1 Palulanguru mayutju Yiitjulu tjananya ngurrtjara ngaratjunu walytja tjapantiyi tuupala, yankula tjakultjurinkula palyarinkunytjaku. Tawunu tjuṯakutu tjananya wantirriyaṉu kutjarra kutjarra, yankula nintirinkunytjaku, tawunu palula tjuṯangka, ngaṉṯiwanangku palurulpi nintirinkukitjangku. 2 Paluru tjananya watjaṉu, iyalkitjangku, “Yaṉangu tjuṯalingkuya nyinarra waṉinyi, ngayuku wangka kulilkitja, wiita tjuṯalingku mangarritjarra ngarala waṉinytja nguwanpaya. Maṉkurrpa nguwanpanyurra ngayuku wangka nintilpayi tjuṯa nyinanyi, yaṉangu tjuṯalingku nintilkitja. Puṯu nyurrangarri tjananya yankula nintilku, tjuṯalingkungka. Yalatji nguwanpanyurra nyinanyi, wiita muṯulpayi maṉkurrpa nguwanpa. Puṯuya muṯulku wiita mangarritjarra, tjuṯalingkungka. Palulanguru Katutjanyaya tjapila!, paluru ngayuku wangka nintilpayi kutjupa tjuṯa wantirriyantjaku yaṉangu tjuṯakutu, wiita muṯulpayi maṉkurrpa palunya nguwanpa. Tjana kaanaku mayutju tjapintjaku, wiita muṯulpayi tjuṯa kutjupa wantirriyantjaku muṯurinkunytjaku. 3 Yankulanyurra yalatji kulinma! Ngayulu nyurrangarrinya tjami tjuṯa wantirriyaṉi, nintintjaku. Yaṉangu tjaampalangku nyurranya kulira pikarringkula pungkutjipingkamarra, yankulaya purinypa tjanala nyinama! Tjiipi nguwanpaṉa nyurranya wantirriyaṉi, yinura tjuṯakutu nguwanpa. Katutjalu nyurranya purinytju katiyanamalpa, yaṉangu tjikipaka tjuṯangkamarra. 4 Payiki manitjarra wiyanyurra katiyankunytjaku, puuta kutjupaṯarra, payiki mangarritjarra katiyankunytjawiya. Kutjarra kutjarra nyurrangarri yankunytjaku. Ruutuwana nyupali yankula wati kutjupa ngalya yankula tjungurringanyingka, wiya nyupali kuutayi watjara kutu ngarala wangkanytjaku. Parrpaṯu nyupali yankunytjaku ngayuku waarrka palyalkitja. 5 Tawunungka nyupali tjarrparra waaḻakutu yankula tjapilapula nyinakitjangku! Tjinguru nyupalinya tjana watjalku, ‘Waaḻa ngaangkapula tjarrparra nyinama!’ Waaḻangka tjarrparrapula yalatji watjala!, ‘Katutjalu nyurrangarrinya yaṉṯayaṉṯalku yunypanyurra nyinanytjaku.’ 6 Waaḻa palunya ngurrara tjuṯangku ngayuku wangkaku yunyparringanyingka, yilta Katutjalu tjananya yaṉṯayaṉṯalku. Ngayuku wangkakuya yunyparrinytjawiyangka, Katutjalu wiya tjananya yaṉṯayaṉṯalku. 7-8 Tawunungka tjarrparra nyupali waaḻa kutjungka nyinanytjaku, waaḻa kutjupa kutjupangka wiya. Waaḻa kutju palula nyinarra, nyupali ngalkura tjikintjaku, waaḻa ngurrarangku marangku yunganyingka. Wiya tjananya yalatji watjala!, ‘Mangarri ngaakuṉa wiya yunytjurringanyi, mangarri kutjupaṉi yuwa!’ Wangka kutjupawana wiya nyupali yalatji kulintjaku, ‘Kutulinyaya mangarri, kuka yunganyi. Tjinguru ngali ngaparrtjingku mani tjananya yungkunytjaku.’ Yalatji wiyapulan kulintjaku, palya waaḻa ngurrara kutjungkuntapulanya paḻtjantjaku, nyupali Katutjaku waarrka palyalpayi kutjarra. Ngurra kutjupa kutjupangka nyupali yankula ngalkunytjawiya.

9 “Tawunu palula tjananya nyupali miiṉṯa tjuṯa palyara nintila tjananya alatji!, ‘Katutjalu nyurrangarrinya kuwarri ngulytjura yaṉṯayaṉṯalku.’

10 “Tawunu kutjupakutupulan yankula tjarrpanyingka, tjinguru palunya ngurrara tjuṯangku nyupalinya kulilwiyangku wantiku. Tawunu palula nyupali ngururrpa, yiwarrangka ngarala puutapula yarrala!, manta kiliinamilalkitjangku. Yalatjilpipulan tjanala watjala! 11 ‘Ngalitju puuta yarrara manta kiliinamilaṉi, piyuku ngalitju puutangka tjarrparra nyurrangarrinya wantirra yankukitjangku, tawunu kutjupakutu. Katutjalu nyurranya ngulytjura yaṉṯayaṉṯanmara. Wiya. Wantingu nyurranya, Katutjanyanyurra wantingutjangka.’ ” Yiitjulu tjananya piyuku watjaṉu, iyalkitjangku, 12 “Tawunu palunya ngurrara tjuṯangku nyupalinya kulilwiyangku wantingutjangka, Katutjalu tjananya ngula kuutawutjungka puntura kuru watjalku. Yirriṯi kuya palyalpayi kutjupa tjuṯa nyinangi. Palunya tjananya ngatalpa kuru watjalku. Paluru tjana yirriṯi ngurra Tjutumala kuya palyalpayi, ngayuku wangkakuya ngurrpa nyinarra wiyarringu. Yuwa, Tjutumanya ngurrara tjuṯa tjananya Katutjalu ngatalpa kuru watjalku, kanya tawunu palunya ngurrara tjuṯa tjananya puntura kuru watjalku, warukutu waṉikitjangku.”

13 “Katutjalu tjananya ngula payira iyalku Kuratjinanya anta Piitjatanya ngurrara tjuṯa ngayuku wangkaya kulira wantipayi tjuṯa. Ngayuluṉa Kuratjinanya anta Piitjatanya ngurrara miiṉṯa tjuṯa palyalpayi. Tjana ngayuku wangka kulinmara, ngayuku walytja tjuṯaya nyinamara. Yaṉangu tjuṯangkuya watjalpayi, Taayanya anta Tjayitananya ngurrara tjuṯa kuya nyinanyi, Katutjakuya ngurrpa nyinanyi. Wiya tjanala kutjupa tjuṯangku Katutjaku wangka tjakultjurinkupayi, wiya. Ngayuluṯarra Yiitjulu tjanala wiya yankula nyinarra nintilpayi, Tjuwuwiyaya nyinanyi. Tjinguru ngayulu tjanalakutu yankula tjakultjurinamara. Ngayulu tjanala tjakultjunkunytjala paluru tjana ngayuku wangka kulira ngayuku walytja tjuṯa nyinamara. Tjuṉpangkuyanku nyapara nyinamara yuṉpa, mara kutjarra, tjuntawana. Mantarra walytja yarrara tjana wati tjuṯa tjuutjatjarra nyinamara, kanya kungka tjuṯa kaatatjarra nyinamara. Yalatji nyinapayi tjuṯa yaṉangu tjuṯangku nyakula yalatji kulinmara, ‘Yilta pala tjuṯangku kuya palyalpayingku wantirra Katutjaku tjukarurrulpiya nyinanyi.’ 14 Ngula Kuratjinanya anta Piitjatanya ngurrara tjuṯa tjananya Katutjalu kuutawutjungka puntura tjananya kuru watjalku ngayuku wangkaya kulira wantingutjangka. Taayanya anta Tjayitananya ngurrara tjuṯa ngayuku wangkaku ngurrpa nyinanyingka, Katutjalu tjananya ngula wiya puntura kuru watjalku. 15 Kapaniyamanya ngurrara tjuṯangkuṯarraya kuliṉiya, ‘Nganaṉa yaṉangu palya tjuṯa nyinanyi, kutjupa ngurrara tjuṯaya mungutja.’ Kapaniyamanya ngurrara tjuṯangku ngayuku wangka kulira wantipayi. Katutjalu tjananya ngula payira iyalku ngurra kuyakutu.”

16 Palumpa walytja tjuṯangka tjananya Yiitjulu piyuku watjaṉu, iyalkitjangku yalatjingku, “Nyurrangarrimpa wangka yaṉangu kutjupangku kulira yunyparriku, ngayuku wangkaṯarra paluru kulira yunyparriku. Nyurrangarrimpa wangka yaṉangu kutjupangku kulira wantiku, ngayuku wangkaṯarra paluru kulira wantiku. Ngayuku wangka yaṉangu kutjupangku kulira wantiku, Katutjaku wangkaṯarra paluru kulira wantiku. Katutjaluṉi ngalya wantirriyaṉu, palumpa wangkatjarra.” Yiitjuku walytja tjapantiyi tuupalaya yankula ngurra tjuṯawana tjakultjurinangi.

17 Palulanguruya palumpa walytja tjuṯa maḻaku yankula yunyparringkula watjaṉu Yiitjula, “Mayutju. Nganaṉatju palya yaṉangu tjuṯa palyarinangi, mamu tjuṯaṯarra nganaṉatju payira wantirriyinangi, nyuntupaṉu paawu tiṉatjarrangku.” 18 Yiitjulu tjananya watjaṉu, “Nyanguṉa mamu tjuṯaku mayutju katunguru payira wantirriyaṉutja, paarrtji nguwanpa ilkaringuru punkaṉingka. Mayutju tiṉalpi wiya nyinanyi. 19 Ngayukuṉu paawutjarranyurra nguḻuwiya nyinamalpa, mamuku mayutjungku nyurrangarrinya tjingapungkutjipingkamarra. Palyanyurra palumpa waarrkana mamu tjuṯa payira iyalku. Tjinguru paluru nyurrangarrilakutu piḻkaṯipaka wanatjiṯi wantirriyalku, ngayukuṉu paawutjarrangkunyurra piḻkaṯipaka wanatjiṯi kantuntjala, wiya nyurranya patjalku. Wiya kutjupangku nyurranya mirri pungku, Katutjalu ngangkari tiṉatjarrangku yangakanyiṉingka. 20 Panyapaṉinyurra watjaṉu mamu yilta tjalkaḻungkupayi, nyurrangarrinyurra payira wantirriyantjala. Yalatjiku wiyanyurra yunyparrinytjaku. Katutjanya nyurrangarrimpa yunyparringanyingka yalatjinyurra yunyparringkula nyinanytjaku. Paluru nyurrangarrinya yini tjuṯa palumpa piipangka tjunutjangka, yalatjikunyurra yunypa nyinanytjaku.”

21 Palumpa walytja tjuṯangku maḻaku yankula tjakultjunanyingka, Yiitjunya yunyparringu. Yiitjulu Katutjanya waḻkuṉu, “Paapa, nyuntu mayutju tiṉa nyinanyi manta ngurrara tjuṯaku, ilkari ngurrara tjuṯakuṯarra. Yaṉangu tjuṯangku ngayuku walytja tjuṯa panypurangkupayi, ‘Wiyanyurra kuula tiṉangka nyinarra nintirringkupayi, ngurrpanyurra nyinanyi.’ Paapa ngayuluṉanta waḻkuṉi, nyuntu tjananya nintilpayi ngayuku wangka palya. Wangka palumpa yaṉangu kutjupa tjuṯa, kuula tiṉa ngurrara tjuṯaṯarra ngurrpa nyinanyi. Paapa, nyuntu kuulaku ngurrpa tjuṯa tjananya yunypangku nintilpayi.” 22 Yiitjulu tjanala piyuku watjaṉu palumpa walytja tjuṯangka, “Ngayuku paapakuṉu wangkaṉa nintilpayi, paapangku yurrunpa watjaṉutjangka. Yaṉangu tjuṯanyurra ngayuku Katutjaku katjaku ngurrpa nguwanpa nyinanyi. Ngayuku paapa walytja kutju ngayuku ninti nyinanyi, walytjararra ngalitju nyinanyi. Yaṉangu tjuṯanyurra paapa Katutjaku ngurrpa nguwanpa nyinanyi, ngayulu walytja kutjuṉara ninti nyinanyi. Ngayulu kuliṉi yaṉangu kutjupa tjuṯa nintilkitjangku, tjana paapa Katutjaku walytjalpi nyinanytjaku, ngayunya nguwanpa.”

23 Yaṉangu kutjupa tjuṯa yanutjangka, Yiitjulu palumpa walytja tjuṯangka kutju watjaṉu, “Kurayitjaluṉa nyurrangarrinya ngalya yankula nintilpayi. Nyakulaṉinyurra kulira yunypa nyinanyi, wiya kutjupa tjuṯa ngayuku ninti puntu nyinanyi. 24 Yirriṯi nyinanytja tjuṯaya yunytjurringu Kurayitjanyaṉiya nyakula kulilkitja, Katutjaku wangka nintilpayi tjuṯa, yaṉanguku mayutju tiṉa tjuṯaṯarraya. Puṯuya yunytjurrirra nyinangi, Kurayitjanyaṉiya nyakula yunyparrikitja.”

25 Muutjaku luwu kulilpayingku nyinarra kuliṉingi, “Yiitjunya ngayulu tjapilku, Muutjaku luwuku, kulilkitjangku.” Paluru pakara Yiitjula tjapiṉu, “Nintilpayi. Kana kutu nyinakitjangku nyaa nguwanpaṉa nyinaku?” 26 Yiitjunyara wangkangu, “Muutjaku wangka nyuntu riitarringkula kuliṉi. Muutjalu nyaa watjaṉu?, yaṉangu kana kutu nyinanytjaku.” 27 Paluru Yiitjula watjaṉu, “Katutjaku wangka yalatji ngaranyi, ‘Mayutjulampa Katutjanya kutju nyinanyi. Palumpa kutju nganaṉa kulira tjukarurru nyinanytjaku. Pinangkula yurrukulira tjukarurru kutu nyinanytjaku.’ Luwu kutjupa ngaranyi yalatji, ‘Walytja ilatja tjuṯaku nganaṉa yunytju nyinanyi. Palunya nguwanpa nganaṉa yaṉangu kutjupa tjuṯakuṯarra yunytju nyinanytjaku.’ ” 28 Yiitjulu watjaṉu, “Nyuntu tjukarurru watjaṉu. Wangka palulawana nyuntu tjukarurru nyinarra kana kutulpi nyinamalpa.”

29 Yiitjulu yalatji watjaltjipingka, “Nyuntu wiya yaṉangu kutjupa tjuṯaku yunytju nyinanyi.” Wati paluru alatji kulira piyuku tjapiṉu Yiitjunya, “Yaṉangu nyaa nguwanpaku ngayulu yunytju nyinanytjaku?” 30 Yiitjulu yara watjaṉu nintilkitjangku, “Wati kutju Tjarutjalumalanguru ruutuwana yanku tawunu Tjirikulakutu. Ngururrpa yananyingkaya tjaṉpa tjuṯangku kumpira paṯara pungku, mani yulytja tjulyalkitjangku. Pungkulaya mantarra yarrara wantiku. Paluru mirrirrikitja nikiti ngarrimalpa.”

31 “Ruutu palulawana ngalya yankula tuḻkuku mayutjungku nyaku ngarrinyingka. Wantikatirra yanku tjayiṯiwana. 32 Palulanguru wati kutjupa ruutu palulawana yanku, tjaatji tiṉangka Tjarutjalumala waarrkarripayi. Pungkula wantingutja nyakula tjayiṯiwana yanku.”

33 “Palulanguru Tjuwuwiya kutjupa Tjamiriyanya ngurrara tuungkiyitjarra ruutuwana yanku. Pungkula wantingutja nyakula yaḻṯururrirra yaṉṯayaṉṯalku. 34 Pikatjarra palunya pika yaḻangka mirritjina yintira pantitjimilalku. Tjamiriyanya ngurrara paluru tuungkiyingka palumpaṉungka kaḻpatjunkula katiku, waaḻakutu. Waaḻangka ngarritjunkula yaṉṯayaṉṯara tjiṉṯurriku. 35 Yankukitjangku waaḻa ngurrarakura mani yungkula watjalku, ‘Miiṉṯa ngaatjanya yaṉṯayaṉṯanma!, mani ngaatjarrangku. Tjinguru mani ngaatjanya ngatalpa ngarriku. Palulanguruṉanta mani kutjupa yungku, ngula ngalya yankula.’ ”

36 Yara watjara Yiitjulu tjapiṉu, Muutjaku luwu kulilpayi palula, “Wati tjirripalaya ruutuwana yanangi. Ngananyara yunytju nyinangu wati panyapaku, pungkula wantingutjaku?” 37 Yiitjula paluru watjaṉu, “Wati yaḻṯurunytju palunya.” Yiitjulu watjaṉu, “Yuwa, yankula palunya nguwanpa nyinama!”

38-39 Palulanguru Yiitjunya, palumpa kutunguḻu tjuṯa yankula tawunungkaya tjarrpangu. Tawunu palula kungka kutjarra nyinangi, kangkururarrapula yini Maatjanya an Miirinya. Miirinya maḻanypara. Maatjalu Yiitjunya nyakula watjaṉu, “Nyuntu tjarrparra ngalkula mangarri!” Palulanguru Yiitjunya palumpa waaḻangka tjarrparra nyinangi. Maatjalu mangarri kukaṯarra kutjaṉingka, Miirinya Yiitjula yila nyinangi, palumpa wangka kulilkitja. 40 Maatjalu mangarri kuka kutjara kuliṉu, “Miirilu ngalya yankula ngayunya aalpamilantjaku.” Palulanguru Yiitjulakutu yankula watjaṉu, “Mayutju. Nyuntu kulira Miirinya watjanmara, ngayunya aalpamilantjaku. Tjungungkulitju mangarri kuka kutjantjaku, ngayulu kutjuṉa waarrka tiṉa palyaṉingka. Ngaatjanya watjala!” 41 Mayutju Yiitjulu yaḻṯururrirra watjaṉu, “Maatja. Nyuntu wiya puntura kulintjaku, mangarri kuka tjunkukitjangku. 42 Ngayuku wangka nyuntu palya nyinarra kulintjaku, maṯupurra. Miirilu palya nyinarra kuliṉingi.”