1 Maatjaku ngurrangka nyinarra Yiitjunyangarriya ngurra kutjupakutu yanu. Palumpa kutunguḻu tjuṯaya nyinanyingka, Yiitjunya Katutjala wangkarra wiyarringu. Palulanguru palumpa kutunguḻu kutjungku Yiitjula watjaṉu, “Mayutju. Tjaanalu tjananya palumpa walytja tjuṯa nintilpayi, Katutjala wangkanytjaku. Palunya nguwanpa nyuntu nganaṉanyatju nintila!, Katutjalalatju wangkanytjaku.” 2 Paluru tjananya nintiṉu, “Katutjala wangkakitjangku alatjiya wangka!

5-6 Yiitjulu piyuku tjananya watjaṉu, “Ngayulu nyurrangarrinya yara watjaṉi. Tjinguru walytja kutjupa yanngatja nyuntupa waaḻakutu munga ngururrkutu ngalya yankula nyinaku. Mangarriku puṯu kulira nyuntu walytja kutjupaku waaḻakutu yankula yurilpangka ngarala yalatji inkaku, ‘Yuwaṉi puriiti maṉkurrpa!, ngayuku walytja kutjupa yanngatja ngalya tjarrparra nyinanyi. Puṯuṉa kuliṉi paḻtjalkitjangku, mangarriwiyaṉa.’ 7 Palurunta watjalku ‘Kanantjaku wiya, wantilanyatju!, pipirriṯarra yanku ngarrinytjala. Alytjuraṉa laakamilara wantingu. Wiyaṉanta pakara yungku.’ 8 Paluru wiyanta pakara yungku, walytjanta nyakula wantiku, aaḻiku. Nyuntu kutu yinkanyinka, paluru pakaranta yungku mangarri, kuka, yulytjaṯarra. 9-10 Yara palunya nguwanpa, Katutjanya nyurrangarri kutu tjapira nyinanytjaku. Paluru nyurrangarrinya yungkuku, kutu Katutjanyanyurra tjapintjala, mantjilkitjangku. Yilta yaṉangungku tjapintjala Katutjalu yungku.”

11 “Tjinguru nyuntupa katjangkunta kuka piitjiku yinkanytjala, wiyaran paapangku piḻkaṯi kana patjalpayi yungkuku, wiya, nyunturan kuka piitji yungkuku. 12 Tjinguru katja palurunta kuwaṯaku yinkanytjala wiyaran wanatjiṯi patjalpayi yungkuku, wiya, nyunturan kuwaṯa yungkuku. 13 Nyurrangarri ilta kuya palyalpayi Katutjanya tjukarurru nyinanytja nguwanpa wiya. Kuya palyalpayi tjuṯangkunyurra tjukarurru yunganyi, katja anta yuṉṯalpa tjuṯanya, tjanantaya tjapintjala, kanya paapa Katutjalu nyurrangarrinya tjukarurru tjarrpatjunanyi palumpa kurrunpa, nyurrangarri tjapintjala. Yaṉangungku palumpa kurrunpaku tjapintjala Katutjalu tjarrpatjunanyi.”

14 Palulanguru wati mamutjarra nyinangi, wangkawiya. Yiitjulu mamu palunya payira wantirriyaṉu wati palula. Wati palurulpi palya nyinangi wangkatjarralpi. Palulanguruya yaṉangu tjuṯa yunyparringu, “Ngaatjakunyu ngangkari tiṉa.” 15 Tjaampalangkuya kulira watjaṉu, “Mamuku mayutjukuṉu ngangkaritjarrangku Yiitjulu mamu payira wantirriyaṉi.” 16 Tjaampalangkuya kuliṉingi, “Tjinguru Yiitjunya Katutjakuṉu, tjinguru mamukuṉu.” Paluru tjana Yiitjunya watjaṉu, “Ngangkaritjarrangku nyuntu kutjupa kutjupa palyala!, nganaṉatju nyakunytjaku. Nyakulalatju tjinguru kulilku nyuntu Katutjakuṉu, tjinguru wiya.” 17-18 Paluru tjanaya yalatji kuliṉingitjangka Yiitjunya tjanampa ninti nyinangi. Ninti nyinarra tjananya yara yalatji watjaṉu, “Yaṉangu walytja tjuṯangkuyanku rawangku pungkula mirrintara yuwankarraya wiyarriku. Tjinguru kalypaya nyinarra kana kutu nyinaku. Yara palunya nguwanpa, kaakararrangkuyanku rawangku pungkula mirrintara yuwankarraya wiyarriku. Kalypaya nyinarra kana kutuya nyinaku. Yara palunya kutjarra nguwanpa walytja tjuṯangkuyanku pungkula mirrintankunytja nguwanpa, tjinguru mamu tjuṯangkuyanku pungkula mirrintanku, mamuku mayutju, mamu tjuṯaṯarra yuwankarra wiyarriku. Nyaaku nyurrangarri ngayunya wiyawanangku watjaṉu?, ngayulu mamu payira wantirriyaṉi, mamukuṉu ngangkaritjarrangku. Yalatji wiya. Mamukuṉu ngangkaritjarrangku wiya mamu walytjanya payira wanara wantirriyaṉi. Ngayulu wiya mamukuṉu ngangkaritjarra nyinanyi, wiya, Katutjakuṉu ngangkaritjarra ngayulu nyinanyi. 19 Nyurrangarrimpa walytja tjuṯangkuya mamu payira wantirriyalpayi. Paluru tjana kuliṉi, ‘Nganaṉa Katutjakuṉu ngangkaritjarrangku mamu payira iyaṉi.’ Palunya tjananya nguwanpa ngayulu mamu payira iyaṉi Katutjakuṉu ngangkaritjarrangku. Paluru tjana tjukarurru kuliṉi Katutjakuṉu ngangkaritjarrangku nganaṉatju mamu payira iyaṉi. Wiyawanangku nyurrangarri kuliṉi.” 20 Yiitjulu tjananya piyuku watjaṉu, “Ngayulu Katutjakuṉu ngangkaritjarrangku mamu payira wantirriyaṉingka nyurrangarri nyakula yalatji kulinmara, ‘Yilta, kuwarrilpi Katutjalu yaṉangu tjuṯa ngulytjura yaṉṯayaṉṯaṉi.’ ”

Yiitjulu tjananya yara piyuku watjaṉu, 21 “Wati tjalatangku palya kanyinmalpa palumpa yulytja, tjuulytjingku, wati kutjupangku ngalya yankula mantjira katitjipingka mulyaṯangku. 22 Wati tjalata palunya, wati kutjupangku manpaṯa tiṉangku pungkula palumpa yulytja tjilirra tjuṯaṯarra katiku.”

23 Yiitjulu tjananya piyuku watjaṉu, “Tjinguru yaṉangungku yalatji ngayunya panypurangkuku, ‘Yiitjunya mamuku walytja nyinanyi.’ Panypurangkupayi palunya wiya paluru ngayuku walytja nyinanyi, wiya. Tjinguru yaṉangu kutjupa wiya yunytjurringanyi ngayuku waarrka palyalkitja, yaṉangu tjuṯa Katutjaku walytja nyinanytjaku wiya paluru yunytjurringanyi. Yaṉangu paluru yaṉangu tjuṯa kulilwiyangku wantinyi, tjana mamuku walytja tjuṯa kutu nyinanytjaku.”

24 Yiitjulu tjananya yara piyuku watjaṉu, nintilkitjangku, “Mamu yalatji nyinanyi. Mamu paluru yaṉangungka tjungu nyinarra wantikatirra ngurra kutjupawana yulytjayinamalpa, wati kurrunpa kutjupangka nyinakitja. Yaṉangu kutjupaku puṯu ngurririnkula kulilku, ‘Yaṉangu walytjakutuṉa maḻaku yankuku, palumpaṉu kurrunpa walytjangka nyinakitja.’ 25 Yankula mamu paluru yaṉangu palunya nyakuku kurrunpa walytjatjarra palya nyinanyingka, Katutjaku kurrunpatjarra wiya. 26 Mamu paluru, mamu kuya tjapanpala yaḻṯirra tjananya katiku yaṉangu palulakutu, kuyaraya tjarrparra nyinanytjaku. Yaṉangu paluru yurrunpa mamu kutjutjarra nyinangu, palunyatjanu mamu tjuṯatjarralpi nyinaku, kuyalingkulpi, miiṉṯa.”

27 Wangka panyapa Yiitjunya wangkanyingka, minymangku watjaṉu, Yiitjunya waḻkuntjaku, “Nyuntu wati palya nyinanyi. Nyuntupa maama nyuntupanku yunypa nyinanyi, pipirrinta kanyira puntuṉutja.” 28 Kulira Yiitjulu watjaṉu, “Yuwa, ngayuku maama yunypa nyinanyi, kutjupa tjuṯaṯarra yunypalingku nyinanyi Katutjaku wangka kulira tjukarurru nyinarra. Yilta paluru tjana yunypalingku nyinanyi.”

29 Yaṉangu tjuṯa kutjupaya Yiitjulakutu yankula tjungurringanyingka, paluru tjananya watjaṉu yalatji, “Kutuṉinyurra tjapilpayi ngangkaritjarrangku kutjupa kutjupa palyantjaku, nyakulaṉinyurra Katutjakuṉu kulilkitjangku. Yaṉangu tjuṯanyurra kuya nyinanyi Katutjanya kulintjawiya. Ngayulu wiya nyurrangarrimpa ngangkaritjarrangku kutjupa kutjupa palyalku. Yalatji kutju ngayulu nyurrangarrinya watjalku yara Tjawunanyatjarra. 30 Yirriṯi Tjawunanya piitji tiṉangku kuuḻtjunkula kanyiṉu munga kutjarra. Tjiṉṯu kutjupangka piitji paluru yulkapatjunulpi kana kutu. Panyapa kulira tawunu Ninapanya ngurrara tjuṯangkuya kuliṉu, ‘Yilta, Katutjalu Tjawunanya kanaṉu.’ Palunya nguwanpa ngayulu, yaṉanguku katja, munga kutjarra mirri ngarrirra kanarrinytja nyakula nyurrangarri kulilku, ‘Yilta, Katutjalu palunya kanaṉu.’ 31 Kulilaya!, yara Tjiipanya ngurraratjarraṯarra. Minyma mayutju tiṉa, manta Tjiipalanguru waṉma yanu mayutju Tjalamunalakutu Katutjaku wangka kulilkitja. Mayutju Tjalamunanya ninti puntu nyinangi, kanya ngayulu mayutju Tjalamunangka wirriḻi nyinanyi, ngayulu Katutjakuṉu wangka tjakultjunkupayi. Wangka palunyanyurra kulira wantipayi. Katutjalu ngula yaṉangu yuwankarra kuutamilalku. Ngurra palula minyma paluru Tjiipanya ngurrarangku kuru watjalku nyurrangarrinya, Katutjaku wangka kulira wantipayi tjuṯa. 32 Tjawuna paluru tjananya Katutjaku wangka Ninapanya ngurrara tjuṯangka nintiṉingi, palulanguru tjana kuya palyantjawiyalpiya tjukarurru nyinangi. Kanya ngayulu Tjawunala wirriḻi nyinanyi. Ngayulu Katutjakuṉu wangka nyurrangarrinya nintintjala, kuliranyurra wantipayi. Palulanguru Katutjalu yaṉangu yuwankarra ngula kuutamilalku. Ngurra palula Ninapanya ngurrara tjuṯangku nyurrangarrinya kuru watjalku, ngayuku wangka kulira wantingutjangka.”

33 Yara kutjupa tjananya Yiitjulu watjaṉu nintilkitjangku, “Laampa tilira, wiya ngaṯi tjawara tjarrpatjunanyi, turaamangkaṯarra wiya tjarrpatjunanyi. Tilitjarra palunya yuti waralytjunanyi, yaṉangu waaḻangka tjarrparra nyakunytjaku. 34 Tilingka kurungkunyurra yuti palya nyanganyi, Katutjaku wangka kulilpayi tjuṯangku, kanya tjanaya pampa tjuṯangku wiya yuti nyanganyi, Katutjaku wangka kulira wantipayi tjuṯangku. 35 Yaṉangu tilitjarra Katutjaku wangka kulira ninti nyinanyi, kanya yaṉangu tilitjarrawiyangku Katutjaku wangka kulira wantinyi. Yaṉangu tilitjarranyurra nyinanytjaku. 36 Tjingurunyurra tilitjarra ngayuku tjukarurru nyinanytjala yaṉangu kutjupa tjuṯangku nyurrangarrinya tilitjarra nguwanpa nyakula yalatji kulilku, ‘Yiltaya Yiitjuku walytja tjuṯa tjukarurru nyinanyi.’ ”

37 Yiitjunya piyuku wangkarra wiyarringu. Palunyatjanu wati kutjungku, Paratjingku Yiitjunya tjapiṉu yalatji, “Tjunguli yankuku?, ngayuku ngurrakutu ngalkunytjaku.” Yiitjunya yuwa wangkarra tjungu yankula palumpa waaḻangkalpi tjarrpangu. Tjarrparra Yiitjunya yankula nyinakatingu mangarri ngalkukitja, mara paltjintjawiya. 38 Yiitjulu ngalkukitjangku maranku paltjintjawiyangka wati paluru puṯu kuliṉu, “Ngalkukitjangku Yiitjulu maranku paltjinmara.” 39 Waaḻa palula Paratji kutjupa tjuṯa nyinangi. Waaḻa ngurrara palula Yiitjulu watjaṉu, “Paratji tjuṯangkunyurra purinytju panikina an puliita paltjilpayi kututja. Kuliṉinyurra, ‘Katutjaku luwuwana nganaṉa mara paltjiṉi, puliitaṯarra. Nganaṉa Katutjaku luwu kilytjuntankunytjawiya palya nyinanyi.’ Wiyawanangkunyurra kuliṉi. Katutjaku luwu kutunyurra kilytjuntananyi kuya palyara. Mangarri, yulytja, maniṯarranyurra mulyaṯangku mantjilpayi. 40 Nyurrangarri kutu kuya palyalpayi. Katutjalu kuliṉi nyurrangarri kuya palyantjawiya nyinanytjaku. Palyanyurra ngalkukitjangku mara paltjintjaku. Yalatji mara paltjiranyurra tjukarurru Katutjaku nyinanytjaku. 41 Yuwa, tjukarurruya nyinama! Nyurrangarrimpa yulytja, maniṯarra maralpa tjuṯaku yuwa! Yalatjinyurra yunganyingka Katutjanya nyurrangarrimpa yunypa nyinaku. Wiya mara paltjilkitjangku kutju nyurrangarri kulintjaku.”

42 “Paratji tjuṯanyurra ngula kuutawutjungka yunypawiya nyinaku, kuya yalatji palyara. Yukirinyurra pakaltjingara, ngurrtjara tjaatjikutu katipayi, Katutjaku tjunkukitjangku. Yalatjinyurra kuliṉi, ‘Nganaṉa Katutjaku luwuwana yukiri katirra Katutjaku tjunanyi. Nganaṉa palumpa luwu kilytjuntankunytjawiya palya nyinanyi.’ Nyurrangarri wiyawanangku kuliṉi. Yukiri katirra Katutjaku tjunkula kutunyurra Katutjaku luwu kilytjuntananyi, kuya palyara. Yaṉangu kutjupaku mani yulytja mantjilkitjangkunyurra ngunytjinytjunkupayi. Wiyanyurra Katutjaku yunytju nyinanyi, wiya. Palyanyurra yukiri ngurrtjara Katutjaku katirra tjunkunytjaku. Yalatji tjunkula yaṉangu kutjupa tjuṯaku palya nyinanytjaku, mulyaṯangku mantjintjawiya, ngunytjinytjunkunytjawiya.”

43 “Paratji tjuṯanyurra ngula kuutawutjungka yunypawiya nyinaku, kuya yalatji palyara. Tjuwuku tjaatjikutu nyurrangarri yankula, mayutjuku tjiiyi tjuṯangka kutju nyinakatipayi, yaṉangu kutjupa tjuṯangka nyinanytjawiya. Yaṉangu tjuṯangku nyurrangarrinya mayutju tiṉa waḻkuntjaku, yunytjurringanyinyurra. Nyurrangarri ngunytjinytju nyinanyi. Nyurrangarri kuuta waṯawarangka tjarrparra tawunu ngururrpawana parra ngarapayi. Yunytjurringanyinyurra tawunu ngurrara tjuṯangku nyurrangarrinya parra ngaranyingka nyakula waḻkuntjaku. 44 Yilta, yunypawiyanyurra nyinaku Katutjaku wangka kilytjuntankupayi tjuṯa. Nyurrangarri ngunytjinytju tjuṯa nyinanyi. Yaṉangu tjuṯangku yalatji wiyawanangku kuliṉi, ‘Paratji tjuṯaya palya nyinanyi, palya nganaṉa tjanampaṉu wangka kulintjaku.’ Yaṉangu tjuṯangku nyurrangarrimpa wangka kulira kuya palyanmalpa, nyurrangarri kuya palyaṉingka nguwanpa.”

45 Wangka palunya kulira wati kutjungku, Muutjaku wangka nintilpayingku Yiitjunya watjaṉu, “Nintilpayi. Panyapa nyuntu watjara nganaṉanyaṯarra payiṉu.” 46 Yiitjulu tjananya watjaṉu, “Muutjaku wangka nintilpayi tjuṯaṯarranyurra ngula kuutawutjungka yunypawiya nyinaku, yalatji wiyawana nyinarra. Katutjaku wangkanyurra riitarrirra, luwu kutjupa tjuṯanyurra palyalpayi, nyurrangarri walytjangku kulira, Katutjaku luwu wiya. Nyurrangarri yaṉangu tjuṯa nintilpayi nyurrangarrimpaṉu luwulpi, luwu palulawanalpiya tjukarurru nyinanytjaku. Luwu palunya tjuṯakuya yaṉangu tjuṯa tjukarurru nyinakitja purrkarripayiya. Luwu palunya tjuṯakunyurra wiya tjukarurru nyinanyi. Luwu palunya tjuṯanyurra palyalwiyangku wantimara. 47 Yilta nyurrangarri ngula kuutawutjungka yunypawiya ngaraku yalatji wiyawanangku palyara. Katutjaku wangka watjalpayi tjuṯa nyurrangarrimpa walytja tjuṯangku yirriṯi mirri pungangi, tjanampa wangka kulira wantirra. Katutjaku wangka watjalpayi palunya tjuṯa tjunutjunkula wantinytjanyurra ngurrira, mirringka puḻi yinitjarra ngaratjunkupayi miimiri, yaṉangu tjuṯangku yalatji kulintjaku, ‘Kuunyi nganampa ingkaṯa yirriṯitja ngaangka ngarrinyi.’ 48 Nyurrangarri miimiri tjanampa palyara wiya yalatji kuliṉi, ‘Kuunyi, ingkaṯa ngaangku tjananya yirriṯi Katutjaku wangka nintilpayi, nganaṉa wangka palunya kulira tjukarurru nyinanytjaku.’ Wiya yalatjinyurra kuliṉi, Katutjaku wangkanyurra kulira wantipayi, nyurrangarrimpa walytja irriṯitja tjuṯa nguwanpa. Paluru tjana palumpa wangka wantirra yaṉangu tjuṯa mirri pungkupayi.

49 “Nyurrangarrimpa yirriṯi nyinapayi tjuṯangku kuya palyara nyinapayi. Nyurrangarriṯarra kuya palyara nyinanyi. Palulanguru Katutjalu yirriṯi watjaṉu, ‘Wantirriyalkuṉa tjanampa yaṉangu Tjuwu tjuṯakutu, Katutjaku wangka watjalpayi tjuṯa, Katutjaku wangka nintilpayi tjuṯaṯarra. Tjaampala tjananya paluru tjana mirri pungku. Tjaampala tjananya paluru tjana yitjipungku.’ 50 Palulanguru Katutjalu nyurranya Tjuwu kuwarri nyinanytja tjuṯa, ngula kuutawutjungka warukutu payira iyalku, Katutjaku wangka watjalpayi tjuṯa mirri pungangitjangka. Nyurrangarrimpa walytja yirriṯitja tjuṯangku tjananya mirri pungkupayi. 51 Yirriṯi wati Yipulanya nyinangu kuya palyalpayi wiya paluru. Palumpa kaakangku palunya mirri pungu. Palulanguru kutjupa tjuṯangku wati Tjakarriyatjanya mirri pungu, tjaatji tiṉangka ngururrpa tjawirrilyi kutjalpayingka yila. Paluru tjana pungkupayi tjuṯangku tjananya mirri pungutjangka, yilta Katutjalu nyurranya kuwarri nyinanytja tjuṯa ngula kuutawutjungka kuru watjara warukutu wantirriyalku.”

52 “Yilta, Muutjaku wangka nintilpayi tjuṯanyurra ngula kuutawutjungka yunypawiya nyinaku, wiyawanangku tjananya nintira. Nyurrangarri Katutjaku wangka tjananya tjukarurru tjakultjunkunytjawiya. Nyurrangarri tjananya tjukarurru nintinmara, kana kutuya nyinanytjaku. Wiyanyurra Katutjaku wangka kulira tjukarurru nyinanyi, kuliranyurra wantipayi.”

53-54 Waaḻa palula nyinarra Yiitjunya wangkangu yankukitja. Paratji tjuṯangku, Muutjaku wangka nintilpayi tjuṯangkuṯarra marrkuṉu, kutu nyinarra wangkanytjaku. Paluru tjana kuliṉu, “Yiitjulu nganaṉanya kuwarri panypurangangi. Palulanguru nganaṉa wangka kutjupa Yiitjunya tjapilku. Paluru wiyawanangku watjaṉingka nganaṉa kuutawutjungka tjakultjunku, kuutawutjuku mayutjungku Yiitjunya mirritjunkunytjaku.”