1 Tjuwuku tjaatji tiṉangka Yiitjunyangarri nyinangu. Yiitjulu tjananya nyangu, yaṉangu tjuṯangkuya mani tjawirrilyi Katutjaku tjarrpatjunkunytjala, turaama manitjarrangka. Mani tiṉatjarra tjuṯangku tjana mani tiṉa katirra tjarrpatjunangi. 2 Palulanguru minyma waḻukutangku katirra mani wiima tjarrpatjunu, tjiilpa kutjarra. Tjarrpatjunkula paluru maniwiyalpi nyinangu. 3-4 Nyakula Yiitjulu tjananya watjaṉu yalatji, “Wangka ngaatjanyaya kulila! Minyma nyarraku Katutjanya puntura yunypa nyinanyi mani yuwankarra yungkula wiyaṉu. Kanya kutjupa tjuṯaku Katutjanya yunypawiya nguwanpa nyinanyi mani tiṉa tjana kutu kanyintjala. Yuwa, minyma palumpa Katutjanyara puntura yunyparringanyi.”

5 Palulanguruya yaṉangu tjuṯa tjaatji tiṉangka yaatjayiṯi ngaralaya wangkangu, “Nyawa palatja!, tjaatji tiṉa palya nganampa ngaranyi. Puḻi tiṉatjanuya palyaṉutja nyawa! Ilta tjaatji palya kutu nganampa ngaranyi. Tjawirrilyi tjuṯalingku yunngu ngarrinyi, yaṉangu tjuṯangku ngalya katirra tjunutja.” Yiitjulu tjananya watjaṉu, 6 “Ngula, kuya tjuṯangku tjaatji tiṉa palatja yuḻpulku. Puḻi yuḻpuṉutja tjuṯa kutju ngarrirra waṉimalpa.”

7 Palulanguru yaṉangu tjuṯangku Yiitjunya tjapiṉu, “Yaalytjingara tjaatji tiṉa nyarratja tjana yuḻpulku?” Piyukuya tjapiṉu yalatji, Yiitjunya, “Nganaṉa kuliṉi manta ilkariṯarra ngula wiyarriku. Nyaangku nganaṉanya nintilku wiyarrinytjakutu?, tjinguru paarrtjingku? Yuḻṯa palumpa yaalytjingara ngaraku?”

8 Yiitjulu tjananya wangka kutjupawana watjaṉu, “Purinypaya nyinama!, wiyawana nyurrangarrinya ngunytjinytjunkupayingkamarra. Yaṉangu tjuṯa kutjuṯu kutjuṯu ngalya yanku ngayunya Kurayitjanya nguwanpa. Yalatji wiyawana nyurrangarrinya tjana ngunytjilyinku, ‘Ngayulu mayutju tiṉa nyurrangarrimpa Kurayitjanya nyinanyi. Katutjalu tjananya yirriṯitja tjuṯangka watjaṉu ngayunya wantirriyantjaku.’ Yalatjiṯarraya ngunytjilyinku, ‘Kuwarri Kurayitjanya ngalya yananyi.’ Wiya nyurrangarri tjananya kulintjaku, kulira tjananya wanti!” 9 Yiitjulu tjananya piyuku watjaṉu, “Ngula yaṉangu tjikipaka tjuṯangku kamanta ngurrara tjuṯa pungku. Yaṉangu kutjupa tjuṯangkuyanku pikangku pungamalpa, ngurra tjuṯawana. Ngulanyurra tjakulpa kulilku, yalatjiyanku pikangku pungkunytjala. Tjakulpa kulira wiyanyurra nguḻurringkunytjaku. Yalatjinyurra kulintjaku, ‘Wiya manta ilkariṯarra kuwarri wiyarriku, ngula wiyarriku.’ ”

10 Yiitjulu tjananya piyuku watjaṉu, “Manta kutju ngurrara tjuṯangku tjananya, manta kutjupa ngurrara tjuṯa tjananya pikangku pungku. Ngurra kutju ngurrara tjuṯangku ngurra kutjupa ngurrara tjuṯa tjananya pikangku pungku. Yalatji ngurra tjuṯawana ngaraku. 11 Manta, watiya tjuṯa, waaḻaṯarra ngurra tjuṯawana pirrtjiku. Yaṉangu tjuṯa ngurra tjuṯawana puṯu kulira paḻtjatjirratja mirrirriku, mangarri wiyarringkunytjala. Yaṉangu kutjupa tjuṯa miiṉṯa puntu nyinaku. Tjana ilkaringka kutjupa kutjupa nyakula nguḻurriku.

12 “Yuḻṯa palula yurrunpa, ngayuku walytja tjuṯa nyurrangarrinya tuunlayiki tjuṯangku ngurra kutju ngurrara tjuṯangku witira katirra kuutamilalku, Tjuwuku tjaatjingka. Ngurra kutjupangka tuunlayiki tjuṯangku ngayuku walytja tjuṯa witira katirra kuutamilalku, Tjuwuku tjaatjingka. Yalatji nguwanpa tjananya ngayuku walytja tjuṯanya Tjuwuku tjaatji tjuṯangka kuutamilara tjiilangka tjarrpatjunku. Ngayuku walytja nyurrangarri nyinanytjala, tjana nyurrangarrinya witira katirra mayutju tiṉa tjuṯangka ngaratjunku, kamanta ngurrara mayutju tiṉa tjuṯangkaṯarra. 13 Mayutju palula tjanala nyurrangarri ngarala ngayuku wangka tjakultjunku.

14 “Mayutju palula tjanala nyurrangarri rapa ngarala wiya nguḻurringkunytjaku. Wiyanyurra yurrunpa kulintjaku, ‘Yaalytjiyaalytjiṉa ngayulu wangkaku kuutawutjungka?’ 15 Ngayulu nyurrangarrinya nintilku palya wangkanytjaku. Tuunlayiki tjuṯangku puṯu kulilku nyurrangarrinya panypurangkukitjangku.

16 “Nyurrangarrimpa ngulytju tjuṯangku nyurrangarrinya ngayuku walytja tjuṯa katirra mayutjungka ngaratjunku, paluru yalatji watjantjaku, ‘Ngaatja Yiitjuku walytja katirranyurra mirri puwa!’ Nyuntupa paapangku nyuntunya ngayuku walytja katirra ngaratjunku kuutawutjungka watjalku mirri pungkunytjaku. Nyuntupa kaakangku nyuntunya ngayuku walytja katirra ngaratjunkula kuutawutjungka watjalku, mirri pungkunytjakuya. Tjaampala nyurrangarrinya tjana yilta mirri pungku. 17 Yaṉangu ngurra tjuṯa ngurrara nyurrangarrimpa tuunlayiki nyinaku, ngayuku walytjanyurra nyinanytjala. 18 Yuḻṯa palunya ngaranytjala Katutjalu nyurrangarrinya yaṉṯayaṉṯara kanyilku. 19 Tjingurunyurra ngayuku tjukarurru kutu nyinarra, kana kutunyurra nyinamalpa, Katutjaku ngurrangka.”

20 Yiitjulu tjananya piyuku watjaṉu, “Ngula, tawunu Tjarutjalumala tjayiṯiwanaya tjuulytji tjuṯalingkuya kutjupa ngurrara tjuṯa parra ngaranytjala nyakulanyurra yalatji kulintjaku, ‘Kuwarrilpilanya tjuulytji tjuṯangku pungkula wantirriyalku, waaḻa yuwankarraṯarraya yuḻpulku.’ 21-22 Yuḻṯa palula Tjarutjalumanya ngurrara tjuṯaya puḻikutu tjalkaḻungkunytjaku, Tjuutiyanya ngurrara kutjupa tjuṯaṯarra, paluru tjana mirri pungkupayingkamarra. Tjana Tjuutiyanya ngurrara tjuṯaya wiya Tjarutjalumalakutu yankula kumpintjaku, puḻikutuya tjalkaḻungkunytjaku. Yalatji tjananya pungkula wantirriyantjaku Katutjaku wangka ngaranyi, yurrunpa palumpa wangka watjalpayingku wakara tjunutja. 23 Yuḻṯa palula kuunyiya nyinaku, minyma waḻinyku tjuṯa, minyma yamputjarra tjuṯaṯarra. Puṯuya kulilku parrpaṯu puḻikutuya tjalkaḻungkunytjaku. Ngurra tjuṯawana tjananya paluru tjana pungkula pikapikantanku. Yaṉangu tjuṯaya ngurra tjuṯawana mikintjarra nyinarra waṉiku. 24 Tjuulytji tjuṯangku Tjuwuwiya tjuṯangku kutjupa tjuṯa tjananya katiku, manta kutjupakutu, waarrkarrinytjakuya ngurra palula. Kutjupa tjuṯa tjananya tjuuḻa waṯawaratjarrangka kultu wakara iluntankuku. Tawunu Tjarutjalumanya ngurrara tjuṯa tjananya mayutju Tjuwuwiya tjikipaka tjuṯangku tjananya puritjina nguwanpa kanyilku, tjana ngurrawana kutu waarrkarrinytjaku. Ngula tjikipaka paluru tjana wantirra yanku, Katutjaku tayimingka.”

25-27 Yiitjulu tjananya piyuku watjaṉu, “Yaṉanguku katjaṉa piyuku ngalya yankukitjangka, tjiṉṯu, pira, piṉṯirriṯarra wiya kuwarri nguwanpa ngaraku, pirrtjipirrtjikuya. Yalatjiya ilkariwana tjana nyaku. Mantangkaṯarra yuru tiṉa ruularringkula puntura munturrmanku. Palunyangkaya yaṉangu tjuṯa puntura nguḻurriku, ngurra tjuṯawana. Panyapaya nyakula kulira nguḻurringkula punkalku. Palulanguru yaṉangu tjuṯangku nyaku ngayunya yaṉanguku katja yutuwariwana rayitpayiki ngalya tjarukatinytjala. Mayutju paawu puntutjarra tjana ngayunya nyaku, pinypanyingka. 28 Ilkariwana kuwarri nguwanpa ngaranytjawiyangka, nyakulanyurra yunypangku yalatji kulintjaku, ‘Katutjalu nganaṉanya kuwarri kanara katiku palumpa ngurrakutu.’ ”

29-30 Yiitjulu tjananya yara yalatji watjaṉu, “Waḻpa kakarraranguru rungkaṉingka nganaṉa kuliṉi, ‘Kuwarri warrikutu nintiṉi.’ 31 Palunya nguwanpa tjiṉṯu piraṯarra panyapa pilinypa ngaranytja wiyarriku. Nyakulanyurra alatji kulintjaku, ‘Kuwarri mayutjulampa ngalya yananyi. Katutjalulanya palumpa walytja tjuṯa katirra ngurrangka tjunku, palurulanya kutu yaṉṯayaṉṯanmalpa.’ 32 Wangka ngaatjanyaya kulila! Yaṉangu tjuṯa nyurrangarri kuwarri nyinanyi. Nyinarranyurra ngaṉṯi mirrirriku, panyapaṉa nyurranya watjaṉutja yilta ngaraku. 33 Yilta ilkari mantaṯarra wiyarriku, kanya wangka ngayuku wiyarrinytjawiya, kutu ngaramalpa.”

34-35 “Katutjakuya tjukarurru nyinarra kulinma!, yiwarra kutjupangka yankunytjawiya. Mani an yulytja tiṉanyurra mantjilkitjangku kutu kulira wiyawana nyinanytjala yuḻṯa palula, ngayulu ngalyankula nyurrangarrinya wantitjipingkamarra. Waama wiyanyurra tjikira nyinanytjaku, mangarriṯarra ngalkura kutju wiyanyurra kulira nyinanytjaku, ngayulu ngalyankula nyurrangarrinya wantipayingkamarra. Yuḻṯa palula yaṉangu tjuṯa muwaṉku nyinaku, ngayuluṉa piyuku ngalyankunytjala. Tjana kutuya kuya palyara nyinaku. 36 Purinypaya nyinama! Katutjanyaya kutju tjapila!, tjukarurru kutu nyinanytjaku, yuḻṯa palunya ngaratjipingka. Tjukarurrunyurra ngayuku kutu nyinanytjala ngayulu yaṉanguku katja nyurrangarrimpa yunypa nyinarra tjungu nyinaku nyurrangarrila.”

37 Tjiṉṯu kutjupa, tjiṉṯu kutjupangka Yiitjulu tjaatji tiṉangka yaṉangu tjuṯa nintilpayi. Yalatji tjananya nintira mungarrtji Yiitjunyangarri yankula ngarripayi, puḻi Yalipatjala. 38 Aaḻi pakara yaṉangu tjuṯa yankupayi Tjuwuku tjaatji tiṉakutu, Yiitjuku wangka kulilkitja.