaringka nyinatjunku. Nganaṉa palumpa tjukarurru kutu nyinanytjaku. Paluru irriṯi Katutjaku wangkawana kutu tjukarurru nyinapayi. Watiyangka waralyngarala mirrirrikitjangku kulira wiya paluru munupinarringkula Katutjaku wangka wantingu, wiya. Paluru yalatji kuliṉu, “Palya tjana ngayunya watiyangka waralytjunkula mirrintanku kuya palyalpayi nguwanpa. Ngayulu yaṉangu tjuṯaku kuya waṉirra Katutjalawana tjungu nyinaku.” Paluru kuwarri ilta Katutjalawana nyinanyi, mayutju tiṉa kutjarra.

3 Kuya palyalpayi tjuṯangku Yiitjunya panypurangkula pungkunytjala paluru kutu tjukarurru Katutjaku nyinangi. Yalatji kulira nyurrangarriṯarra Katutjaku tjukarurru kutu nyinanytjaku, munupinarringkula wantinytjawiya. 4 Nyurrangarri Yiitjuku tjukarurru nyinanytjala kuya palyalpayi tjuṯangku nyurrangarrinyaṯarra panypurangkupayi. Tjana wiya nyurrangarrinya mirri pungu. 5 Katutjalu nyurrangarrinya watjaṉu paapangku katja tjuṯa, yuṉṯalpa tjuṯa watjaṉutja nguwanpa. Tjingurunyurra wangka palumpa kulira wantingu. Wangka palunya yalatji ngarrinyi,

7 Katutjalu nyuntunya tjukarurrulkitjangku marrkuntjala nyuntu kulira tjukarurrulpi nyinanytjaku, palumpa ngurrkurrinytjawiya. Paapa tjuṯangkuṯarra pipirri tjuṯa marrkura pungkupayi tjukarurrulpi tjana nyinanytjaku. 8-9 Marrkura pungkunytjala pipirringku kulira tjukarurrulpi nyinapayi. Kutjupaku pipirri nganaṉa wiya marrkura pungkupayi tjukarurru nyinanytjaku, wiya, pipirri walytja kutju marrkulpayi paapangku maamangku. Katutjaluṯarra nganaṉanya palumpa walytja tjuṯa marrkulpayi tjukarurrulpi nyinanytjaku. Tjinguru Katutjalu nyuntunya marrkulwiyangku wantinytjala nyuntu wiya palumpa walytja nyinaku. Palya Katutjalu nganaṉanya tjukarurrulkitjangku marrkuṉi. Nganaṉa palumpa wangka kulira kana kutu nyinaku.

10 Pipirri nganaṉa nyinanyingka, paapa tjuṯangku nganaṉanya tjukarurrulkitjangku marrkura pungkupayi, walytjangku kulira. Paapa Katutjaluṯarra nganaṉanya marrkulpayi tjukarurru nyinanytjaku, Katutjanya nguwanpa tjukarurrulpi nyinanytjaku. 11 Paapangku tjukarurrulkitjangku katja walytja marrkura punganyingka, katja paluru yunypawiya nyinapayi. Marrkura pungkunytjala ngaṉṯi kutju, tjukarurrulpi paluru yunypa nyinapayi. Katutjalu nganaṉanya marrkuntjala kulira nganaṉa palya nyinaku, yunypa. 12-13 Yiitjuku wangka kulira purrkarringkula wantinytjawiya, kutunyurra palumpa tjukarurru nyinanytjaku. Yiitjuku walytja kutjupa tjuṯangku nyurrangarrinya tjukarurru nyinanytjala nyakula tjanaṯarralpi tjukarurru kulira nyinaku.

14 Kutjupa tjuṯaku nyurrangarri kalypa nyinanytjaku. Katutjaku kutju nyurrangarri tjukarurru kutu nyinanytjaku. Tjinguru yaṉangu Katutjaku tjukarurru nyinanytjawiya paluru wiya mayutju Katutjalawana nyinaku. 15 Katutjanya nganampa aḻṯurunytju nyinanyi. Wiyanyurra palumpa wangka kulira ramarringkula wantinytjaku, wiya. Yaṉangu kutjupa wiyawana kutu nyinanytjala nyurrangarri palunya marrkuntjaku tjukarurrulpi paluru nyinanytjaku. Kutu paluru wiyawana nyinanytjala kutjupa tjuṯangku nyakula palunya nguwanpalpi wiyawana kutu nyinaku. 16 Katutjaku wiyawana nyinapayi tjuṯa nyinanyi, yirriṯi nyinapayi wati Yitjuwunya nguwanpa. Paluru kaaka tiṉangku paapakuṉu yulytja ngurraṯarra mantjinmara, paapa tjiḻpi wiyarringanyingka, Katutjaku luwu yalatji ngarangu. Yitjuwulu palumpa maḻanypa mangarritjirratjangku watjaṉu kulintjawiyangku, “Maḻanypa, paapa ngalimpa wiyarringanyingka, nyuntulpi ngalimpa paapakuṉu yulytja ngurraṯarra mantjintjaku. Kala kuwarri mangarriṉi yuwa!, paḻtjatjirratjaṉa.” Yalatji Yitjuwulu watjalwiyangku wantimara. Katutjalu yurrunpa watjaṉu kaakangku kutju paapakuṉu mantjintjaku. Yitjuwulu yalatji Katutjaku wangka kulira wantingutja, wiyanyurra palunya nguwanpa nyinanytjaku. 17 Ngula, paluru paapanya puṯu tjapiṉu yalatji, “Paapa, nyuntu Katutjanya tjapila ngayuku!, paluruṉi kutu yaṉṯayaṉṯantjaku nyuntupa ngurrangkaṉa nyinanytjala, yulytjatjarra.” Paapangku watjaṉu, “Kala, ngayulu Katutjanya tjapiṉu nyuntupa maḻanypa yaṉṯayaṉṯara kanyintjaku paluru ngayuku ngurrangka nyinanytjala. Yalatji katja kutjarraku tjapintjaku luwu nganampa wiya ngaranyi. Puṯuṉa kuliṉi Katutjanya piyuku nyuntupa tjapintjaku.” Yitjuwunya puṯu kulira yulangu.

18-19 Irriṯi Yitjurilaku walytja ngaṉṯitja tjuṯa Katutjaku ngurrakutu yankula yila nyinangi puḻi yini Tjaniyala. Ngurra palula munga ngarala waru tiṉa kampapayi, waḻpa tiṉaṯarra wangkanyingka. Turampataṯarra kutjupangku wangkatjingalpayi. Ilkaringuru raapa wangkanytjala yaṉangu paluru tjana nguḻurringkula Muutjanya marrkuṉingi yalatji, “Nyuntu kutju nganampatju Katutjanya tjapila!, nganaṉatju puntura nguḻurringanyingka. Paluru nyuntunya kutju kuliṉi. Nyuntu palumpa wangka kulira nganaṉanyatju tjakultjunkunytjaku.” Yalatji nguwanpa wiya nyurrangarri Katutjaku nguḻurringkunytjaku. 20 Paluru tjana nguḻurringu Katutjalu yalatji watjaṉutjangka, “Puḻingka nyurrangarri rungkara mirrintankunytjaku, puluka, tjinguru papa yaṉanguṯarra puḻi Tjaniyala kaḻpanyingka.” 21 Muutjaluṯarra puḻi palula nguḻurringkula yaṉangu tjuṯangka tjakultjunu yalatji, “Ngayuluṯarra nguḻu tititingaranyi.”

22 Yalatji nguwanpa palya nyurrangarri wiya Katutjaku nguḻurringkunytjaku, nyurrangarri palumpa walytja tjuṯa nyinanyi. Palya nyurrangarri Katutjaku ngurrangka nyinaku, puḻi yini Tjaniyala, Tjarutjaluma kutjupangka, ilkaringka. Ngurra palula ilkari ngurrara tjuṯalingku nyinanyi, minga, Katutjanyaya puḻkawaṉinyi. 23 Tjungu nyurrangarri Yiitjuku walytja kutjupa tjuṯawana nyinaku, Katutjalu yini piipangka tjunutja tjuṯawana. Palumpa walytja kurrunpa kutjupa tjuṯaṯarra palula nyinaku mantangka Katutjaku palya nyinapayi tjuṯa. Ngurra palula tjana tjukarurru kutu nyinaku. Ngurra palula yilta Katutjanya nyinaku, paluru yaṉangu tjuṯa kuutawutjungka watjalku. 24 Yiitjunyaṯarra ngurra palula nyinaku. Katutjalu yaṉangu tjuṯa wangka Kurayitjanyatjarra watjaṉutja Yiitjulu nganaṉanya tjakultjunkupayi. Paluru ngurrka yintirra tjawirrilyi nguwanpa mirrirringu kuya nganampa waṉikitja. Kanya Yipulanya ngurrka yintingu palumpa kaakangku mulyarrangku pungutjangka. Yiitjunyaṯarra nganampa kuya waṉikitja ngurrka yintingu.

25 Irriṯi Yitjurilaku walytja ngaṉṯitja tjuṯa Katutjalu puḻi Tjaniyala watjantjala tjana kulira wantipayi tjukarurru palyantjawiyangku. Yalatji tjana kulira wantingutjangka Katutjalu tjananya aapa mirri pungu. Katutjalu ilkaringuru nyurrangarrinya watjaṉingka kuliranyurra tjukarurru palyantjaku. Paluru nyurrangarrinya nintintjala kuliranyurra tjukarurrulpi nyinanytjaku. Tjingurunyurra kulira wantinytjala Katutjalu nyurrangarrinyaṯarra pungkuku, ngula warukutu nyurrangarrinya wantirriyalku. 26 Puḻi Tjaniyala Katutjanya wangkanyingka manta puntura pirrtjingu. Manta yalatji puntura pirrtjitjingara paluru watjaṉu, “Ngayulu ngula piyuku manta, ilkariṯarra pirrtjitjingalku.” 27 Piyukukunyu paluru manta pirrtjitjingalku. Wangka panyapa Katutjalu watjaṉu manta ilkariṯarra piyuku pirrtjitjingara wiyalkitjangku. Katutjaku ngurra palya ngaraku pirrtjiwiya, wiyarringkunytjawiya. 28 Nganaṉa yunypa nyinanytjaku yalatji kulira. Katutjalu nganaṉanya kutu yaṉṯayaṉṯanmalpa ngurra ngaangka, ngurra ilkaringkaṯarra. Nganaṉa tjukarurru nyinarra palunya kutu puḻkawaṉinytjaku. Yalatji nganaṉa palunya puḻkawaṉinytjala paluru yunypa nganampa nyinaku. 29 Nganaṉa kutu Katutjaku tjukarurru nyinanytjaku, paluru nganaṉanya warukutu wantirriyalpayingka. Waru palunya nguwanpakunyu puḻi Tjaniyala kampapayi.